NŌMIPA 35
35
Ko e ngaahi Kolo na‘e ‘Oange Mo‘ó e Kau Līvaí
1PEA folofola ‘a Sihova kia Mōsese ‘i ‘Alapā-Moape ‘i ve‘e Soatani-Sielikō, ‘o pehē, 2Fekau ‘a ha‘a ‘Isileli ke nau foaki ki he kau Līvai mei honau tofi‘a ‘e tō ha ngaahi kolo ke nau nofo ai; pea te mou foaki foki ki he kau Līvai ha ngaahi ‘api takatakai ki honau ngaahi kolo. 3Pea ko e ngaahi kolo te nau ma‘u ke nofo ai, pea ko e ngaahi ‘api te nau ma‘u ki he‘enau fanga manu lalahi, pea ki he‘enau koloa, ‘io, ‘a ‘enau monumanu kotoa. 4Pea ko e lahi ‘o e ‘api tu‘a kolo te mou ‘atu ki he kau Līvai ‘e mole mei he ‘ā ‘o e kolo ko e kiupite ‘e taha afe takatakai. 5Pea te mou fua ‘i tua‘ā ki hono tapa hahake ‘a e kiupite ‘e ua afe, pea ki hono tapa tonga ko e kiupite ‘e ua afe, pea ki hono tapa lulunga ko e kiupite ‘e ua afe, pea ki hono tapa tokelau ko e kiupite ‘e ua afe: kae tu‘u loto ‘a e kolo. Ko honau ngaahi ‘api tu‘a kolo ia. 6Pea ko e ngaahi kolo te nau ‘atu ki he kau Līvai–ko e ono‘i kolo hūfanga, ‘a ia te mou tuku ke hola ki ai ‘a e fakapō, pea te mou fakalahi ‘aki ha kolo ‘e fāngofulu mā ua kehe. 7Ko e lau kātoa ‘o e ngaahi kolo te mou ‘atu ki he kau Līvai ko e kolo ‘e fāngofulu mā valu: ‘a kinautolu mo honau ngaahi ‘api tu‘a kolo. 8Pea ko e me‘a ki he ngaahi kolo te mou ‘atu mei he tofi‘a ‘o ha‘a ‘Isileli, te mou ‘atu lahi mei he ma‘u lahi, pea si‘i mei he ma‘u si‘i: ‘e taki vahe mei hono ngaahi kolo ma‘a e kau Līvai, ‘o fakatatau ki hono tofi‘a kuo ne ma‘u.
Ko e ngaahi Kolo Hūfanga‘anga
(Teu 19.1-13; Sios 20.1-9)
9Pea folofola ‘a Sihova kia Mōsese, ‘o pehē, 10Lea ki ha‘a ‘Isileli, ‘o tala kiate kinautolu, Ka mou ka laka atu ‘i Soatani ki he fonua ko Kēnani, 11pea te mou vahe‘i hamou ngaahi kolo mo kolo-hūfanga, ke hola ki ai ‘a e fakapō kuo ne te‘ia ha taha ‘i he fāinoa. 12Pea ko e ngaahi kolo ko ia ko homou hūfanga mei he koeli, ke ‘oua na‘a mate ‘a e fakapō kae‘oua ke ne tu‘u ‘i he ‘ao ‘o e fakataha ke fakamaau. 13Pea ko e ngaahi kolo te mou ‘atu ko homou ono‘i kolo-hūfanga ia. 14Ko e tolu te mou ‘atu ‘i tu‘a Soatani, pea ko e kolo ‘e tolu te mou ‘atu ‘i Kēnani: ko e ngaahi kolo-hūfanga ia. 15Ko e ono‘i kolo ko ē ko e hūfanga ia ma‘a ha‘a ‘Isileli, mo e muli, mo ia ‘oku ‘āunofo ‘iate kinautolu, ke hola ki ai, ‘a ia kuo ne te‘ia ha taha ‘i he fāinoa.
16Ka ‘o kapau na‘a ne taa‘i ia ‘aki ha me‘a ukamea, ‘o ne pekia, ko e fakapō ia: ‘e mātu‘aki tāmate‘i ‘a e fakapō. 17Pea kapau na‘a ne taa‘i ia ‘aki ha maka ‘oku ne to‘o, ka ko e me‘a ‘oku ngali mate ai ha taha, pea ne pekia, ko e fakapō ia: ‘e mātu‘aki tāmate‘i ‘a e fakapō. 18Pea kapau na‘a ne taa‘i ia ‘aki ha ‘akau ‘oku ne to‘o, ‘a ia ko e me‘a ‘e ngali mate ai ha taha, pea ne pekia, ko e fakapō ia: ‘e mate tāmate‘i ‘a e fakapō. 19‘E tāmate‘i ‘a e fakapō ‘e he koeli tongitoto: ka ne ka fetaulaki mo ia te ne tāmate‘i.
20Pea kapau na‘a ne fehi‘a ki ai, ‘o ne velo‘i, pe toitoi ‘o lisingi, ‘o ne pekia; 21pe na‘a ne fili ‘aki ia, ‘o ne tuki‘i, ‘o ne pekia: ‘e mate tāmate‘i ‘a ia na‘a ne fai ‘a e tā; ko e fakapō ia: ko e koeli tongitoto te ne tāmate‘i ‘a e fakapō ‘oka ne ka fetaulaki mo ia.
22Ka ‘o kapau na‘a ne velo‘i ia fakafokifā, ta‘e te ne fili ‘aki ia; pe na‘a ne lisingi ia ‘aki ha me‘a, ka na‘e ‘ikai te ne toitoi ki ai; 23pe na‘a ne fai‘aki ha maka ‘e ngali mate ai ha taha, ka na‘e ‘ikai te ne sio kiate ia, ka ne lī pē ‘o tau kiate ia, ‘o ne pekia; ka na‘e ‘ikai ko hono fili ia, pea na‘e ‘ikai te ne feinga ke fai ha kovi ki ai; 24pea ‘e toki fakamaau ‘e he fakataha ‘i he vaha‘a ‘o ia na‘a ne tā pea mo e koeli tongitoto, ‘o fakatatau ki he ngaahi kupu‘i konisitūtone ko eni: 25pea ‘e fakahaofi ‘e he fakataha ‘a e fakapō mei he nima ‘o e koeli tongitoto, pea te nau fakafoki ia ki hono kolo-hūfanga ‘a ia ne ne hola ki ai, pea te ne nofo ai ‘o a‘u ki he pekia ‘a e taula‘eiki-lahi, ‘a ia kuo pani ‘aki ‘a e lolo tapu. 26Ka ‘o kapau ‘e momo‘i ‘alu ‘a e fakapō ki he tu‘a laine ‘o hono kolo-hūfanga, ‘a ia kuo ne hola ki ai; 27pea ma‘u ia ‘e he koeli tongitoto ‘i he tu‘a laine ‘o hono kolo-hūfanga, pea ka tāmate‘i ia ‘e koeli tongitoto; ‘e ‘ikai lau ia ko e fakapō: 28koe‘uhi na‘e totonu ke ne nofo ‘i he kolo-hūfanga ‘o a‘u ki he pekia ‘a e taula‘eiki lahi: ka hili ‘a e pekia ‘a e taula‘eiki lahi, pea ‘e toki foki ‘a e fakapō ki he fonua ‘oku tu‘u ai hono tofi‘a. 29Pea ko e ngaahi me‘a ko ia ko e tu‘utu‘uni fakakonisitūtone kiate kimoutolu ‘i homou ngaahi tangutu‘anga kotoa pē ‘o laui to‘utangata.
30‘Ilonga ‘a ia ‘oku ne te‘ia ha toko taha, ‘e tāmate‘i ‘a e fakapō ‘i he fakamo‘oni ‘a ha ni‘ihi, ka ‘e ‘ikai fakamāumatea ha taha ‘i he fakamo‘oni ‘a ha toko taha pē.#Teu 17.6; 19.15 31Pea ‘e ‘ikai te mou tali totongi ke mo‘ui ai ‘a e fakapō, ‘a ia kuo fakamāumatea, ka ‘e mātu‘aki tāmate‘i ia. 32Pea ‘e ‘ikai te mou tali totongi ma‘ana kuo hola ki hono kolo-hūfanga ke ne foki ‘o nofo ‘i hono fonua, kae‘oua pē ke pekia ‘a e taula‘eiki. 33‘O ‘oua te mou maumau ‘a e tapu ‘o e fonua ‘oku mou ‘i ai: he ko e fakapō ‘oku ne maumau‘i ‘a e tapu ‘o e fonua: pea ‘e ‘ikai lava ha huhu‘i ‘o e fonua mei he toto kuo lilingi ai, kae ‘aki ‘a e toto pe ‘o ia na‘a ne lilingi. 34‘Io, ‘e ‘ikai te ke ‘uli‘i ‘a e kelekele ‘oku mou tangutu ai, ‘a ē ā ‘oku ou nofo fonua ai au: he ko au Sihova ‘oku ou lotolotoi ‘i ha‘a ‘Isileli.
Currently Selected:
NŌMIPA 35: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
