KO NEHEMAIA 10
10
1PEA ko eni ia ‘a kinautolu na‘e ‘ai honau nima: ko Nehemaia foha ‘o Hakalaia na‘e kōvana, pea mo Setekaia; 2ko Selaia, ‘Asalaia, Selemaia, 3Pāsua, ‘Amilaia, Malakai, 4Hātusi, Sepanaia, Māluki, 5Hālimi, Melemoti, ‘Opataia, 6Tāniela, Kinetoni, Paluki, 7Mēsuilame, ‘Apaia, Misiamini, 8Masaia, Pilikai, Sēmaia; ko ha‘a taula‘eiki ia. 9Pea ko ha‘a Līvai eni: ‘io, ‘a Sisua foha ‘o ‘Asanaia, ko Pinui ko e ha‘a Henatati, ko Katemieli. 10Ko honau kāinga foki, ‘a Sepanaia, Hōtaia, Kēlita, Pelaia, Hānani,
11Maika, Lēhopi, Hasapaia, 12Sākuli, Selepaia, Sepanaia, 13Hōtaia, Pani, Pēninu.
14Ko e hou‘eiki ‘o e kakai eni; ko Pālosi, Pāhati-Moape, ‘Īlami, Satu, Pani, 15Puni, ‘Asakati, Pēpai, 16‘Atunaisa, Pikivai, ‘Ātini, 17‘Āteli, Hesekaia, ‘Āsuli, 18Hōtaia, Hāsumi, Pesai, 19Hālifi, ‘Anatoti, Nēpai, 20Makapiasi, Mēsuilame, Hēsili, 21Mesesapeli, Sātoki, ‘Iatua,
22Pelataia, Hānani, ‘Anaia, 23Hosea, ‘Ananaia, Hāsupi, 24Halohesi, Pīleha, Sōpeka, 25Lēhumi, Hasapena, Ma‘aseia,
26pea mo ‘Āhaia, Hānani, ‘Ānani,
27Māluki, Hālimi, Pā‘ana.
Ko e Tukupā
28Pea ko hono toe ‘o e kakai, ‘a e kau taula‘eiki, ‘a e kau Līvai, ‘a e kau le‘o matapā, ‘a e kau hiva, ‘a e kau Netinimi, mo ia fua pē kuo fakamavahe mei he ngaahi kakai ‘o e ngaahi fonua ke nofo ki he Lao ‘a ‘Elohimi, ‘a honau ngaahi uaifi, mo ‘enau fānau tangata mo fānau fefine, ‘a kinautolu kotoa pē na‘e lava ke fai ‘ilo; 29na‘a nau fā‘ūtaha mo honau kāinga ‘a e hou‘eiki, ‘o nau fai ha tuki faka‘aungafa, mo ha fuakava, ke fou ‘i he Lao ‘a ‘Elohimi; ‘a ia na‘e tuku mai, ‘o fakafai ‘ia Mōsese ko e Sevāniti ‘a ‘Elohimi; ‘io, ke tauhi mo fai ‘a e ngaahi tu‘utu‘uni kotoa pē ‘a Sihova ko homau ‘Eiki, mo ‘ene konisitūtone, mo ‘ene ngaahi fekau.
30Mo eni foki, ke ‘oua te mau ‘ange ‘emau fānau fefine ki he ngaahi kakai ‘o e fonua, ‘o ‘oua ‘e ‘omi ‘enau fānau fefine ke nonofo mo ‘emau fānau tangata.#‘Eki 34.16; Teu 7.3
31Pea kapau ‘e ‘omi ‘i he ‘aho Sāpate ‘e he ngaahi kakai ‘o e fonua ‘a e me‘a fakatau, mo e me‘akai, ‘e ‘ikai te mau fakatau meiate kinautolu ‘i he ‘aho Sāpate, pe ‘i ha ‘aho tapu:#‘Eki 23.10-11; Lev 25.1-7; Teu 15.1-2 pea te mau fai ‘a e fakahilita‘u fitu, ‘a e tuku ‘o e kelekele ke fo‘ou, mo e tuku tautau ai ‘a e mo‘ua kotoa. 32Pea na‘a mau fokotu‘u tu‘utu‘uni kiate kimautolu ke ‘ange ‘a e vahetolu ‘o e sikeli ‘i he ta‘u kotoa pē ma‘a e ngāue ‘a e fale ‘o homau ‘Otua–#‘Eki 30.11-16
33ki he mā fono pea ki he feilaulau-me‘akai tu‘u ma‘u pea ki he feilaulau-mōifua tu‘u ma‘u na‘e fai ‘i he ngaahi Sāpate mo e ngaahi māhina fo‘ou; ki he ngaahi ‘aho tu‘utu‘uni, pea ki he ngaahi me‘a ‘oku fakatāpui, pea ki he ngaahi feilaulau-angahala ke fai ‘a e fakalelei ma‘a ‘Isileli; ‘io, ki he fatongia kotoa ‘o e fale ‘o homau ‘Otua.
34Pea na‘a mau pāloti ki he okooko–‘a e kau taula‘eiki, ‘a e kau Līvai, pea mo e kakai–ki he ‘omi ‘o e kōpano fefie ki he fale ‘o homau ‘Otua, ki he ‘ulumotu‘a mo e taimi tu‘utu‘uni ‘i he ta‘u mo e ta‘u, ke tutu ‘i he funga ‘ōlita ‘o Sihova ko homau ‘Otua, ‘o hangē ko ia kuo tohi ‘i he Lao.
35Pea ke ‘omi ‘a e polopolo ‘o e ma‘ala, mo e polopolo ‘o e ‘akau fua kehekehe, ki he fale ‘o Sihova ‘i he ta‘u mo e ta‘u.#‘Eki 23.19; 34.26; Teu 26.2
36Pea mo e ‘olopo‘ou ‘o ‘emau fānau, mo ‘emau monumanu, ‘o hangē ko ia kuo tohi ‘i he Lao; ‘io, ‘a e ‘olopo‘ou ‘o ‘emau fanga pulu, mo e fanga sipi mo kosi, ke ‘omi ki he fale ‘o homau ‘Otua, ki he kau taula‘eiki ‘oku fai ‘a e fakafe‘ao ‘i he fale ‘o homau ‘Otua.#‘Eki 13.2
37Ko e polopolo foki ‘o ‘emau takaonga mā, mo ‘emau ngaahi me‘a hapai, mo e fua ‘o e ngaahi ‘akau kehekehe, ‘a e vaine mo e lolo–#Nōm 18.21 te mau ‘omi ia ki he kau taula‘eiki, ki he ngaahi loki ‘o e fale ‘o homau ‘Otua. Pea ko e vahehongofulu ‘o ‘emau ngoue te mau ‘omi ki he kau Līvai; he ko e fa‘ahinga ko ia, ‘a e kau Līvai, ‘oku nau tali ‘a e tukuhau-hongofulu ‘i he ngaahi kolo kotoa pē ‘oku fai ai ‘emau ngoue.
38Pea ‘e tu‘u mo e kau Līvai ‘i he‘enau tali ‘a e tukuhau-hongofulu ‘a e taula‘eiki, ko ha ha‘a ‘Ēlone, koe‘uhi ke ‘ohake ‘e he kau Līvai ‘a e vahehongofulu ‘o e vahehongofulu ki he fale ‘o homau ‘Otua, ki he ngaahi loki, ki he fale koloa.#Nōm 18.26
39He ko ha‘a ‘Isileli mo ha‘a Līvai te nau fetuku ‘a e uite, mo e uaine, mo e lolo kuo hapai ki he ngaahi loki, ‘a e potu ‘oku ‘i ai ‘a e nāunau ‘o e fale tapu, mo e kau taula‘eiki ‘oku fai ‘a e fakafe‘ao, mo e kau le‘o matapā, mo e kau hiva. Pea ‘e ‘ikai te mau tuku li‘aki ‘a e fale ‘o homau ‘Otua.
Currently Selected:
KO NEHEMAIA 10: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
