KO E SAAME 69
69
Ko e Tautapa ki ha Tokoni
(Ki he Pule ‘o e hiva. Ki he fasi ko “Koni lile.” Ko e me‘a ‘a Tēvita)
1FAKAHAOFI au, ‘Elohimi;
He kuo a‘u ‘a e vai ki he‘eku mo‘ui.
2Kuo u ngalo ‘i ha kele ‘o ha fu‘u vanu,
Pea ‘oku ‘ikai ha tu‘unga kiate au:
Kuo u a‘u ki ha tokanga vai lahi,
Pea kuo fā ‘a e tele‘a, ‘o lōmekina mai.
3Kuo u ongosia he tautapa atu; kuo mōmoa hoku kia:
Kuo ‘osi‘osi hoku mata ‘i he fakasio atu ki hoku ‘Otua.
4Ko kinautolu ‘oku fehi‘a tu‘unga‘a pē kiate au#Saame 35.19; Sioné 15.25
‘Oku tokolahi ‘i hoku tu‘oni lou‘ulu:
‘Oku kaukaua hoku kau faka‘auha, ‘a hoku ngaahi fili lau loi:
Ko ia ai, ko e me‘a na‘e ‘ikai te u kaiha‘asi kuo pau ke u fakafoki.
5‘Oku ke mea‘i ‘eku vale, ‘e ‘Otua;
Pea ko ‘eku halaia ‘oku ‘ikai ke puli ki he ‘Afiona.
6Ke ‘oua ‘e mā ‘iate au ‘a kinautolu ‘oku tatali atu,
‘E ‘Ātonai Sihova Sāpaoti:
Ke ‘oua na‘a puputu‘u koe‘uhi ko au
Ha‘a kumi ki ke ‘Afiona, ko e ‘Otua ‘o ‘Isileli,
7Na‘a ku kātaki ‘a e taukae koe‘uhi ko e ‘Afiona;
Na‘e pulonga hoku mata ‘i he mā.
8‘Oku lau au ‘e hoku ngaahi tokoua ko e kehe;
Kuo u hoko ko e muli ki he fānau ‘a ‘eku fa‘ē.
9He ko e mamahi‘i ‘o ho fale kuo kai ‘o ‘osi au;#Sioné 2.17; Lom 15.3
Ko e ngaahi manuki ‘a e kakai ‘oku manuki koe kuo tō kiate au.
10Pea u tangi#69.10 tangi; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘Oku ou fakatō au ki lalo. –‘aukai hoku laumālie–
Kae hoko ia mōku manuki pē.
11Pea na‘a ku ‘ai ki hoku kakano ‘a e tauanga‘a,
Ka u hoko pē ko honau fainga kananga.
12Ko e talanoa ‘a e nofo he matanikolo ‘oku kau kia kita;
Mo e ngaahi ta‘anga ‘a e kau inu kava.
13Ka ko au ‘oku fai atu ‘eku hū, Sihova ē,
‘I ha taimi tu‘utu‘umālie:
‘E ‘Otua, ‘i he lahi ‘o ho‘o meesi,
Ke ke tali au ‘aki ‘a e mo‘oni ‘o ho‘o fakamo‘ui.
14Hāmusi au mei he pelepela, ke ‘oua na‘a ku ngalo ai:
Ke fai hoku fakahaofi meiate kinautolu ‘oku fehi‘a mai,
Pea mei he ngaahi tokanga vai.
15‘Oua ‘e tuku ‘a e vaifā ke lōmaki‘i au,
Pea ke ‘oua ‘e fōngia au ‘e he vanu;
Pea ke ‘oua na‘a tāpuni mai ‘e he luo hono ngutu.
16Tali au, ‘Eiki; he ‘oku angalelei ho‘o meesi:
Hanga mai ‘o taau mo e lahi ‘o ho‘o faka‘atu‘i.
17‘Io, ‘oua ‘e hanga kehe mei ho‘o tamaio‘eiki;
He ‘oku ou ‘efihia: vave mai hoku tali.
18Fakaofi mai ki hoku laumālie; huhu‘i:
Vete ange au telia hoku ngaahi fili.
19‘Oku ke ‘ilo pē hoku manuki, mo fakamā, mo taukae:
‘Oku fe‘ao mo e ‘Afiona hoku fili fua pē.
20Kuo havehave hoku loto ‘i he manuki; pea u vaivai:
Pea na‘a ku ‘amanaki ki ha fakalelu, kae ‘ikai;
Pea ki ‘ani fakafiemālie, kae ‘ikai ‘iloa mai.
21Na‘a nau ‘omi ‘ahu ma‘aku me‘akai;#Māt 27.48; Ma‘ake 15.36; Luk 23.36; Sioné 19.28-29
Pea he‘eku fie inu ko e vinika na‘a nau fakainu ‘aki.
22‘Ā, ke hoko honau keinanga‘anga ko e hele puna, lolotonga ‘oku nau kei nofo ai;#Lom 11.9-10
Pea ka ai ha‘anau fu‘u nonga kae tauhele ‘aki.
23Ke fakapo‘uli honau mata ‘o ‘oua ‘e sio;
Pea ‘ai ke fevāleaki ma‘u pē honau kongaloto.
24Ke hua‘i kiate kinautolu ho‘o tautea,
Pea ke tuli ‘o ma‘u kinautolu ‘e he kakaha ‘o ho‘o ‘ita.
25Ke hoko honau ‘apitanga ko e koto li‘aki:#Ngā 1.20
Ke ‘oua na‘a nofo ha taha ‘i honau tēniti.
26He ko ia kuo ke taa‘i ‘oku nau toe ha‘ao;
Pea ‘oku nau lau fakalāutelau ‘a e mamahi ‘o ho‘o kau kafo.
27Tuku ke fakalahi ‘enau kovi:
Pea ke ‘oua te nau a‘usia ‘ao mā‘oni‘oni.
28Ke tāmate‘i kinautolu mei he tohi ‘o e mo‘ui,#‘Eki 32.32; Fkhā 3.5; 13.8; 17.8
‘O ‘oua ‘e tohi kinautolu ‘i he kau mā‘oni‘oni.
29Ka ko au ‘oku ou vaivai mo mamahi:
Kae tuku, ‘Elohimi, ke hākeaki‘i au ‘e ho‘o fakamo‘ui.
30Te u fakamālō‘ia ‘a e huafa ‘o ‘Elohimi ‘aki ha hiva,
Pea ko e fakafeta‘i te u hākeaki‘i ai ia.
31‘E ‘ange‘ange kia Sihova ha pulumokau ‘i ha me‘a pehē,
Ha pulu ‘oku nifo‘ia mo va‘e mavahevahe.
32Kuo mamata ki ai ‘a si‘i ta‘aliekina, ‘o nau fiefia:
Ke mo‘ui homou loto, ha‘a kumi ki he ‘Otua.
33He ‘oku ongo‘i ‘e Sihova ‘a e kau masiva,
Pea ‘oku ‘ikai te ne ta‘etoka‘i ‘ene kau pōpula.
34Fakamālō kiate ia ‘a langi mo māmani,
‘A e ngaahi tahi mo e me‘a kotoa ‘oku ngaue ai.
35He fakamo‘ui ‘a Saione ‘e he ‘Otua,
‘O langa ‘a e ngaahi kolo ‘o Siuta;
Pea te nau nofo ai, ‘o ma‘u moonau tofi‘a.
36Pea ‘e ma‘u ia ‘e he hako ‘o ‘ene kau tamaio‘eiki;
Pea ko e kau ‘ofa ki hono huafa te nau nofo ki ai.
Currently Selected:
KO E SAAME 69: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
