KO E SAAME 145
145
Ko e Himi Fakahīkihiki‘i ‘o e ‘Otuá
1TEU fakahīkihiki‘i koe, ‘a hoku Tu‘i-‘Otua;
Pea te u fakamālō‘ia ho huafa, ‘o lauikuonga pea ta‘engata.
2Ko e ‘aho kotoa pē te u fakamālō‘ia ‘a e ‘Afiona;
Pea te u fakalāngilangi‘i ho huafa,
‘O lauikuonga pea ta‘engata.
3‘Oku lahi ‘a Sihova,
Pea fungani hono fakamālooa;
Pea ko hono lahi ‘oku ta‘emahakulea.
4‘E kaila‘aki ‘e he to‘utangata ki he to‘utangata ho‘o ngaahi ngāue na,
Pea ko ho‘o fa‘a fai fakangeingei te nau fakahā.
5Te u fakalaulauloto ki he ngāue fakaofo ‘a‘au,
‘A e fakangeingei ‘o e lāngilangi ‘o ho‘o fotu.
6Pea ‘e talanoa ‘e he kakai ‘a e ha‘aha‘a ‘o ho‘o ngaahi me‘a fakailifia;
Pea ko ho‘o ngaahi me‘a lalahi ko au te u fakalāutelau.
7Ko e fakamanatu ho‘o fu‘u lelei te nau pu‘aki,
Pea ko ho‘o faitotonu te nau kalanga‘aki.
8‘Oku angalelei mo ‘alo‘ofa ‘a e ‘Eiki,
Tuai ki he houhau, pea lahi ‘ene meesi.
9‘Oku lelei ‘a Sihova ki he me‘a kotoa pē;
Pea ko ‘ene fai faka‘atu‘i ‘oku lave ki he‘ene ngāue fuli pē.
10‘Oku fai ho fakamālō, ‘Eiki, ‘e ho‘o ngaahi ngāue kotoa;
Pea ko ho‘o kau lotu ‘oku nau fakafeta‘ia ‘a e ‘Afiona.
11‘Oku nau talanoa ki he lāngilangi ‘o ho pule‘anga,
Mo nau ‘a‘au ho fakangeingei na.
12“Ke faka‘ilo ‘ene fai fakangeingei ki he hako‘i tangata,
Mo e nāunau ‘o e teunga ‘o hono pule‘anga.”
13Ko ho pule‘anga ko e pule‘anga ‘o e ngaahi kuonga kotoa,
Pea ko ho hau ‘oku fai mei he to‘utangata ki he to‘utangata.
14‘Oku poupou ‘e Sihova ‘a e kau hinga kātoa pē,
Pea ko kinautolu ‘oku mapelu ki lalo ‘oku ne pukepuke hake.
15Ko e mata ‘o e me‘a fuli pē ‘oku hanga ki he ‘Afiona:
Pea ‘oku ke ‘ange ha‘anau me‘akai ‘i hono kuonga.
16‘Oku ke folahi ho nima,
Pea ke fakamākona ‘a e holi ‘a e me‘a mo‘ui kotoa.
17Ko e faitotonu ‘a Sihova ‘i hono ‘alunga kotoa,
Pea ‘i he‘ene ngāue kotoa pē ‘oku ne fai ‘ofa.
18‘Oku ofi leva ‘a Sihova ki he kakai kotoa
‘Oku tautapa kiate ia;
‘A kinautolu ‘oku fai mo‘oni ‘enau tautapa.
19Ko e holi ‘a e kakai ‘oku ‘apasia kiate ia ‘oku ne fakaai;
Pea ‘oku ongo kiate ia ‘enau kaila, ‘o ne fakamo‘ui.
20‘Oku tauhi ‘e Sihova ‘a e kakai ‘oku ‘ofa kiate ia:
Ka ko e kau angahala te ne faka‘auha.
21‘E fai ‘e hoku ngutu ‘a e fakalāngilangi‘i ‘o Sihova;
Pea ke fakamālō‘ia ‘e he kakano kotoa hono huafa tāpuhā,
‘O lauikuonga ‘o ta‘engata.
Currently Selected:
KO E SAAME 145: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
