KO NEHEMAIA 6
6
Ko Hono Fa‘a Puleaki‘i ‘o Nehemaia
1PEA ‘i he faifai pea pā ange kia Sanipalate mo Topaia, pea kia Kēsemi ‘Ālepea, pea ki he toe ‘o homau ngaahi fili, tokua ‘oku ou langa ‘a e ‘ā, pea ‘oku ‘ikai ke kei ava ha potu; (ka na‘a mo e taimi ko ia kuo te‘eki te u tau ‘a e ngaahi lau matapā ‘i he ngaahi matanikolo); 2pea na‘e toki fekau mai kiate au ‘e Sanipalate mo Kēsemi, ke fakahā ‘o pehē, Ha‘u ā ke tau fe‘iloaki ‘i ha taha ‘o e ngaahi vilisi ‘i he lautoka ‘o ‘Ono. Ka ko ‘enau puleaki‘i ha kovi kiate au. 3Pea u tuku atu ha tu‘unga talafekau kiate kinautolu ke fakahā, Ko e ngāue lahi ‘oku ou mo‘ua ai, pea ‘oku ‘ikai te u lava ke ‘alu hifo: koe‘uma‘ā ke tuku ‘a e ngāue ‘i he‘eku li‘aki ke ‘alu hifo kiate kimoutolu!
4Pea na‘e tu‘o fā ‘enau tuku mai ha fekau pehē; ka u tali ai pē hangē ko ia.
5Pea omi hono tu‘onima ha fekau pehē ‘a Sanipalate, ko ‘ene tama, pea ‘oku ne to‘o ha tohi kuo fakaava;#6.5 ha tohi kuo fakaava; Ko hono tuku ta‘esila‘i ha tohi, ko e founga fai ‘ilo ‘o hono ‘ai ke ‘ilolahia hono kakanó. 6‘a ia na‘e tohi ai, ‘o pehē, ‘Oku talanoa ‘e he ngaahi kakai, pea ‘oku fakamo‘oni ki ai ‘e Kāsemu, Tokua ‘oku mou teu ke angatu‘u, ‘a koe mo e kau Siu; ko hono ‘uhinga ia ‘oku ke langa ai ‘a e ‘ā; pea ‘oku ke fie hoko ko honau tu‘i, etc. 7Pea kuo ke tu‘utu‘uni foki ha kau palōfita ke malanga‘aki koe ‘i Selusalema, ‘o pehē, ‘Oku ai ha tu‘i ‘i Siuta. Pea kuo pau ke pā ki he tu‘i, etc. Ko ia ke ke ha‘u ā ke ta fakakaukau fakataha.
8Pea u fekau atu ki ai ke fakahā, ‘Oku ‘ikai ha me‘a pehē ‘o hangē ko ho‘o lau, ka kuo ke fa‘u ia mei ho loto ‘o‘ou.
9He na‘a nau fai kotoa pē ke fakamanavasi‘i kimautolu, he‘enau pehē, ‘E vaivai ai ‘enau ala ki he ngāue, ‘o ‘ikai fai, Ka Ke pou mu‘a hoku nima.
10Pea u hū ki he fale ‘o Sēmaia foha ‘o Telaia foha ‘o Mehetapeli; (tokua ‘oku tapu ‘ene hū ki tu‘a) pea pehē mai ‘e ia, Ta fetaulaki ki he fale ‘o ‘Elohimi, ki he loto Temipale, pea tā tāpuni ‘a e ngaahi matapā ‘o e Temipale: he ‘oku nau ha‘u ke fakapoongi koe; ‘io, ka po‘uli te nau ha‘u ke fakapoongi koe.
11Pea u tali, ‘O hola koā ha tangata hangē ko au? Pea ko hai ha taha hangē ko au te ne hū ki he Temipale, ‘o mo‘ui? ‘E ‘ikai te u hū.
12Pea u hakule, pea tā ‘oku ‘ikai ko e ‘Otua kuo fekau ia: ka kuo ne fai ‘a e palofisai ni ke u kovi ai; pea kuo nō ia ‘e Topaia mo Sanipalate. 13Ko hono ‘uhinga e ‘o e nō ia, koe‘uhiā ke u manavahē ‘o fai pehē, ‘o u hia, ke nau ma‘u ha me‘a ke tu‘unga ai ha ongoongo kovi ke nau lau‘i au.
14‘E hoku ‘Otua, manatua ‘a Topaia mo Sanipalate, ‘o taau mo ‘ena ngāue kovi; mo Noataia foki ‘a e palōfita fefine, mo hono toe ‘o e kau palōfita na‘e fai ke u manavahē.
Ko Hono Fakakakato ‘o e Ngāué
15Pea na‘e faka‘osi ‘a e ‘ā ‘i hono ‘aho uofulu mā nima ‘o ‘Ēluli: ko hono ‘aho nimangofulu mā ua ia. 16Pea ‘i he fanongo leva ki ai ‘e homau ngaahi fili na‘e ilifia ‘a e ngaahi kakai na‘e nofo takatakai, pea nau matapeko ‘aupito ai: he na‘a nau vakai ‘oku mei homau ‘Otua ‘a e lava ‘o e ngāue.
17‘I he ngaahi ‘aho ko ia foki na‘e lahi ‘a e ngaahi tohi ‘a e hou‘eiki Siuta na‘e ‘ave kia Topaia, pea mo ha‘a Topaia na‘e ‘omi kiate kinautolu. 18He na‘e ai ha tokolahi ‘i Siuta kuo nau fuakava kiate ia, he ko e kāinga mali ia ‘o Sekonaia foha ‘o ‘Āla‘a; pea ko hono foha ko Sihohanani kuo ne mali mo e ‘ōfefine ‘o Mēsuilame foha ‘o Pelekaia. 19Kae‘uma‘ā na‘a nau ‘a‘au ai pē ‘i hoku ‘ao ‘ene ngaahi lelei, pea ko ‘eku ngaahi lea na‘a nau ‘ave kiate ia, Na‘e fai mai ‘e Topaia ha ngaahi tohi ke fakalotosi‘i au.
Currently Selected:
KO NEHEMAIA 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
