KO E SAAME 58
58
Ko Lotu Kole ki he ‘Otuá ke ne Tautea ‘a e Kau Fai Kovi
(Ki he Pule ‘o e Hiva. Ki he fasi ko “‘Oua ‘e faka‘auha.” Ko e Saame Koula ‘a Tēvita.)
1HONO mo‘oni ho‘omou lea‘aki ‘a e totonu, ha‘a ‘Otua?#58.1 pe ha‘a ma‘u mafai. ‘Oku fihi.
Hako ‘o hou‘eiki, ‘oku mou fai mā‘oni‘oni koā ho‘omou fakamaau?
2‘Ā, ‘i homou loto ‘oku mou ngāue‘i ‘a e kovi;
Pea ‘i he fonua ‘oku mou fakamamafa ‘a e me‘afua ‘aki homou nima mālohi.
3‘Oku kamata ‘a e afe ‘a e kau angahala ‘i he manava:
Talu honau fanau‘i mo e hē, ‘o lea‘aki ‘a e kākā.
4‘Oku ‘i ai ‘enau me‘a kona tatau mātē mo e kona ‘o e ngata:
Tatau mo e ata tuli ‘oku ne tāpuni hono telinga;
5‘A ia ‘oku ‘ikai ke tokanga ki he le‘o ‘o e kau maki,
Pe ki he fakalalata manu, neongo e fu‘u poto ‘ene fai.
6Fesi honau nifo ‘i honau ngutu, ‘e ‘Otua:
Ta‘aki fu‘u ‘a e nifo ngao ‘o e fanga laione mui, ‘e Sihova.
7Ke nau mole hangē ha vai ‘oku tafe atu:
Ka fana, ke hangē kuo tu‘usi ‘a e mui ngahau.#58.7 Ka fana… ngahau; ‘Oku ‘ikai ke mahino ‘a hono faka-Hepeluú. ‘Oku ngali tonu hono hiki ‘o: Ke malaki kinautolu, ‘o hangē o ha musie ‘i ha loto halá.
8Ke ne hangē ha sineili ‘oku maha hono huhu‘a ‘i he tafe hono hala:
Ke hangē ko e tamatō ‘a ha fefine;
Ke hangē ko ha kakai kuo te‘eki sio ki he la‘ā.
9Te‘eki ongo‘i ‘e ho‘omou ngaahi kulo ‘a e ‘akau fefie talatala,
Pe mata, pe mōmoa, kuo vilingia leva.#58.9 ‘Oku ‘ikai ke mahino ‘a e faka-Hepelū ‘o e vēsí ni.
10Toki fiefia ‘a e mā‘oni‘oni he kuo ne mātā ‘a e sauni:
Te ne unu hono va‘e ‘i he toto ‘o e kakai kovi.
11Ko ia, ‘e lau ‘e he kakai, “Tā ‘oku ai ha totongi ‘a e mā‘oni‘oni:
Tā ‘oku ai ha ‘Otua ‘oku fai fakamaau ‘i māmani.”
Currently Selected:
KO E SAAME 58: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
