NŌMIPA 27
27
(Teu 31.1-8)
Ko e Fanga ‘Ōfefine ‘o Silofehati
1PEA ‘unu‘unu mai ‘a e ngaahi ‘ōfefine ‘o Silofehati, foha ‘o Hēfeli, foha ‘o Kiliati, foha ‘o Mākili, foha ‘o Manase, ‘o kau ki he ngaahi fāmili ‘o ha‘a Manase, ko e foha ‘o Siosifa: pea ko e ngaahi hingoa eni ‘o e ngaahi ‘ōfefine ko ia, ko Māhala, Noa, mo Hōkela, pea mo Milika mo Tīlisa. 2Pea na‘a nau tutu‘u ‘i he ‘ao ‘o Mōsese, mo e ‘ao ‘o ‘Eliesa ko e taula‘eiki, mo e ‘ao ‘o e hou‘eiki mo e fakataha kotoa, ‘i he mata Tēniti Fe‘iloaki‘anga, ‘o nau pehē, 3Na‘e pekia si‘emau tamai ‘i he Toafa, pea na‘e ‘ikai te ne ‘i he kau ko ia na‘a nau fakataha ke fai mo Sihova, ‘a e kautaha ‘a Kola: ka na‘a ne pekia ‘i he‘ene hia ‘a‘ana; pea na‘e ‘ikai ha‘ane fānau tangata. 4Ko e pehē koā ke mate ‘a e hingoa ‘o ‘emau tamai mei hono fāmili koe‘uhi na‘e ‘ikai hano foha? Tuku mai hamau konga kelekele ‘i he lotolotonga ‘o e kāinga ‘o ‘emau tamai.
5Pea na‘e ‘omi ‘e Mōsese ‘enau me‘a ki he ‘ao ‘o Sihova, he ko e me‘a fakakonisitūtone. 6Pea folofola ‘a Sihova kia Mōsese, ‘o pehē, 7‘Oku mo‘oni ‘a e lau ‘a e ngaahi ‘ōfefine ‘o Silofehati: te ke vahe pē ha konga kelekele mo‘onau tofi‘a ‘i he lotolotonga ‘o e kāinga ‘o ‘enau tamai; pea te ke fakalaka kiate kinautolu ‘a e tofi‘a ‘o ‘enau tamai.#Nōm 36.2 8Pea te ke lea ki ha‘a ‘Isileli, ‘o pehē, Ka pekia ha tangata ta‘ehano foha, te ke fakalaka hono tofi‘a ki hono ‘ōfefine. 9Pea kapau ‘oku ‘ikai hano ‘ōfefine, pea te mou foaki hono tofi‘a ki hono ngaahi tokoua. 10Pea kapau ‘oku ‘ikai hano tokoua, pea te mou foaki hono tofi‘a ki he ngaahi tokoua ‘o ‘ene tamai. 11Pea kapau ‘oku ‘ikai ha tokoua ‘o ‘ene tamai, pea te mou foaki hono tofi‘a ki ha kakano ‘o hono fāmili ‘oku ofi kiate ia, pea te ne ma‘u ia: pea ‘e hoko eni ko e kupu‘i konisitūtone ki ha‘a ‘Isileli hangē ko e tu‘utu‘uni ‘a Sihova kia Mōsese. Ko e Fili ‘o Siosiua ke ne Fetongi ‘a Mōsese.
(Teu 31.1-8)
12Pea folofola ‘a e ‘Eiki kia Mōsese, ‘Alu hake ki he mo‘unga ko eni ko ‘Apalemi, ‘o sio ki he fonua kuo u foaki ki ha‘a ‘Isileli.#Teu 3.23-27; 32.48-52 13Pea hili ho‘o mamata ki ai, te ke ului mo koe foki ki ho kakai, ‘o hangē ne ului ho tokoua ko ‘Ēlone: 14koe‘uhi ā ne mo paetaku‘i ‘eku lea ‘i he Toafa ‘o Sini, ‘i he fakafekāke‘i hake ‘a e fakataha, ‘o ‘ikai te mo fakatāpuhaa‘i au ‘i honau ‘ao ‘i he vai ko ia (ko Vai Mēlipa ia ‘i Kētesi, ‘i he Toafa ‘o Sini).
15Pea fakatau folofola ‘a Mōsese ki he ‘Eiki, ‘o pehē, 16Ke fakanofo mu‘a ‘e Sihova, ko e ‘Otua ‘o e ngaahi laumālie ‘o e kakano kotoa pē, ha tangata ke pule ki he fakataha. 17Ha taha te ne fotu ma‘u pē ‘i ‘ao mo tu‘a, ha taha te ne taki atu kinautolu mo taki mai; ke ‘oua na‘a hoko ‘a e fakataha ‘a e ‘Afiona ‘o hangē ha fanga sipi ‘oku ‘ikai hanau tauhi.#1 Tu‘i 22.17; ‘Isi 34.5; Māt 9.36; Ma‘ake 6.34
18Pea folofola ‘a Sihova kia Mōsese, Pe‘i ‘ave ‘a Siosiua ko e foha ‘o Nuni, ko e tangata ‘oku Laumālie‘ia, pea hilifaki ho nima ki ai;#‘Eki 24.13 19pea fokotu‘u ia ‘i he ‘ao ‘o ‘Eliesa ko e taula‘eiki, pea ‘i he ‘ao ‘o e fakataha kotoa; pea fai hono tu‘utu‘uni ke nau sio ki ai. 20Pea te ke tuku kiate ia mei ho lāngilangi, koe‘uhi ke fie ongo ‘a e fakataha kotoa ‘o ha‘a ‘Isileli, 21ka te ne tu‘u ‘i he ‘ao ‘o ‘Eliesa ko e taula‘eiki, ‘a ia te ne huhū ma‘ana kia Sihova ‘aki ‘a e fakatonu faka-‘Ūlimi:#27.21 ‘Ūlimi mo e Tūmemi; Ko e ongo nāunau na‘e fai ‘aki e fekumi pe ko e hā e finangalo ‘o e ‘Otuá. ‘Oku ‘ikai ‘ilo pau ‘a e anga hono ngāue‘akí. ko e lea ‘a‘ana te nau hū atu ai, pea ko e lea ‘a‘ana te nau hū mai ai, ‘a ia mo ha‘a ‘Isileli kātoa foki, ‘io, ‘a e fakataha kotoa.#‘Eki 28.30; 1 Sām 14.41; 28.6 22Pea fai ‘e Mōsese ‘o hangē ko e tu‘utu‘uni ‘a Sihova kiate ia; pea ne ‘ave ‘a Siosiua ‘o fokotu‘u ‘i he ‘ao ‘o ‘Eliesa ko e taula‘eiki, pea ‘i he ‘ao ‘o e fakataha kotoa: 23pea ne hilifaki hono nima kiate ia, ‘o ne fai hono tu‘utu‘uni, hangē ko e folofola ‘a e ‘Eiki na‘e fakafai ‘ia Mōsese.#Teu 31.23
Currently Selected:
NŌMIPA 27: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
