KO MAIKA 1
1
1KO E folofola ‘a Sihova ‘a ia na‘e hoko kia Maika ko e tangata Moleseti ‘i he kuonga ‘o Siotame, ‘Āhasi, Hesekaia, ko e ngaahi Tu‘i Siuta, ‘a ia na‘e hā kiate ia ‘oku kau ki Samēlia mo Selusalema.#2 Tu‘i 15.32–16.20; 18.1–20.21; 2 Kal 27.1-7; 28.1–32.33
Ko ha Faka‘ise‘isa koe‘uhí ko Samēlia mo Selusalema
2Mou fanongo mai ā, ‘a e ngaahi kakai kātoa; tokanga mai, ‘a e fonua, mo e me‘a kotoa ‘oku ‘i ai; pea ke tu‘u mai ‘a ‘Ātonai Sihova ko e fakamo‘oni kiate kimoutolu–‘a ‘Ātonai mei hono temipale tapu. 3He vakai, ‘oku hā‘ele mai ‘a Sihova mei hono feitu‘u, pea te ne hifo mai, ‘o mala ‘i he ngaahi potu mā‘olunga ‘o e fonua. 4Pea ‘e vai ‘a e ngaahi mo‘unga he‘ene tu‘u ai, pea ‘e mafahi ‘a e ngaahi tele‘a, hangē ko e uakisi ‘i he ‘ao ‘o e afi, hangē ko e vai kuo malingi ‘i ha tahifohifo.
5Koe‘uhi ko e faihala ‘a Sēkope ‘oku ‘i ai ‘a e fu‘u me‘a ni, pea koe‘uhi ko e ngaahi angahala ‘a e fale ‘o ‘Isileli, ‘Oku meia hai ‘a e faihala ‘a Sēkope? ‘Ikai ko Samēlia? Pea ‘oku meia hai ‘a e ngaahi sia ‘o Siuta? ‘Ikai ko Selusalema? 6Ko ia ne ngaohi ‘a Samēlia ko e tu‘unga maka ‘i ha tokanga ngoue, pea hangē ha vao kuo ke tō ai ha ngoue vaine: pea te u hua‘i hono ngaahi maka ki he tele‘a, pea te u tatala hono ngaahi tu‘unga. 7Pea ‘e momosi hono ngaahi ‘īmisi, pea ko ‘ene ngaahi to‘ongapō ‘e tutu ‘aki ‘a e afi, pea ko hono ngaahi ‘aitoli kotoa te u ngaohi ko e me‘a li‘aki: he na‘a ne tānaki ia mei he to‘ongapō ‘a e pa‘umutu, pea te nau foki ki he to‘ongapō ‘a e pa‘umutu.
8Ko ia te u tangi mo e ‘oiauē,
Te u ‘alu ko e vetea mo e vala pē:
Te u fai ‘a e tangilāulau hangē ko e fanga siakali,
Pea te u tangi hangē ko e fanga ‘ositalesi
9He ‘oku matamatakovi hono ngaahi lavea:
Seuke, kuo a‘u ‘a e me‘a ki Siuta;
Kuo a‘u ki he matanikolo ‘o hoku kakai,
Kuo a‘u ki Selusalema.
Ko e Fakaofiofi mai ‘a e Filí ki Selusalemá
10‘Oua ‘e tala ki Kati:
‘I ho‘omou tēngihia, ‘oua ‘e tangi,#1.10 pe ‘oua ‘e tangi ‘aho.
‘I Pete-leafela,#1.10 Pete-leafela; Ko e lau eni ‘a e palōfitá ki he ngaahi kolo ki ‘uta ‘e fou mai ai he kau tau ‘a e filí ke tau‘i ‘a Selusalema. tekefili he efu;#1.10 ‘Oku tu‘u he tohi ‘e ni‘ihi: kuó u tekefili.
11Si‘i kau fefine nofo Sāfili,
Laka ange fakaekimoutolu,
Kuo telefua pango:
Ko si‘i fefine ko Sa‘anani
Kuo ‘ikai hū atu;
Ko e tangilāulau ‘o Pete-ha-‘ēsili
Te ne to‘o meiate kimoutolu homou tu‘u‘anga.
12He ko si‘i fefine ko Maloti
‘Oku nofo‘aki tali ki ha lelei:
He kuo hifo ha kovi meia Sihova
Ki he matanikolo ‘o Selusalema.
13Si‘i fefine ko Lākisi,
No‘otaki ‘a e hoosi lele ki he sāliote;
Ko e kamata ia ‘o e angahala ki he ta‘ahine ko Saione;
He na‘e ‘ilo ‘iate koe ‘a e ngaahi faihala ‘a ‘Isileli,
14Ko ia te ke ‘ange ‘a e koloa ‘ave Ki Moleseti-kati;
Ko e ngaahi fale ‘o ‘Akisipi
‘E hoko ko e vai kākā ki he ngaahi Tu‘i ‘Isileli,
15Ka te u toe ‘omi ‘a e ‘ea kiate koe,
Si‘i fefine ko Mālesa;
‘E ‘alu atu ‘a e lāngilangi ‘o ‘Isileli Ki ‘Atulami. 16Ta‘ahine, fakatekefua koe,
Koe‘uhi ko e fānau ‘oku ke loto‘aki:
Fakalaulahi ho fangafanga hangē ko e vulitua,
He kuo nau ‘alu pōpula meiate koe.
Currently Selected:
KO MAIKA 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
