Ma‘aké 11
11
Ko e A‘u Atu ‘a Sīsū ki Selusalema
(Māt 21.1-11; Luk 19.28-40; Sioné 12.12-19)
1PEA ‘i he‘enau fakaofi ki Selusalema, ki Petefesi mo Pētani mo e mo‘unga ko ‘Ōlive, na‘a ne fekau atu ha toko ua ‘o ‘ene kau ako, 2‘o ne pehē kiate kinaua, Mole pē ki he vilisi ko ena ‘oku hanga mai; pea ‘i ho‘omo a‘u leva ki ai, te mo ‘ilo ha ki‘i ‘asi kuo no‘otaki, ‘a ia kuo te‘eki ha tangata ‘e heka ki ai; vete ia ‘o ‘omai. 3Pea ka ai ha taha te ne lea atu, ‘o pehē, Ko e hā ‘oku mo fai ai ia? pea mo pehē, ‘oku fiema‘u ia ‘e he ‘Eiki,#11.3 ‘e he ‘Eiki; pe ‘e he tokotaha ‘oku ‘o‘oná. pea te ne toe fakafoki vave mai.
4Pea na ō atu, ‘o na ‘ilo ha ki‘i ‘asi ‘oku no‘otaki ‘i tua‘ā, ‘o ofi ki ha matapā ‘i he hala tu‘a ‘api; pea na vete ia. 5Pea ko e ni‘ihi ‘iate kinautolu na‘e tutu‘u ai, na‘a nau lea kiate kinaua, ‘o pehē, Ko e hā ‘oku mo fai na, ‘o mo vete ‘a e ki‘i ‘asi?
6Pea na tali ‘o hangē ko e fekau ‘a Sīsū: pea nau tuku ai ke na fai. 7Pea na ‘omi ‘a e ki‘i ‘asi kia Sīsū, pea nau hili ki ai honau ngaahi pulupulu, pea ne heka ki he manu. 8Pea ko e tokolahi na‘a nau falikiliki ‘a e hala ‘aki honau pulupulu; pea fai‘aki ‘e he ni‘ihi ‘a e ngaahi lou‘akau na‘a nau tu‘usi mei he ngaahi ngoue‘anga. 9Pea ko kinautolu na‘e ‘alu mu‘omu‘a, mo kinautolu na‘e muimui mai, na‘a nau fekālanga‘i ‘o pehē,
Hōsana!
Hoto ‘ofa kiate ia ‘oku hoko mai ‘i he huafa ‘o e ‘Eiki!#Saame 118.25-26
10Hoto ‘ofa ki he pule‘anga ‘o ‘etau kui ko Tēvita,
‘A ia ‘oku hoko mai ni!
Hōsana ki Langi Taupotu!
11Pea ne hū ki Selusalema, ki he Temipale: pea hili ‘ene vakai foli ‘a e ngaahi me‘a kehekehe, na‘a ne ‘alu mei ai ki Pētani fakataha mo e kau Hongofulumāua; he kuo efiafi fau.
12Pea pongipongi hake, ‘i he‘enau omi mei Pētani, na‘a ne hālofia: 13Pea ‘i he‘ene vakai ha fu‘u fiki mei he mama‘o ‘oku fai lau, na‘a ne ‘alu ki ai, hei‘ilo te ne ma‘u ai ha me‘a: ka ‘i he‘ene a‘u ki ai na‘e ‘ikai te ne ‘ilo ai ha me‘a, ko e ngaahi lau pē; he na‘e kei tuai ‘a e to‘ukai fiki. 14Pea folofola ia ki ai, ‘o pehē, Ke ‘oua na‘a kai hao fua ‘e ha taha ‘o ta‘engata.
Ko Sīsū he Temipalé
(Māt 21.12-17; Luk 19.45-48; Sioné 2.13-22)
15Pea nau a‘u ki Selusalema: pea ne hū ki he Temipale, ‘o ne hanga ‘o kapusi ‘a kinautolu na‘e fakatau atu mo fakatau mai ‘i he Temipale, ‘o ne fulihi ‘a e ngaahi tēpile ‘a e kau fetongi pa‘anga, mo e ngaahi nofo‘a ‘o e kakai na‘e ‘omi lupe ke fakatau; 16pea na‘e ‘ikai te ne tuku ke hala loto Temipale ha taha to‘o kavenga. 17Pea ne kamata ako kiate kinautolu, ‘o ne pehē, ‘ikai kuo tohi, Ko hoku fale ‘e ui ko e falelotu mo‘o e kakai kotoa pē? Ka ko kimoutolu kuo mou ngaohi ia ko e ‘ananga ‘o ha kaiha‘akau.#‘Ais 56.7; Sel 7.11
18Pea na‘e fanongo ki ai ‘a e hou‘eiki taula‘eiki mo e kau sikalaipe, pea nau fiu ‘a feinga pe ‘e fēfē ha‘anau tāmate‘i ia: he na‘a nau manavahē kiate ia, koe‘uhi ko e to‘oa ‘a e loto ‘o e kakai ‘i he anga ‘o ene ako.
19Pea ka efiafi leva na‘a ne ‘alu atu ki tu‘a kolo.
Ko e Akonaki ‘o e Fu‘u Fikí
(Māt 21.20-22)
20Pea ‘i he‘enau fononga ange hengihengi, na‘a nau vakai ‘a e fu‘u fiki kuo mate ‘o a‘u ki hono tefito. 21Pea manatua ‘e Pita, ‘o ne pehē kiate ia, Lāpai, vakai ange, ko e fu‘u fiki na‘a ke tukitala‘i kuo mate.
22Pea tali ‘e Sīsū ‘o ne pehē kiate kinautolu, Mou tui pē ki he ‘Otua. 23Ko au ē, ‘oku ou tala atu, Ka ai ha taha te ne pehē ki he mo‘unga ni, Fei mo mahiki koe, ‘o patū ki tahi; ‘o ‘ikai te ne tāla‘a ‘i hono loto, ka ne tui pē ‘oku hoko ‘ene lea; pea ‘e hoko ia.#Māt 17.20; 1 Kol 13.2 24Ko ia ‘oku ou tala atu, Ko e ngaahi me‘a kotoa pē ‘oku mou hūfia mo kolea, tui pē na‘a mou ma‘u ia, pea ‘e hoko kiate kimoutolu. 25Pea ka mou ka tu‘u leva ke lotu, pea ka ai ha me‘a ‘oku mou kovi‘ia ai ki ha taha, fakamolemole mu‘a ia: koe‘uhi kae fakamolemole ho‘omou ngaahi angahala ‘e ho‘omou Tamai ‘a ia ‘oku ‘i Hēvani. 26Ka ‘o kapau ‘e ‘ikai te mou fakamolemole, pea ‘e ‘ikai fakamolemole ‘e ho‘omou Tamai ‘oku ‘i Hēvani ho‘omou ngaahi hala.#11.26 ‘Oku ‘ikai ke ‘asi ‘a e vēsí ni ‘i he ngaahi hiki fuoloa ‘e ni‘ihi. #Māt 6.14-15
Ko e Fehu‘ia ‘o e Mafai ‘o Sīsuú
(Māt 21.23-27; Luk 20.1-8)
27Pea nau toe ha‘u ki Selusalema: pea lolotonga ‘ene hā‘ele ‘i he Temipale, na‘e ha‘u kiate ia ‘a e hou‘eiki taula‘eiki, mo e kau sikalaipe, mo e kau mātu‘a, 28‘o nau pehē ki ai, Ko e hā ho tu‘unga ‘oku ke fai ai ‘a e ngaahi me‘a ko eni? pea ko hai na‘a ne tuku kiate koe ‘a e tu‘unga ko ia, koe‘uhi ke ke fai ‘a e ngaahi me‘a ko eni?
29Pea tali ‘e Sīsū, Ka u fai atu ha‘aku fehu‘i ‘e taha, pea mou tali mai pea te u toki fakahā atu pe ko e hā hoku tu‘unga ‘oku ou fai ai ‘a e ngaahi me‘a ko eni. 30Ko e fai papitaiso ‘a Sione, na‘e mei he langi ia, pe mei he tangata? mou tali mai.
31Pea nau fekīhiaki, ‘o pehē, Kapau te tau tali, Mei he langi; te ne pehē, Pea ko e hā na‘e ‘ikai te mou tuitala ai kiate ia? 32Ka te tau pehē koā, Mei he tangata? Pea na‘a nau manavahē ki he kakai Siu: he na‘e lau kotoa pē ‘e kinautolu, ko Sione ko e palōfita mo‘oni. 33Pea nau tali kia Sīsū, ‘o nau pehē, ‘oku ‘ikai te mau ‘ilo.
Pea lea ‘a Sīsū kiate kinautolu, Pea ‘e ‘ikai ā te u tala ‘e au foki pe ko e hā hoku tu‘unga ‘oku ou fai ai ‘a e ngaahi me‘a ko eni.
Currently Selected:
Ma‘aké 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
