KO E SAAME 71
71
Ko e Lotu ‘a e Toulekeleka
1‘EIKI, Kuo u hūfanga ki he ‘Afiona:
‘Oua ‘e tuku au ke u mā ‘o ta‘engata.
2Ka ‘i ho‘o totonu ke ke hamusi au, mo fakahaofi:
Fakaongo ho fofonga kiate au, ‘o fakamo‘ui.
3Ke ke hoko kiate au ko hoku fale toinga,
Ke u hū ki ai ‘i he taimi kotoa:
Kuo ke fai tu‘utu‘uni ke fakahaofi kita;#71.3 Ke u hū… kita; Ko hono faka-Hepeluú ia, ka ‘oku pehē ‘i he hiki fuoloa ‘e taha: Ko e kolo tau mālohi.
He ko ‘eku mo‘unga mo ‘eku kolo ‘a e ‘Afiona.
4‘E hoku ‘Otua, huhu‘i au mei he nima ‘o e angahala,
Mei hoku puke ‘e he angakovi mo ta‘e‘ofa.
5Pea ko koe, ‘Ātonai Sihova, ‘oku tu‘u ai ‘eku ‘amanaki:
Ko hoku falala‘anga talu ‘eku kei si‘i.
6Talu hoku fanau‘i mo ‘eku tu‘u ko e pou#71.6 tu‘u ko e pou; Ko hono fakalea ia ‘i he ngaahi hiki fuoloa ‘e ni‘ihi, ka ‘oku ‘ikai ke mahino ‘a hono faka-Hepeluú. ‘e he ‘Afiona pē:
Ko koe ia na‘e to‘o au mei he fatu ‘o ‘eku fa‘ē;
Ko ‘eku hiva ‘aki koe ‘e fai ma‘u pē.
7Kuo u hoko tokua ko e ofo‘anga ki he tokolahi;
Ka ko koe ko hoku hūfanga mālohi.
8‘E puta hoku ngutu ‘i ho fakamālō.
Mo ho fakalāngilangi‘i ‘o ‘osi ‘a e ‘aho.
9‘Oua ‘e tukuange au ‘i he taimi ‘o ‘eku luku;
‘Oua ‘e li‘aki au ‘oka ‘osi hoku ngū.
10He ‘oku lau kiate au hoku ngaahi fili,
Pea ‘oku lea fakataha ‘a kinautolu ‘oku vakai‘i ‘eku mo‘ui.
11He‘enau pehē, Kuo li‘aki ia ‘e ‘Elohimi:
Tuli ‘o ma‘u, he ‘oku ‘ikai taha ke hamusi.
12‘Oua te ke fakamama‘o, ‘Elohimi;
‘E ‘Otua, vave mai mōku tokoni.
13Ke mā mu‘a, ‘io, ke ‘auha ‘a kinautolu ‘oku fakafili ki he‘eku mo‘ui;
Ke kofu ‘aki ‘a e manuki mo e taukae ‘a kinautolu ‘oku o‘i ha‘aku kovi.
14Ka ko au te u ‘amanaki ai pē;
Pea ‘e fakautuutu ‘eku fakamālō kiate koe.
15‘E ‘a‘au ‘e hoku ngutu ho‘o ngaahi fai mā‘oni‘oni,
‘E ‘osi ‘a e ‘aho mo ‘eku lau ho‘o ngaahi fakamo‘ui;
He ‘oku ‘ikai te u ‘ilo hono tānaki.
16Ko e ngaahi ngāue kāfakafa ‘a ‘Ātonai Sihova te u ha‘u mo au:
Ko ho‘o ngaahi fai mā‘oni‘oni ‘a‘au pē ke u lau.
17‘E ‘Otua, kuo ke ako‘i au talu ‘eku si‘i;
Pea Kuo u fakahā ho‘o ngaahi ngāue fakaofo ‘o a‘u ki he taimi ni.
18Pea ‘oua foki, ‘Elohimi, te ke li‘aki kita,
‘I he tō mai ‘a e motu‘a mo e ‘uluhinā;
‘Oua ke u fakahā ki he to‘utangata ‘e taha ho‘o māfimafi,
Mo ho ivi ki he fu‘u fononga ‘oku laka mai.
19Ko ho‘o mā‘oni‘oni foki, ‘e ‘Otua, ko e koto mā‘olunga;
Hono kuo fai me‘a lalahi ‘e he ‘Afiona:
Ko hai ‘oku taau mo koe, ‘e ‘Otua?
20‘a e ‘Afiona ne ke tuku ke mau ongo‘i
‘a e ngaahi faingata‘a lahi mo kovi,
Te ke toe fakamo‘ui mai kimautolu,
‘O toe ‘ohake mei Lolofonua Taupotu.
21Ke ke fakamā‘olunga au,
Pea tafoki mai, ‘o fai ha fakalelu.
22Ko au foki te u fai‘aki ‘a e me‘a helefilo ho fakafeta‘ia,
‘Io, ho‘o fai mo‘oni, ‘e hoku ‘Otua:
Te u tā ha‘ape ko ho hiva‘i,
‘A e ‘Afiona ko e tāpuhā ‘o ‘Isileli,
23‘E fiefia hoku loungutu ē
‘O ka u ka hiva saame kiate koe;
‘Uma‘ā ‘a e me‘a kuo ke huhu‘i, ‘a hoku laumālie.
24‘E talanoa foki ho‘o faitotonu ‘e hoku ‘elelo
Ke ‘osi mai ‘a e ‘aho;
He kuo mā–he kuo puputu‘u
‘A kinautolu ‘oku o‘i ha kovi kiate au.
Currently Selected:
KO E SAAME 71: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
