Filimoné 1
1
1TŪ ko kimaua–‘a Paula ko ha nofo pilīsone ‘a Sīsū Kalaisi, pea mo si‘i kāinga ko Tīmote–ko ‘ema tohi kia Filimone ko homa ‘ofa‘anga, mo e kaungā ngāue ‘omaua.
2Pea kia ‘Afia, ko si‘oma sisitā, pea kia ‘Ākipo, ko homa hoa tau, pea ki he siasi ‘oku ‘i ho ‘api.#Kol 4.17
3‘Ofa ke mou ma‘u kelesi mo e fiemālie mei he ‘Otua ko ‘etau Tamai mo e ‘Eiki ko Sīsū Kalaisi.
Ko e ‘ofa mo e Tui ‘a Filimoné
4‘Oku ou fakafeta‘i ma‘u ai pē ki hoku ‘Otua, ‘o u takua koe ‘i he‘eku ngaahi lotu; 5he‘eku fanongo ki ho‘o fai ‘ofa mo e tui ki he ‘Eiki ko Sīsū, pea mo e kau lotu kotoa pē: 6koe‘uhi ke ngāue mālohi ho‘o feohi fakalotu, ‘o taka ‘i he ‘ilo kānokano ‘o e me‘a lelei kehekehe ‘oku ‘iate kitautolu, ‘o hu‘u kia Kalaisi. 7He kuo lahi ‘eku fiefia mo ‘eku fiemālie ‘i ho‘o ‘ofa, koe‘uhi ‘oku nonga ‘a e loto ‘o e kāinga lotu ‘i ho‘o ngāue, ‘alā.
Ko e Kole ‘a Paula ‘o Felāve‘i mo ‘Onisema
8Ko ia, neongo te u lava noa pē ‘ia Kalaisi ke tu‘utu‘uni ke ke fai ‘a e me‘a ‘oku totonu, ka ‘oku ou fie fai ko e kole pē, ‘o tu‘unga ‘i he ‘ofa. 9Pea ‘i hoto anga ko ia, ‘a kita Paula, ko e motu‘a, pea ‘i he taimi ni ko e nofo pilīsone foki ‘a Sīsū Kalaisi, 10‘oku te kole atu koe‘uhi ko si‘oku foha, ‘a ia kuo u ma‘u ‘i hoku ha‘isia, ‘io, ‘a ‘Onesema:#Kol 4.9 11‘a ia na‘e ‘ikai ‘aonga kiate koe ‘i mu‘a, ka ‘i he taimi ni ‘oku ‘aonga kiate koe mo au, ‘a ia kuo u fakafoki atu.
12Ko e tangata ko ia, ‘a ia ‘oku tatau mo ha kakano ‘o hoku manava– 13‘ē, na‘a ku mei loto ke ta‘ofi ia mo‘oku, koe‘uhi ke ne fetongi koe ‘i hoku tauhi, lolotonga ‘oku ou mo‘u ha‘isia koe‘uhi ko e Kōsipeli. 14Ka na‘e ‘ikai te u fie fai ha me‘a ta‘e te te ma‘u ha‘o poa, na‘a hā ho‘o ‘ofa, ‘o hangē ha fakakoloto, ‘o ‘ikai ko e fai loto lelei.
15He na‘a ko hono ‘uhinga ia ‘o ho‘omo māvae fo‘i houa pē, koe‘uhi ke ke ma‘u mo‘ou ‘o ta‘engata; 16‘o ‘ikai kei hangē ko ha pōpula, kae makehe mo ha pōpula, ‘io, ko ha tokoua ‘ofeina–‘oku ne mātu‘aki pehē kiate au, kae huanoa ha‘ane pehē kiate koe; he ‘oku ‘o‘ou ia ‘i he sino pea ‘i he lotu fakatou‘osi.
17Ko ia, kapau ‘oku ke lau au ko ho kaume‘a, pea ke tali ‘a e tangata ko ia ‘o hangē ko au. 18Ka ‘o kapau na‘a ne ngāue ta‘etotonu kiate koe ‘i ha me‘a, pe ‘oku ne mo‘ua, tohi ia kiate au. 19Ko au Paula, ‘oku ou tohi ‘aki hoku nima ‘o‘oku, te u totongi ia ‘e au (tuku kehe ho mo‘ua kiate au, ‘a ia foki ko ho kotoa). 20‘Io, nga‘ata, taumaiā ke ke ‘aonga foki kiate au ‘i he ‘Eiki: fakafiemālie hoku loto ‘ia Kalaisi.
21Kuo u tohi atu ‘i he‘eku falala te ke talangofua mai, he‘eku ‘ilo ‘e hulu atu ho‘o fai ‘i he me‘a kuo u tala. 22Kae‘uma‘ā foki, ke ke teuteu ha loki mo‘oku; he ‘oku te ‘amanaki ‘e tali ho‘omou ngaahi lotu, pea ‘e tuku atu au kiate kimoutolu.
Ko e pōpoaki Faka‘osi
23‘Oku ‘ofa atu ‘a ‘Epafasi, ‘a ia ‘oku nofo pilīsone mo au ‘ia Kalaisi Sīsū:#Kol 1.7; 4.12 24mo si‘oku kaungā ngāue ko Ma‘ake, mo ‘Alisitako, mo Tīmasi mo Luke.#Ngā 12.12; 13.13; 15.37-39; 19.29; 27.2; Kol 4.10,14; 2 Tīm 4.10,11
25Ko e kelesi ‘a hotau ‘Eiki ko Sīsū Kalaisi, ‘ofa ke ‘i homou laumālie ia.
Currently Selected:
Filimoné 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
