KO E SAAME 40
40
Ko e Lotu Kole Tokoni
(Ki he Pule ‘o e Hiva. Ko e Saame ‘a Tēvita.)
1NA‘A KU tatali fietatali kia Sihova;
Pea ne me‘a mai, ‘o ongona ‘eku tautapa.
2Pea ne ‘ohake au mei he lepa ‘u‘ulu,
Mei he kele pela;
‘O ne ‘ai hoku va‘e ki ha makatu‘u,
Mo ‘ai ke ma‘u ‘eku laka.
3Pea kuo ne ‘ai ki hoku ngutu ha hiva fo‘ou,
Ko e fakamālō ki he ‘Otua ‘otautolu:
‘E sio ki ai ha tokolahi, ‘o nau ‘apasia,
Pea ‘e tu‘u ‘enau falala kia Sihova.
4Monū‘ia ā ka ko e tangata,
Kuo tu‘u ‘ia Sihova ‘ene falala,
‘O ‘ikai ke hanga ki he kau fakamofutofuta,
Pe ki he fa‘ahinga ‘oku tafoki kākā.
5‘E Sihova ko hoku ‘Otua,
Kuo ke fakalahi ho‘o ngaahi ngāue mana,
Mo ho‘o ngaahi fakakaukau ma‘a homau fa‘ahinga:
‘Oku ‘ikai lava hono fa‘u hokohoko atu;
Ka ne u fie fakahā mo ‘a‘au
‘Oku nau hulu ‘i he‘eku mafai ke lau.
6Ko e tāmate manu mo e me‘a‘ofa,#Hep 10.5-7
‘Oku ‘ikai te ke manakoa–
Kuo ke foa telinga mo‘oku–
Ko e feilaulau-mōifua mo angahala,
‘Oku ‘ikai te ke tala ke ‘atu.
7Pea u toki pehē, “Ko au eni Kuo u ha‘u–”
‘I he takainga tohi kuo tohi mo‘o ku–
8“‘E hoku ‘Otua, ‘oku ou manako
Ke u fai ho‘ou finangalo;
Pea ‘oku ‘i hoku loto fatu ho‘o lao.
9Kuo u ongoongolelei mai ki he fakataha lahi ‘a e mā‘oni‘oni.”
Seuke, ko hoku ngutu ē ‘e ‘ikai te u ta‘ofi,
‘E Sihova, ‘oku ke ‘afio‘i.
10Kuo ‘ikai te u fufū ‘i hoku loto ho‘o faitotonu;
Ko ho‘o fai mo‘oni mo ho‘o fakamo‘ui Kuo u ‘a‘au:
Na‘e ‘ikai te u fakapuli mei he fu‘u fakataha
‘a e ‘ofa mo e mo‘oni ‘a e ‘Afiona.
11Tala‘ehai te ke ta‘ofi, ‘e Sihova,
Ho‘o faka‘atu‘i kita:
‘Ofa ke malu‘i ai pē kita
‘a e ‘ofa mo e mo‘oni ‘a e ‘Afiona.
12He ‘oku kāpui au ‘e he ngaahi kovi ‘oku ‘ikai lava hono lau,
‘Oku loki au ‘e he‘eku ngaahi hia, ‘o ‘ikai te u masio atu;
‘Oku hulu ‘i hoku tu‘oni lou‘ulu hono lau,
Pea kuo mole hoku loto ‘iate au.
13Fai ho tau, ‘Eiki, ‘o hamusi kita:
‘Eiki, vave mai ke tokonia.
14Ke nau mā mo kula fakataha,
‘A kinautolu ‘oku kumi ‘eku mo‘ui ke faka‘auha:
Ke nau hola vale ‘o ongoongokovi,
‘A ha‘a fiefia ‘i he‘eku tu‘utāmaki.
15Ko e ‘ātunga ‘o ‘enau mā ke nau mo‘utāfu‘ua
‘A kinautolu ‘oku pehē mai, “Ma‘ito‘a! Ma‘ito‘a!”
16Ke fiefia ‘i he ‘Afiona mo hākailangitau
‘A ia fua pē ‘oku vivili atu:
Ke lavaki lau ‘a e kau ‘ofa ki ho‘o fakamo‘ui na,
“‘Ē, ke hākeaki‘i ‘a e ‘Afiona.”
17Ko au eni ko e fāiekina mo tu‘utāmaki;
Ka ‘oku tukulotoa au ‘e ‘Ātonai:
Ko hoku tokoni mo huhu‘i ‘a e ‘Afiona;
‘E hoku ‘Otua, ‘oua te ke fakatotoka.
Currently Selected:
KO E SAAME 40: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
