NŌMIPA 36
36
Ko e Koloa Tuku ma‘á e Kakai Fefine Mali
1PEA na‘e fe‘unu‘i mai ‘a e hou‘eiki ‘ulumotu‘a ‘i he fāmili ‘o ha‘a Kiliati, foha ‘o Mākili, ko e hoko ‘o Manase, ko e taha ‘i he ngaahi fāmili ‘o ha‘a Siosifa, pea nau lea ‘i he ‘ao ‘o Mōsese, pea ‘i he ‘ao ‘o e hou‘eiki ‘ulumotu‘a ‘o ha‘a ‘Isileli: 2pea nau pehē, Na‘e fekau ‘a e Feitu‘u na ‘e Sihova ke tufa talotalo ‘a e fonua ke tofi‘a ‘aki ‘e ha‘a ‘Isileli, pea na‘e tu‘utu‘uni ‘a e Feitu‘u na ‘e Sihova ke tuku ‘a e tofi‘a ‘o Silofehati ko homau tokoua ki he‘ene fānau fefine.#Nōm 27.7 3Pea ka nau ka mali mo e hako ‘o ha matakali kehe ‘o ha‘a ‘Isileli, pea ‘e ‘ave honau tofi‘a mei he tofi‘a ‘o homau tupu‘anga, ‘o fakalahi ‘aki ‘a e tofi‘a ‘o e matakali te nau kau ki ai, pea ‘e mole ia mei homau tofi‘a kuo tō. 4Pea ka hoko ‘a e siupeli ki ha‘a ‘Isileli, pea ‘e toki fakahoko honau tofi‘a ki he tofi‘a ‘o e matakali ko ia te nau kau ki ai: pea ‘e mole honau tofi‘a mei he tofi‘a ‘o e matakali ‘o homau tupu‘anga.
5Pea tu‘utu‘uni ‘e Mōsese ‘a ha‘a ‘Isileli ‘i he fekau ‘a Sihova, ‘o pehē, ‘Oku mo‘oni pē ‘a e lau ‘a e matakali ‘o ha‘a Siosifa. 6Ko eni pē ‘a e me‘a kuo tu‘utu‘uni ‘e Sihova ki he fānau fefine ‘a Silofehati, Ke nau fa‘iteliha pē ha taha te nau mali, ka te nau mali pē ki ha fāmili ‘i he matakali ‘o honau tupu‘anga. 7Pea ‘e ‘ikai hiki ha tofi‘a ‘o ha‘a ‘Isileli mei he matakali ki he matakali: kae piki ‘e ha‘a ‘Isileli takitaha ki he tofi‘a ‘o e matakali ‘o hono tupu‘anga. 8Pea ‘ilonga ha fefine ‘oku ma‘u tofi‘a ‘i ha matakali ‘o ha‘a ‘Isileli, te ne nonofo mo ha taha ‘i ha fāmili ‘o e matakali ‘o hono tupu‘anga, koe‘uhi ke ma‘u ‘e ha‘a ‘Isileli takitaha ‘a e tofi‘a ‘o hono tupu‘anga. 9Ko ia, ‘e ‘ikai hiki ha tofi‘a mei ha matakali ki ha matakali, kae piki ‘e he ngaahi matakali ‘o ha‘a ‘Isileli takitaha ki hono tofi‘a.
10Hangē ko e tu‘utu‘uni ‘e Sihova kia Mōsese, na‘e pehē ‘a e fai ‘e he ngaahi ‘ōfefine ‘o Silofehati; 11he ko Māhala, Tīlisa, mo Hōkela, mo Milika, mo Noa, ko e ngaahi ‘ōfefine ‘o Silolehati, na‘a nau mali mo e ngaahi foha ‘o e ngaahi tokoua ‘o ‘enau tamai. 12Na‘a nau mali ki he ngaahi fāmili ‘o ha‘a Manase, foha ‘o Siosifa, pea na‘e kau honau tofi‘a ki he matakali ‘oku ‘i ai ‘a e fāmili ‘o ‘enau tamai.
13Ko e ngaahi fekau ia mo e ngaahi kupu‘i konisitūtone ‘a ia na‘e tu‘utu‘uni ‘e Sihova ki ha‘a ‘Isileli, ‘o fakafai ‘ia Mōsese ‘i ‘Alapā-Moape ‘i he ve‘e Soatani-Sielikō.
Currently Selected:
NŌMIPA 36: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
