KO E SAAME 42
42
KO E HONO UA ‘O E PUKá
(Saame 42–72)
(Ki he Pule ‘o e Hiva. Ko e Hiva-ako ‘a Ha‘a Kola.)
Ko e Vivili ‘a e Fie Feohi mo e ‘Otuá
1HANGĒ ha tia ‘oku holi ki ha tafenga ‘oku vai,
Pehē ‘a e holi ‘a hoku laumālie ki he ‘Afiona, ‘Elohimi.
2‘Oku fie inu hoku laumālie kia ‘Elohimi,
Ki ha ‘Otua mo‘ui:
‘Afē te u hoko atu, ‘o hā ‘i he ‘ao ‘o ‘Elohimi?
3‘Aho mo e pō ‘oku ou me‘akai ‘aki hoku lo‘imata,
Ko e ‘osi ‘a e ‘aho mo ‘enau lau mai, “Koma‘ā ho ‘Otua?”
4Ka u manatu mu‘a ‘a e ngaahi me‘a ni,
‘O u lilingi ‘e au kiate au ‘a e me‘a ‘oku ou loto‘aki–
He‘eku laka atu ‘i he pupunga kakai,
He‘eku tepitepi tāimu‘a ki he fale ‘o ‘Elohimi,
‘A e hiki mavava mo e fakafeta‘i,
He fai kātoanga ‘a e fu‘u kakai.
5‘E hoku laumālie, ko e hā ‘oku ke fie mapelu ai?
Pea ko ho‘o lilingi mai ho‘o hoha‘a koe‘uma‘aki?
Tatali koe kia ‘Elohimi:
He kuo pau ke hoko hano taimi
Te u fai ‘eku fakafeta‘i kiate ia,
Ko hoku fakahangahake mo hoku ‘Otua.
6‘E hoku ‘Otua, ‘oku mapelu hoku laumālie, ‘o mōia mai:
Ko ia ‘oku ou manatua koe mei he fonua ‘o Soatani,
‘Io, mei ongo Heamoni na, mei he mo‘unga ko Ki‘i-me‘a.
7Ko e longoa‘a ‘o ho ngaahi vaitō
‘Oku hangē ko e fetāliaki ha ongo loloto:
Kuo laka kotoa ‘i hoku ‘ulu
Ho ngaahi fasi mo e ngalu.
8Ka ‘i he ‘aho ‘e fekau mai ‘e Sihova
‘Ene ‘ofa faka‘atu‘i, pea ‘e ‘iate au ‘ene hiva po‘uli,
Ko e lotu ki he ‘Otua ‘o ‘eku mo‘ui.
9Te u pehē kia ‘Ela ko ‘eku makatu‘u,
Ko e hā kuo ke fakangalongalo‘i ai au?
Ko e hā ‘oku ou ‘alu ai hangē ha tēngihia,
Koe‘uhi ko e fakamālohi ‘a e fili na?
10‘Oku hangē ha laiki hoku ngaahi hui.
‘A e fai ‘e hoku ngaahi fili ‘a hoku paetaku‘i;
Kuo ‘osi ‘a e ‘aho mo e lau mai ‘a kinautolu na, “Koma‘ā ho ‘Otua?”
11‘E hoku laumālie, ko e hā ‘oku ke fie mapelu ai?
Pea ko ho‘o lilingi mai ho‘o hoha‘a koe‘uma‘aki?
Tatali koe kia ‘Elohimi:
He kuo pau ke hoko hano taimi
Te u fai ‘eku fakafeta‘i kiate ia,
Ko hoku fakahangahake mo hoku ‘Otua.
Currently Selected:
KO E SAAME 42: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
