NŌMIPA 32
32
Ko e ngaahi Matakali mei he Faka-Hahake ‘o e Vaitafe ko Soataní
1PEA na‘e lahi ‘a e monumanu ‘a ha‘a Lūpeni mo ha‘a Kata; ko e me‘a ko ia na‘a nau mālohi ‘aupito ai. Pea na‘a nau vakai ‘a e fonua ‘o Siasea mo Kiliati, pea tā ko e toki potu ia ki he fanga manu. 2Ko ia, na‘e ha‘u ‘a ha‘a Kata mo ha‘a Lūpeni, ‘o nau lea kia Mōsese mo ‘Eliesa ko e taula‘eiki, pea ki he hou‘eiki ‘o e fakataha, ‘o pehē, 3Ko ‘Ataloti, mo Tīponi, mo Siasea, mo Nīmila, mo Hesiponi, mo ‘Eleale. 4Mo Sēpami, mo Nipo, mo Peoni, ‘a e fonua na‘e te‘ia ‘e Sihova ‘i he ‘ao ‘o e fakataha ‘o ‘Isileli, ko e fonua ia ki he fanga manu, pea ‘oku monumanu‘ia ‘a ho‘o kau tamaio‘eiki ko kimautolu. 5Pea nau pehē, Ka kuo mau ta‘imālie ‘ofa ‘i ho ‘ao, pea ke vahe ‘a e fonua ni ki ho‘o kau tamaio‘eiki ko kimautolu ke mau tofi‘a ‘aki; ‘oua ‘e ‘ave kimautolu ki tu‘a Soatani.
6Pea me‘a ‘a Mōsese ki ha‘a Kata mo ha‘a Lūpeni, ‘O ‘alu koā homou kāinga ki he tau, ka mau nofo pē ‘i heni? 7Pea koe‘uma‘ā ho‘omou fakavaivai‘i ‘a e loto ‘o ha‘a ‘Isileli, ke nau ta‘efie laka atu ai ki he fonua kuo foaki kiate kinautolu ‘e Sihova? 8Na‘e pehē ‘a e fai ‘a ho‘omou ngaahi tamai, ‘i he‘eku fekau atu kinautolu mei Kētesi-panea ke asiasi ‘a e fonua.#Nōm 13.17-33 9He ‘i he‘enau ‘alu hake ki he tele‘a ko ‘Esikoli, ‘o mamata ki he fonua, pea nau fakavaivai‘i ‘a e loto ‘o ha‘a ‘Isileli, ke ‘oua te nau ‘alu ki he fonua kuo foaki kiate kinautolu ‘e Sihova. 10Pea na‘e langa‘i ai ‘a e houhau ‘a Sihova ‘i he ‘aho ko ia, pea ne fuakava ‘o pehē,#Nōm 14.26-35 11Ko au ē ha‘anau sio ki he fonua na‘a ku fuakava ai kia ‘Epalahame mo ‘Aisake mo Sēkope, ‘e he kau tangata na‘e ‘alu hake mei ‘Isipite, meiate ia ‘oku uofulu ta‘u ‘o fai hake, koe‘uhi ā ‘oku ‘ikai te nau molomolomuiva‘e kiate au: 12ngata pē ‘ia Kēlepi ko e foha ‘o Sīfune ko e ha‘a Kēnasi, mo Siosiua ko e foha ‘o Nuni; koe‘uhi na‘a na molomolomuiva‘e kinaua ‘i he ‘Eiki. 13Pea na‘e langa‘i ai ‘a e houhau ‘a Sihova ki ‘Isileli, ‘o ne tuku ke nau he holo ‘i he Toafa ‘o fāngofulu ta‘u, kae ‘oua ke ‘osi‘osingamālie ‘a e to‘utangata ko ia na‘e fai kovi ‘i he ‘ao ‘o e ‘Eiki. 14Pea ko eni kuo mou tupu hake kimoutolu ko e fetongi ‘o ho‘omou ngaahi tamai, ko e hako‘i angahala, ke toe fakalahi ‘a e kakaha ‘o e houhau ‘o Sihova ki ‘Isileli. 15He kapau te mou foki mei he muimui kiate ia, pea te ne toe tuku kinautolu ‘i he Toafa, pea te mou faka‘auha ‘a e fu‘u kakai ni.
16Pea nau ‘unu‘unu kiate ia, ‘o nau pehē, Ka mau langa loto‘ā manu pē ‘i heni ki he‘emau monumanu, mo e ngaahi kolo ki he‘emau tamaiki; 17ka ko kimautolu te mau ‘ai mahafu ke vave, ke laka ‘i he ‘ao ‘o ha‘a ‘Isileli, kae‘oua ke mau ‘ave kinautolu ki honau feitu‘u, kae nofo ‘emau tamaiki ‘i he ngaahi kolo kuo ‘aa‘i telia ‘a e kakai ‘o e fonua. 18‘E ‘ikai te mau foki ki homau ngaahi ‘api kae‘oua ke ma‘u‘i ‘e ha‘a ‘Isileli takitaha hono tofi‘a. 19He ‘e ‘ikai te mau ma‘u tofi‘a mo kinautolu ‘i he kauvai ko ē ‘o Soatani, pe ki kō atu: he kuo tō homau tofi‘a ‘i he kauvai ‘o Soatani ki hahake.
20Pea me‘a ‘a Mōsese kiate kinautolu, Kapau te mou fai ‘a e me‘a ko ia; kapau te mou ‘ai mahafu ke ‘alu ‘i he ‘ao ‘o Sihova ki he tau, 21pea a‘a ‘i Soatani ‘a kimoutolu kotoa ‘oku to‘o mahafu ‘i he ‘ao ‘o Sihova, 22kae‘oua ke ne kapusi hono ngaahi fili mei hono ‘ao, pea fakavaivai‘i ‘a e fonua ‘i he ‘ao ‘o Sihova: pea hili ia te mou foki ka mou ta‘ehia kia Sihova mo ‘Isileli; pea ‘e hoko ‘a e fonua ni ko homou tofi‘a ‘i he ‘ao ‘o Sihova. 23Ka ‘o kapau ‘e ‘ikai te mou fai pehē, tala atu kuo mou fai angahala kia Sihova; pea ke mou ‘ilo ‘e faifai pea pō kimoutolu ‘e ho‘omou angahala. 24Mou langa kolo ma‘amoutolu ki ho‘omou tamaiki, mo e ngaahi loto‘ā manu ki ho‘omou monumanu, pea mou fai ‘a e me‘a kuo pu‘aki ‘e homou ngutu.
25Pea tali ‘e ha‘a Kata mo ha‘a Lūpeni kia Mōsese, ‘o pehē, ‘E fai ‘e ho‘o kau tamaio‘eiki ko kimautolu ‘o hangē ko e tu‘utu‘uni ‘a e Feitu‘u na. 26Ko ‘emau tamaiki, ko homau ngaahi uaifi, mo ‘emau monumanu kotoa, ‘e nofo hē ‘i he ngaahi kolo Kiliati: 27ka ko ho‘o kau tamaio‘eiki ko kimautolu te mau laka atu ‘i he ‘ao ‘o Sihova ki he tau, ‘a kimautolu kotoa ‘oku ma‘u teu ki he tau, hangē ko e me‘a ‘a e Feitu‘u na.
28Ko ia na‘e fai tu‘utu‘uni ‘iate kinautolu ‘e Mōsese, ‘o ‘atu kia ‘Eliesa ko e taula‘eiki, pea kia Siosiua ko e foha ‘o Nuni, pea ki he hou‘eiki ‘ulumotu‘a ‘o e ngaahi matakali ‘o ha‘a ‘Isileli.#Sios 1.12-15 29Pea me‘a ‘a Mōsese kiate kinautolu, Kapau ‘e a‘a ‘i Soatani mo kimoutolu ‘a ha‘a Kata mo ha‘a Lūpeni, ‘a kinautolu kotoa kuo ‘osi sāuni ki he tau, ‘i he ‘ao ‘o Sihova, pea fakavaivai ‘a e fonua ‘i homou ‘ao: pea te mou toki foaki kiate kinautolu ‘a e fonua ‘o Kiliati mo‘onau tofi‘a. 30Ka ‘o kapau ‘e ‘ikai te nau a‘a mo kimoutolu kuo ‘ai mahafu, pea te nau ma‘u tofi‘a ‘i homou lotolotonga ‘i he fonua ko Kēnani.
31Pea tali ‘a ha‘a Kata mo ha‘a Lūpeni ‘o pehē, Ko e me‘a kuo folofola‘aki mai ‘e Sihova ki ho‘o kau tamaio‘eiki ko kimautolu te mau fai. 32Te mau laka atu mo ‘emau mahafu ‘i he ‘ao ‘o Sihova ki Kēnani, ka ko homau tofi‘a ‘e tō kiate kimautolu ‘i he kauvai ko eni ‘o Soatani.
33Pea foaki ‘e Mōsese kiate kinautolu, ki ha‘a Kata, pea ki ha‘a Lūpeni, pea ki he vaeua ‘o e matakali ‘a Manase foha ‘o Siosifa, ‘a e pule‘anga ‘o Sīhoni ko e Tu‘i ‘Āmoli, pea mo e pule‘anga ‘o ‘Oki ko e Tu‘i Pēsani, ‘a e fonua, ‘io, hono ngaahi kolo na‘e tu‘u ‘i he ngaahi feitu‘u, ‘a e ngaahi kolo ‘o e fonua na‘e tu‘u takatakai ki ai. 34Pea langa ‘e ha‘a Kata ‘a Tīponi, mo ‘Ataloti, mo ‘Aloeli; 35mo ‘Ataloti-sofani, mo Siasea, mo Siokipeha; 36mo Pete-nimila, mo Pete-hālani: ko e ngaahi kolo ‘aa‘i, mo e ngaahi loto‘ā manu. 37Pea langa ‘e ha‘a Lūpeni ‘a Hesiponi mo ‘Eleale, pea mo Kiliataimi; 38pea mo Nipo, pea mo Peali-meoni (ka na‘e liliu honau hingoa), pea mo Sīpima; pea nau fakahingoa fo‘ou ‘a e ngaahi kolo na‘a nau langa.
39Pea ‘alu ‘a e hako ‘o Mākili foha ‘o Manase ki Kiliati, ‘o nau puke ia, ‘o nau kapusi ‘a e kau ‘Āmoli na‘e ‘i ai. 40Pea foaki ‘e Mōsese ‘a Kiliati kia Mākili ko e hako ‘o Manase, pea na‘a ne nofo ai. 41Pea ko Siaili ko e hako ‘o Manase na‘a ne ‘alu ‘o puke hono ngaahi kolo, pea ne fakahingoa kinautolu ko e ‘ū-vilisi-‘o Siaili. 42Pea ‘alu ‘a Nopa, ‘o puke ‘a Kēnati mo hono ngaahi kolo fakaongo, pea ne fakahingoa ia kiate ia, ko Nopa.
Currently Selected:
NŌMIPA 32: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
