KO E SAAME 94
94
Ko e ‘Otua mo e Fakamaau ‘o e Kakai Kotoa Pē
1‘E SIHOVA, ‘a e ‘Otua ‘oku ‘a‘ana ‘a e sauni,
‘A e ‘Otua ‘oku ‘a‘ana ‘a e sauni, ulo mai.
2Ma‘ama‘a hake ‘a e Fakamaau ‘o māmani:
Fakaai ha totongi ki he fielahi.
3‘E tuku ‘afē, ‘Eiki, ‘e he angahala–
‘E tuku ‘afē ‘e he angahala ‘enau pātapata?
4‘Oku nau pu‘aki ‘enau lau fiematamu‘a:
‘Oku fakamofutofuta ‘a e kau faikovi kotoa.
5‘Oku nau laiki ho kakai, ‘e Sihova,
Pea ‘oku nau fakamamahi ho tofi‘a.
6Ko e uitou mo e muli ‘oku nau tāmatea,
Pea nau fakapoongi ‘a si‘i paea.
7Pea ‘oku nau pehē ‘oku ‘ikai sio ki ai ‘a IAA,
Pea ko e ‘Otua ‘o Sēkope ‘oku ‘ikai te ne tokanga.
8Tokanga ‘a kimoutolu ‘i he kakai ‘oku anga fakamanu:
‘Io, ‘a e kau vale, te mou poto fakakū?
9Ko ia na‘a ne hunuki ‘a e telinga, ‘o ‘ikai te ne ongo‘i koā?
Pea ko ia na‘a ne ngaohi ‘a e mata, ‘o ‘ikai koā te ne sioa?
10Ko ia ‘oku ne fai ako ki he ngaahi pule‘anga, ‘o ‘ikai koā, te ne tautea?#94.10 te ne tautea; pe tautea hotau kau taki fai angahalá?
‘A ‘ene ‘Afio ‘oku ne ako poto ki he tangata?
11‘Oku ‘ilo‘i ‘e Sihova ‘a e ngaahi fifili ‘a e tangata,#1 Kol 3.20
Ko e koto launoa pē ia.#94.11 Ko e… ia; He ko e matangi pē ‘a e fa‘ahinga ko iá.
12Monū‘ia ā ka ko e tangata ‘oku ke fai ako ki ai, ‘e IAA,
Mo ke fakapoto‘i mei he lao ‘o e ‘Afiona.
13Ke fakanonga ia mei he ngaahi ‘aho mala,
Kae‘oua ke keli ‘a e luo ma‘a e angahala.
14He ‘e ‘ikai teke‘i ‘e Sihova hono kakai,
Pea ko hono tofi‘a ‘e ‘ikai te ne li‘aki.
15He kuo pau ke foki ki he totonu ‘a e konisitūtone:
Pea ‘e muimui ai ‘a e kau loto totonu fua pē.
16Ko hai ‘e tu‘u hake ma‘aku ke fai mo e kau pau‘u?
Ko hai ‘e fakama‘u hifo ke fai mo e kau fai kovi ma‘aku?
17Ka ne ta‘e‘oua ko hoku pāletu‘a ‘a Sihova,
Pehē ne vave ‘a e nofo hoku laumālie ‘i he ongonoa.#94.17 ‘i he ongonoa; Ko e nofo‘anga ia ‘o e kakai kuo maté (vakai ki he 6.5).
18Ka ‘i he‘eku pehē, Kuo heke hoku va‘e;
Ko ho‘o ‘ofa, ‘Eiki, na‘a ne puke hake.
19‘I he lahi ‘a e hoha‘a ‘i hoku loto ē
Ko ho‘o ngaahi fakana‘a na‘e fakafiefia‘i hoku laumālie.
20‘E lava ‘e he taloni ‘oku ‘i ai ‘a e fakamālohi ke fafale ki he ‘Afiona,
‘A ia ‘oku fa‘u lao fakamamahi ‘i he funga ‘o e folofola?
21‘Oku nau fakatefua fakakaiha‘akau mai ke to‘o ‘a e mo‘ui ‘a e ‘ata‘atā.
Pea ‘oku nau fakamāumatea ‘a e ta‘ehalaia.
22Ka na‘e ‘iate au ‘a Sihova mōku fu‘u taua;
Pea ko hoku ‘Otua ko hoku makatu‘u hūfanga.
23Pea na‘a ne fakafoki ki ai ha‘anautolu pē pau‘u,
‘Io, te ne faka‘auha ‘aki ‘a e kovi pē ‘anautolu;
‘E fai honau faka‘auha ‘e Sihova ko hotau ‘Otua.
Currently Selected:
KO E SAAME 94: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
