KO E SAAME 44
44
Ko e lotu Kole Malu‘i
(Ki he Pule ‘o e Hiva. Ko e me‘a ‘a Ha‘a Kola, Ko e Hiva-ako.)
1‘E ‘OTUA, kuo ongo ki homau telinga,
Kuo ‘a‘au mai ‘e homau tupu‘anga,
‘A e ngāue na‘a ke feia ‘i honau kuonga,
‘I he ngaahi taimi fuoloa.
2‘A e ‘Afiona, ko ho nima ‘ou na‘e hu‘ihu‘i ‘ani pule‘anga,
Kae fakalanga mai ‘a e tō ‘a kinautolu na;
Na‘a ke laiki ‘ani fa‘ahinga, ka ke ‘ai kinautolu ke mafola.
3He tala‘ehai ko ‘enau heletā na‘a nau ma‘u ai ‘a e fonua,
Pe ko honau nima na‘a nau lava ai ke ikuna:
Ka ko ho nima to‘omata‘u ia, mo ho mālohi, mo e maama ‘a ho fofonga,
Koe‘uhi na‘e toka kiate kinautolu ho‘o ‘ofa.
4Ko koe ia hoku tu‘i, ‘e ‘Otua:
Ke ke tu‘utu‘uni ma‘a Sēkope ha ngaahi ikuna.#44.4 ‘e ‘Otua; ikuna; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: ‘e ‘Otua: ‘okú ke tu‘utu‘uni ma‘a Sēkope ha ngaahi ikuna.
5Ko e ‘Afiona te mau tui‘i ai homau ngaahi fili:
Ko ho huafa te mau malaki ai kinautolu ‘oku tu‘u mai.
6He tala‘ehai ‘oku ou falala ki he‘eku kaufana,
Pea ‘e ‘ikai te u ikuna ko ‘eku heletā.
7Ka kuo ke ‘omi ke mau ikuna homau ngaahi fili,
Pea kuo ke fakamaa‘i kinautolu ‘oku fehi‘a mai.
8Ko ‘Elohimi kuo mau pōlepole ai ‘i he ‘aho kotoa,
Pea ko ho huafa te mau fakafeta‘i ki ai ‘o ta‘engata. (Sila)
9Ka kuo ke tekaki kimautolu, ‘o tuku ke mau mā;
Pea ‘oku ‘ikai te ke hā‘ele mo homau ngaahi vāhenga.
10‘Oku ke fakasītu‘a‘i kimautolu ki he fili:
Pea ‘oku vete noa kimautolu ‘e he fa‘ahinga ‘oku fehi‘a mai.
11Kuo ke tuku ke mau hangē ko ha fanga sipi ‘oku me‘akai ‘aki;
Pea kuo ke tufaki kimautolu ki he ngaahi kakai.
12‘Oku ke fakatau ho kakai ki ha momo‘i totongi,
Pea tala‘ehai ‘oku ke mo‘umo‘ua ‘i he me‘a ‘oku ‘omi.#44.12 tala‘ehai… ‘omí pe ‘o hangē ‘oku ‘ikai hanau mahu‘ingá.
13‘Oku ke tu‘utu‘uni kimautolu ko e mā‘anga ‘o e nofo fonua ni,
Ko e luma–mo-va‘inga‘anga ‘o e fonua takatakai.
14‘Oku ke tuku kinautolu ko e taungalea‘anga ‘o e ngaahi pule‘anga,
Ko e me‘a ke kalo ‘ulu ai ‘ani fa‘ahinga.
15‘Oku fe‘ao mo au ‘eku fo‘i ‘i he ‘aho kotoa,
Pea ‘oku pulonga mai ‘a e mā hoku mata.
16Ko e ongo mai ‘a e lea ‘a e manuki mo e talakā,
Ko e hanga mai ‘a e fili mo e lama.
17Ko e hoko mai ‘a e me‘a ni kotoa
Ka tala‘ehai na‘a mau fakangalo‘i ‘a e ‘Afiona,
Pe ne mau kākaa‘i ho‘o fuakava.
18Ko homau loto na‘e ‘ikai sītu‘a,
Pea ko ‘emau laka na‘e ‘ikai afe mei ho ‘alunga;
19‘A ē ā kuo ke laiki kimautolu ‘i he potu ‘o e siakali,
Pea ko e ‘ata ‘o e mate kuo ke ‘ufi‘ufi ‘aki.
20Ka ne mau fakangalo‘i ‘a e huafa ‘o e ‘Otua ‘omautolu,
Mo mafao homau nima ki ha ‘otua fo‘ou.
21‘Ikai ‘e hakule ia ‘e ‘Elohimi?
He ‘oku ne ‘afio‘i ‘a e me‘a ‘oku tukuloto‘i.
22He ko e me‘a ‘i he ‘Afiona ‘oku fai ‘i he ‘aho kotoa homau have‘i,#Lom 8.36
‘Oku lau kimautolu ko e fanga sipi pē ke tāmate‘i.
23Ofo! Ko e hā ‘oku ke mohe ai, ‘e ‘Ātonai?
Me‘a hake, ‘oua na‘a fai ‘o ta‘engata ho‘o li‘aki.
24Ko e hā ‘oku hanga kehe ai ‘a e ‘Afiona?
Ko e hā ‘oku mangalo ai homau ngaohikovi‘i mo fakamo‘ulaloa?
25Pea ‘oku mapelu ki he efu homau laumālie:
‘Oku piki ki he kelekele homau kete.
26Tu‘u koe mo homau tu‘otu‘a,
Pea huhu‘i kimautolu koe‘uhi ko ho‘o ‘ofa.
Currently Selected:
KO E SAAME 44: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
