KO MAIKA 7
7
Ko e Mole ‘a e Faitotonú Mei ‘Isileli
1‘OIAUĒ kita! he kuo u hangē ko e toli to‘ukai, hangē ha tufi toenga kālepi. ‘Oku ‘ikai ha fuhinga ke kai; ha polopolo fiki ke u havala ki ai.#7.1 pe ka ‘oku havala ‘eku mo‘ui ki he polopolo fiki. 2Kuo mole ‘a e tangata lotu mei māmani, pea ‘oku ‘ikai ha faitotonu ‘i he kakai: ‘oku nau toi kotoa pē ke fai ha fakapō; ‘oku nau tuli takitaha ki hono kāinga ‘aki ha kupenga. 3‘Oku nau puke fakanimaua ki he kovi, ko e fai ke mafai; ko e ‘eiki ‘oku ne kole, pea ko e fakamaau ‘oku ne fakamaau ko e sio ki he totongi; pea ko e mā‘olunga, ‘oku ne ‘a‘au ‘e ia ‘a e feinga ‘o hono loto; talu ai ‘enau lalanga ia.#7.3 lalanga ia; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: fa‘ufa‘ufono. 4Ko honau lelei taha ko e tala‘i ‘akau tofu pē: ko honau faitotonu ‘oku kovi ange ‘i ha ‘ā talatala: ko e ‘aho kuo lau ki ai ho‘o kau taulama, ho ‘aho ‘eke, ‘oku nga‘unu mai: toki hoko ai ‘enau puputu‘u.
5‘Oua te mou tu‘anaki ki ha kaume‘a, ‘oua te mou falala ki ha to‘utakanga: tauhi ‘a e matapā ‘o ho ngutu mei he fefine ‘oku tokoto ‘i ho fatafata. 6‘Oku va‘inga‘aki ‘e he foha ‘a ‘ene tamai, ‘oku tu‘u ‘a e ta‘ahine ki he‘ene fa‘ē, ‘a e fefine mali ki he fa‘ē ‘a hono husepāniti; ko e ngaahi fili ‘o e tangata ko hono kau nofo‘anga.#Māt 10.35-36; Luk 12.53
7Ka ko au te u fakasio atu he ha‘u ‘a Sihova; te u nofo‘aki tali ki hoku ‘Otua fakamo‘ui‘anga: ‘e ongo‘i au ‘e hoku ‘Otua.
Ko e Fai Fakamo‘ui ‘a Sihova
8‘Oua te ke fiefia ‘iate au, ‘e hoku fili: he neongo te u tō, te u toe tu‘u; neongo te u nofo ‘i he po‘uli, te u ma‘u ‘a Sihova ko ‘eku maama. 9Te u fuesia ‘a e tuputāmaki ‘a Sihova, he kuo u angahala kiate ia; kae‘oua ke ne taukapo‘i ‘eku me‘a, mo fakaai ‘eku totonu: te ne fakahū au ki tu‘a ki he maama, te u sio ki he‘ene fakatonuhia.#7.9 pe ki he‘ene fakaai ‘a e totonú. 10Pea ‘e sio ki ai ‘a e ta‘ahine ko hoku fili, pea ‘e ‘ufi‘ufi ia ‘e he mā; he‘ene lau mai, Koma‘ā ‘a Sihova ko ho ‘Otua? ‘E sio hoku mata ki he ta‘ahine ko ia; ‘ene toki hoko ko e me‘a ke malaki ko e pelepela ‘i he ngaahi hala.#7.10 ‘ene… hala; pe te nau tākoto he ngaahi halá kuo malaki kinautolu, ka mau fakama‘ito‘a kimautolu.
11Ko e ‘aho ē ke fakapou ho‘o fakapae;
‘I he ‘aho ko ia ‘e ‘ai ‘a e laine ke mama‘o.
12‘I he ‘aho ko ia te nau mātu‘aki a‘u kiate koe mei ‘Āsilia mo e ngaahi kolo ‘o e ‘Isipite ‘e taha, pea mei he ‘Isipite ‘e taha ‘o a‘u ki he Vaitafe, pea mei tahi ki tahi, pea mei he mo‘unga ki he mo‘unga; 13pea ‘e hoko ‘a e fonua ko e lala koe‘uhi ko e kau nofo ai, ko e fua ‘o ‘enau ngaahi fai anga.
Ko e ‘Alo‘ofa ‘a Sihova ki ‘Isileli
14Tauhi ho kakai ‘aki ho‘o va‘akau, ‘a e tākanga ‘oku ke tofi‘a ‘aki, ke nau nofo fakaekinautolu ‘i he vao ‘i loto Kāmeli: ke nau kaikai ‘i Pēsani mo Kiliati, hangē ko e taimi fuoloa atu.
15Hangē ko e taimi ‘o ho‘o hū ki tu‘a mei ‘Isipite, te u tuku ke ne mamata me‘a fakaofo.#7.15 te u t… fakaofo: Ko hono faka-Hepeluú ia, ka ‘oku ngali tonu hono hiki ‘o: Tuku ke mau mamata me‘a fakaofo. 16‘E sio ki ai ha ngaahi pule‘anga, pea te nau maa‘i honau mālohinga kotoa; te nau kū ngutu; ‘e tuli honau telinga. 17Te nau ‘emo ‘a e efu hangē ha ngata: hangē ko e fanga totolo ‘i he kelekele te nau ha‘u tetetete pē mei honau ngaahi talitau‘anga: te nau ha‘u fāfā‘ū kia Sihova ko hotau ‘Otua, pea te nau manavahē kiate koe.
18Ko hai ‘a e ‘Otua ‘oku hangē ko e ‘Afiona, ‘oku fakamolemole ‘a e kovi, mo lakai ‘a e talangata‘a ‘o e toenga ‘o hono tofi‘a? ‘Oku ‘ikai te ne puke ma‘u ai pē ‘ene ‘ita, he ko e taha manako ia ki he fai meesi. 19Te ne foki mai, ‘o faka‘atu‘i kitautolu; te ne malakekina ‘etau ngaahi kovi: ‘io, te ke lī ‘enau ngaahi hia ki he ngaahi loloto ‘o e tahi. 20Te ke fakaai ‘a e aleapau kia Sēkope, mo e meesi kia ‘Epalahame, ‘a ia na‘a ke fuakava ai ki he‘etau ngaahi kui talu mei tuai.
Currently Selected:
KO MAIKA 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
