KO E SAAME 45
45
Ko e Hiva Ta‘ane
(Ki he Pule ‘o e Hiva. Ki he fasi ko Koni Lile. Ko e me‘a ‘a ha‘a Kola. Ko e Himi fakaako. Ko e Hiva Lau-‘ofa.)
1‘OKU kukuta hoku loto ke mahua–
Tala atu ko e me‘a ‘oku sai–
Ko eni Kuo u lea,
Ko ‘eku ta‘anga ‘oku kau ki he tu‘i:
Ko hoku ‘elelo ko e peni tofu pē ‘a e tangata poto ‘i he tohi.
2‘Oku faka‘ofo‘ofa ange ‘i he hako ‘o e tangata si‘o ngaohi;
Ko si‘o loungutu ‘oku vailolo‘i:
Tā ‘oku ta‘engata ho monū‘ia meia ‘Elohimi.
3Si‘i helo, no‘o tenga ho‘o heletā,
Ho lāngilangi mo fakangeingei na;
4Pea ‘i ho fakangeingei ke ‘asi atu ho‘o heka na,
Ke taukapo‘i ‘a e mo‘oni mo e totonu ‘oku ta‘omia:#45.4 mo e… ta‘omia; Ko hono faka-Hepeluú ia, ka ‘oku ngali tonu ange ‘a hono hiki ‘o: mo e totonu.
Ka ke ‘ilo mei ho to‘omata‘u ‘a e me‘a fakailifia.
5Ko ho‘o ngaahi ngahau ‘oku māsila–
Tō ‘ani kakai, ‘o ke moe‘ia–
‘Oku nau ‘asi ‘i he mafu ‘o e ngaahi fili ‘o e ‘afiona.
6Ko ho taloni, ‘e ‘Otua,#45.6 Ko ho taloní (pule‘angá), ‘e ‘Otua; pe Ko e pule‘anga na‘e ‘oatu mo‘ou ‘e he ‘Otuá; pe Ko ho pule‘anga faka‘otuá. #Hep 1.8-9
‘Oku lauikuonga pea ta‘engata:
Ko e sēpita ‘o faitotonu ko ha sēpita ia ‘a ho pule‘anga.
7‘Oku ke manako ki he totonu, pea ‘oku ke fehi‘a ki he hala;
Ko ia ai, ko e ‘Otua, ‘io, ko ho ‘Otua,
Kuo ne pani ‘aki koe ‘a e lolo ‘o e fiefia,
‘O lahi hake ‘i ho ngaahi kaume‘a.
8Ko ho kofu kotoa pē ko e koto mula mo ‘alosi mo kāsia;
‘Oku fakafiefia‘i ‘eni me‘a hiva mei he ngaahi palasi lei na.
9Koni ‘ōfefine ‘oni tu‘i ‘oku ‘i ho kau ‘ofa‘anga:
Ko e ma‘itaki ē ‘oku tu‘u mai ‘i ho to‘omata‘u kuo kofu ‘aki ‘a e koula mei ‘Ōfela.
10Fanongo mai, nga‘ata, ‘o vakai;
‘Io, ke ke fokotu‘u telinga mai,
Pea ke ngalo ‘iate koe ho kakai,
‘Io, mo e ‘api ‘o ho‘o tamai;
11Kae manako ‘a e tu‘i ‘i ho hōihoifua:
He ko ho ‘eiki ia; pea te ke hū kiate ia.
12Pea na‘a mo e ta‘ahine
Taia te ne ha‘u mo e me‘a‘ofa;
‘Io, ko e kakai koloa‘ia taha te nau ngāue ke momole ho fofonga.
13Ko e koto lāngilangi ‘a e ‘ōfefine ‘o e tu‘i, ‘o fai ki loto,#45.13 ‘o fai ki loto; ‘Oku toe hiki: ‘i hono ‘ave ki loto.
He lalanga hono kofu ‘aki ‘a e koula filo.
‘E fola ha fala faka‘ingo‘ingo
‘I hono ‘ave ki he ‘afio:
14Ko e kau ta‘ahine ‘oku muimui atu ko hono takanga,
Ko e ‘omi ai pē ki he ‘afiona.
15‘E taki atu kinautolu mo e fu‘u fiefia mo e mavava:
Te nau hū ki he palasi ‘o e ‘afiona.
16‘E fetongi ho‘o ngaahi tamai ‘e ho ngaahi foha,
Te ke fakanofo kinautolu ko e hou‘eiki ‘i he ngaahi feitu‘u kotoa.
17Ka u ‘ai ke manatua ho huafa
‘I he to‘utangata mo e to‘utangata:
Ko ia ai, ‘e tuku ho kolōlia ‘e he ngaahi fa‘ahinga,
‘O lauikuonga pea ta‘engata.
Currently Selected:
KO E SAAME 45: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
