NŌMIPA 31
31
Ko e Tau ‘i ‘o Mitiani
1PEA folofola ‘a Sihova kia Mōsese, ‘o pehē, 2Te ke mātu‘aki sauni ‘a ha‘a ‘Isileli ki he kau Mitiani: pea hili ia ‘e ului koe ki ho kakai.
3Pea lea ‘a Mōsese ki he kakai, ‘o pehē, Mou teuteu hamou ni‘ihi ki he tau ke nau ‘alu ‘o tau‘i ‘a Mitiani, ke feia ‘a e sauni ‘a Sihova ki Mitiani. 4Te mou fekau atu ki he tau ha toko taha afe mei he matakali takitaha ‘o ‘Isileli.
5Ko ia, na‘e vahe‘i mei he ngaahi toko afe ‘o ‘Isileli ha taha afe mei he matakali; ko e toko taha mano mā toko ua afe kuo ‘osi sāuni ki he tau. 6Pea fekau atu kinautolu ‘e Mōsese ki he tau, ‘a e taha afe mei he matakali, ‘a kinautolu mo Finiasi ko e foha ‘o ‘Eliesa taula‘eiki, ke ‘alu ki he tau; pea ne to‘o ‘a e nāunau tapu, ‘io, ‘a e ongo talupite na‘e fai‘aki ‘a e ifi faka-lali-pakola. 7Pea na‘a nau tau‘i ‘a Mitiani, ‘o hangē ko e fekau ‘a e ‘Eiki kia Mōsese; pea na‘a nau tāmate‘i ‘a e tangata kotoa pē. 8Pea ko e ngaahi tu‘i Mitiani na‘a nau tāmate‘i–taha kehe kinautolu na‘e tō–‘a ‘Evi, mo Lēkemi, mo Siuli, mo Hua, mo Lepa, ko e nima‘i tu‘i Mitiani: ko Pēlami foki ko e foha ‘o Peoli na‘a nau tāmate‘i ‘aki ‘a e heletā.
9Pea na‘e taki pōpula ‘e ha‘a ‘Isileli ‘a e kau fefine Mitiani mo ‘enau tamaiki; pea ko ‘enau monumanu mo ‘enau nga‘oto‘ota na‘a nau vete. 10Pea nau tutu ‘a e ngaahi kolo kuo nau nofo ki ai mo honau ngaahi ‘apitanga. 11Pea na‘a nau ‘ave ‘a e vete kotoa, ‘a e koloa mo e me‘a mo‘ui, pe ko e tangata, pe ko e manu. 12Pea na‘a nau ‘omi ‘a e kau pōpula mo e monumanu mo e koloa kia Mōsese mo ‘Eliesa taula‘eiki mo e fakataha ‘o ha‘a ‘Isileli, ki he ‘apitanga ‘i ‘Alapā-Moape, ‘a ia ‘oku ‘i he ve‘e Soatani, ‘o hanga ki Sielikō.
Ko e Foki Mai ‘a e Kau Taú
13Pea ko Mōsese mo ‘Eliesa ko e taula‘eiki, mo e hou‘eiki kotoa pē ‘o e fakataha, na‘a nau ‘alu atu ki tu‘a ‘apitanga ke fakafetaulaki kiate kinautolu. 14Pea ‘ita ‘a Mōsese ki he hou‘eiki ‘o e hōsitē, ‘a e ngaahi kapiteni ‘o e ngaahi toko afe, mo e ngaahi kapiteni ‘o e ngaahi toko teau, na‘e foki mei he fai ‘o e tau. 15Pea me‘a ‘a Mōsese kiate kinautolu, Kuo mou tuku koā ‘a e kau fefine kotoa pē ke mo‘ui? 16Vakai, ko kinautolu ia na‘e o‘i ai ‘a ha‘a ‘Isileli ke fai hala kia Sihova ‘i he me‘a ‘a Peoli–ko e fale‘i kinautolu ‘e Pēlami–pea tō ai ‘a e mahaki faka‘auha ki he fakataha ‘a Sihova.#Nōm 25.1-9 17Pea ko eni, te mou tāmate‘i ‘a e tamaiki tangata kotoa pē, pea ‘ilonga ha fefine kuo ne ‘ilo ha tangata te mou tāmate‘i ia. 18Ka ko e tamaiki fefine kuo ‘ikai ‘ilo ha tangata, tuku ke mo‘ui ma‘amoutolu. 19Pea mou nofo ‘i tu‘a ‘apitanga ‘o ‘aho fitu: ‘ilonga ‘a ia kuo ne tāmate‘i ha taha, pea ‘ilonga ‘a ia kuo ne lave ki ha ‘anga‘anga, ke mou fakalanu ‘i hono ‘aho tolu mo hono ‘aho fitu, ‘a kimoutolu mo ho‘omou kau pōpula. 20Pea ko e me‘a ki he kofu, pe ha nāunau leta, pe ha me‘a fulufulu‘i kosi, mo ha nāunau ‘akau, te mou fai ma‘amoutolu ‘a e fakalanu.
21Pea me‘a ‘a ‘Eliesa na‘e taula‘eiki ki he kakai ‘o e hōsitē na‘e ‘alu ki he tau, Ko e tu‘utu‘uni ia ‘o e Lao na‘e fekau ‘e Sihova kia Mōsese. 22Ka ‘ilonga ha koula pe ha siliva, ha kapa, ha ‘aione, ha tini, pe ha pulu, 23ko e me‘a kotoa ‘e ala ‘ai ki he afi te mau fakalaka atu ‘i he afi, pea ‘e toki ma‘a: ka ‘e fakalanu pē ‘i he vai fakalanu angahala: pea ‘ilonga ha me‘a ‘e ‘ikai ala ‘ai ki he afi, te mou unu ki he vai. 24Pea te mou fō homou kofu ‘i hono ‘aho fitu, pea te mou toki ma‘a; pea hili ia te mou hū mai ki he ‘apitanga.
Ko e Vahevahe ‘o e Koloa Veté
25Pea folofola ‘a Sihova kia Mōsese, ‘o pehē, 26Lau ‘a e tokolahi ‘o e me‘a mo‘ui ‘i he vete, ‘a e tangata mo e manu, ‘e koe, mo ‘Eliesa ko e taula‘eiki, mo e hou‘eiki ‘ulumotu‘a ‘o e fakataha: 27‘o vaeua ‘a e vete ki he kau pāte‘i tau na‘e ‘alu ‘i he kongakau, mo e fakataha kotoa. 28Pea te ke hapai mei ai ha ‘inasi ma‘a Sihova mei he kau tau na‘e ‘alu ‘i he kongakau, ko e toko taha mei he toko nimangeau mei he kakai, mo e fanga pulu, mo e fanga ‘asi, mo e fanga sipi mo kosi: 29to‘o ia mei he vaeua ko ia, ‘o ‘atu kia ‘Eliesa ko e taula‘eiki mo‘o feilaulau-hapai ‘o Sihova. 30Pea mei he vaeua ‘oku ‘o ha‘a ‘Isileli, te ke to‘o ha taha ‘e puke mei he toko nimangofulu, mei he kakai, mei he fanga pulu, mei he fanga ‘asi, pea mei he fanga sipi mo kosi, ‘io, mei he monumanu kotoa, pea te ke ‘atu kinautolu ki he kau Līvai, ‘a ia ‘oku nau fai ‘a e tauhi ‘o e Tāpanekale ‘o Sihova. 31Pea fai ‘e Mōsese mo e taula‘eiki ko ‘Eliesa, ‘o hangē ko e fekau ‘a Sihova kia Mōsese.
32Pea ko e lahi ‘o e vete–tukukehe ‘a e koloa na‘e vete ‘e he kau tau–na‘e toko ono kilu mā fitu mano mā nima afe ‘a e fanga sipi mo kosi, 33pea toko fitu mano mā ua afe ‘a e fanga pulu, 34pea toko ono mano mā taha afe ‘a e fanga ‘asi; 35pea ko e kakai, ‘a ia ko e kau fefine te‘eki ‘ilo ki ha tangata, ko honau lau ko e toko tolu mano mā toko ua afe. 36Pea ko e vaeua, ‘a ia ko e ‘inasi ‘onautolu na‘e ‘alu ‘i he kongakau, ko hono lahi ko e sipi mo kosi ‘e toko tolu kilu mā tolu mano mā fitu afe mā nimangeau: 37pea ko e tukuhau kia Sihova mei he fanga sipi mo kosi ko e toko onongeau mā fitungofulu mā nima. 38Pea ko e fanga pulu na‘e toko tolu mano mā ono afe; pea ko hono tukuhau kia Sihova ko e toko fitungofulu mā ua. 39Pea ko e fanga ‘asi ko e toko tolu mano mā nimangeau; pea ko hono tukuhau kia Sihova ko e toko onongofulu mā taha. 40Pea ko e kakai na‘e toko taha mano mā ono afe; pea ko hono tukuhau kia Sihova ko e toko tolungofulu mā toko ua. 41Pea ‘ange ‘e Mōsese ‘a e tukuhau, ‘a ia ko e feilaulau-hapai ‘o Sihova, kia ‘Eliesa ko e taula‘eiki, ‘o hangē ko e tu‘utu‘uni ‘a Sihova kiate ia.
42Pea mei he vaeua na‘e ‘o ha‘a ‘Isileli, ‘a ia na‘e vahe‘i ‘e Mōsese mei he kau tau 43(pea ko e lahi ‘o e vaeua na‘e ‘o e fakataha ko e fanga sipi mo kosi ‘e toko tolu kilu mā tolu mano mā fitu afe mā nimangeau, 44pea tolu mano mā ano afe ‘a e fanga pulu, 45pea tolu mano mā nimangeau ‘a e fanga ‘asi, 46pea taha mano mā ono afe ‘a e kakai); 47‘io, na‘e to‘o ‘e Mōsese mei he vaeua ‘o ha‘a ‘Isileli ‘a ia na‘e puke mai, ko e taha mei he toko nimangofulu, mei he kakai, pea mei he monumanu, ‘o ne ‘ange kinautolu ki he kau Līvai na‘e fai ‘a e tauhi ‘o e Tāpanekale ‘o Sihova; ‘o hangē ko e tu‘utu‘uni ‘a e ‘Eiki kiate ia.
48Pea ‘unu‘unu mai kia Mōsese ‘a e hou‘eiki na‘e pule ki he ngaahi toko afe ‘o e hōsitē, ‘a e ngaahi kapiteni ‘o e ngaahi toko afe, mo e ngaahi kapiteni ‘o e ngaahi toko teau: 49pea nau pehē kia Mōsese, ‘Ēī, kuo mau lau ‘a e tokolahi ‘o e kau tau ‘oku mau pule ki ai, pea kuo ‘ikai ke mole hamau toko taha. 50Ko ia, kuo mau ha‘u mo kimautolu ha kōpano kia Sihova takitaha mei he me‘a kuo ne ma‘u, ko e ngaahi siueli koula, ‘a e vesa mo e lelu, ‘a e mama sila, ‘a e hau mo e fakama‘u, ke feia ha fakalelei ma‘a homau laumālie ‘i he ‘ao ‘o Sihova. 51Pea to‘o ‘e Mōsese mo ‘Eliesa taula‘eiki ‘a e koula meiate kinautolu, ko e koto siueli fua pē. 52Pea ko e lahi ‘o e koula ‘i he feilaulau na‘e hapai kia Sihova ko e sikeli ‘e taha mano mā ono afe mā fitungeau mā nimangofulu: ko e feilaulau-hapai ia mei he ngaahi kapiteni ‘o e ngaahi toko afe mo e ngaahi kapiteni ‘o e ngaahi toko teau. 53(Kuo vete ‘e he kau tau takitaha ma‘ana.) 54Pea to‘o ‘e Mōsese mo ‘Eliesa taula‘eiki ‘a e koula mei he hou‘eiki ‘o e ngaahi toko afe mo e hou‘eiki ‘o e ngaahi toko teau, ‘o na ‘omi ia ki he Tēniti-Fe‘iloaki‘anga, mo‘o fakamanatu ‘o ha‘a ‘Isileli ‘i he ‘ao ‘o Sihova.
Currently Selected:
NŌMIPA 31: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
