KO E SAAME 81
81
Ko e Hiva Ki ha Kātoanga Lotu
(Ki he Pule ‘o e Hiva. Ko e faka-Kati. Ko e me‘a ‘a ‘Ēsafe.)
1HIVA fiefia kia ‘Elohimi ko hotau mālohinga:
Fai ki he ‘Otua ‘o Sēkope ha fu‘u mavava.
2Hua ‘a e hiva, pea to‘o ‘a e lali fāngongo:
‘A e ha‘ape le‘o mālie mo e helefilo.
3Ifi talupite ‘i he fakamāhina fo‘ou,
‘I he kātoa ‘a e māhina, ‘i he kātoanga ‘atautolu.
4He ko ha lao ia ‘o ‘Isileli pē,
Ko e me‘a fakakonisitūtone ‘a e ‘Otua ‘o Sēkope.
5Na‘a ne fokotu‘u ia ‘i ha‘a Siosifa ko e fakamo‘oni,
‘I he taimi na‘a ne hā‘ele atu ai ‘i ‘Isipite ke taa‘i:
Fokifā na‘a ku ongo‘i ha le‘o na‘e ‘ikai te u maheni ai.#81.5 ‘I he… maheni ai. ‘Oku fihi. ‘Oku hiki ‘e he ni‘ihi: ‘I he‘ene ‘alu atu ‘i ‘Isipite ke fai ha me‘a, ‘a ia na‘a ku ongo‘i ai ha lea na‘e ‘ikai te u ‘iloa.
6Na‘a ku faka‘atā hono uma mei he kavenga:
Na‘e mahu‘i ‘a e kato mei hono nima.
7Na‘a ke tautapa mai he faingata‘a, pea u hamusia;#‘Eki 17.7; Nōm 20.13
Na‘a ku tali koe mei he toi‘anga ‘o e mana;
Na‘a ku sivi koe ‘i Vai-Mēlipa.” (Sila)
8“Fanongo mai ‘e hoku kakai ka u fakamo‘oni atu:
‘Isileli ē, taumaiā ke ke fakaongo kiate au!
9Ke ‘oua na‘a ‘iate koe ha ‘otua fo‘ou;
‘O ‘oua na‘a fai ki ha ‘otua muli ho‘o punou.#‘Eki 20.2-3; Teu 5.6-7
10Ko Sihova au ko homou ‘Otua na‘e ‘ohake koā mei ‘Isipite:
Mafa‘a ho ngutu ke lahi kau fakafonu pē.”
11Ka na‘e ‘ikai tokanga ki hoku le‘o ‘e hoku kakai;
Pea ‘ikai fie talangofua mai ‘a ‘Isileli,
12Ko ia, na‘a ku tukuange ai kinautolu ki honau loto ta‘emangoi,
Ke nau fou ‘i ha‘anautolu pē filio‘i.
13‘Amusia ange ‘e au ke tokanga hoku kakai kiate au,
‘O fou ‘a ‘Isileli ‘i he hala ‘o‘oku!
14Ko e kemo Kuo u fakamo‘ulaloa honau ngaahi fili,
Pea u liliu hoku nima ke taa‘i honau kau fakamamahi.
15‘E fakamalua kiate ia ‘a e kau fehi‘a kia Sihova
Ka ko ho‘onautolu ē taimi ‘e lauikuonga.
16Pehē te ne fafanga ia ‘aki ‘a e ‘elito‘i mahoa‘a:
‘Io, ne u fakamākona koe ‘aki ‘a e honi mei he maka.
Currently Selected:
KO E SAAME 81: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
