Mātiú 11
11
Ko Sione Papitaiso
(Luk 7.18-35)
1PEA kuo faka‘osi ‘e Sīsū ‘ene fai tu‘utu‘uni ki he kau Hongofulumāua ‘o ‘ene ako, na‘a ne hiki mei he potu ko ia ke faiako mo malanga ‘i honau ngaahi kolo.
2Pea fanongo ‘e Sione ‘i he pilīsone ki he ngaahi ngāue ‘a e Mīsaia, ‘o ne fekau atu ‘i he‘ene kau ako ke fehu‘i kiate ia, 3‘o pehē, Ko koe ia na‘e pehē ke ha‘u, pe te tau ‘amanaki ki ha taha kehe?
4Pea tali ‘e Sīsū ‘o ne pehē kiate kinaua, Mo ō ‘o fakahā kia Sione ‘a e ngaahi me‘a ‘oku mo fanongo mo mamata ki ai: 5‘oku ‘ā ‘a e kui, pea ‘eve‘eva ‘a e heke, ‘oku fakama‘a#11.5 fakama‘a; Vakai ki he 8.2. ‘a e kilia, pea ongo ‘a e tuli, pea fokotu‘u ‘a e mate, pea malanga‘aki ‘a e ongoongo lelei ki he masiva:#‘Ais 35.5-6; 61.1 6pea monū‘ia ā ka ko ia ‘oku ‘ikai tūkia ‘iate au.
7Pea kuo na ō, pea hanga ‘e Sīsū ‘o lea ki he kakai ‘ia Sione, Ko ho‘omou ‘alu atu ki he toafa ke siofi ‘a e hā? Ko ha kaho ‘apē ‘oku lulu‘i ‘e he matangi, ‘ō? 8Ka ko e hā nai na‘a mou ‘alu ke mātā? Ko ha tangata ‘apē na‘e kofu silika fakatafu‘ufu‘u, ‘ō? ‘Ē, ko e fa‘ahinga ‘oku kofu silika ‘oku ‘i he ‘api ‘o e ngaahi tu‘i. 9Ka ko ho‘omou ‘alu atu ki he hā? ke mamata ki ha palōfita? ‘āua; tala atu, ‘oku lahi ia ‘i ha palōfita. 10Ko eni ia na‘e kau ki ai ‘a e folofola; Vakai, ‘oku ou fekau atu ‘e au hoku fakamelomelo ke mu‘omu‘a kiate koe, ‘a ia te ne ngaohi ho hala mo‘ou.#Mal 3.1 11Ko au ē, ‘oku ou tala atu, ‘I he kakai kotoa kuo fanau‘i ‘e he fefine kuo te‘eki ke fokotu‘u ha toko taha ‘oku lahi ‘ia Sione Papitaiso: ka neongo pe ko hai ‘oku faka‘ange‘ange ‘i he Pule‘anga ‘o Hēvani, ka ‘oku lahi ia ‘ia Sione. 12Talu meia Sione Papitaiso ‘o fai mai, mo e ‘ohofia ‘o e Pule‘anga ‘o Hēvani,#11.12 ‘ohofia… Hēvaní; pe mo e hoko fakamālohia mai ‘a e Pule‘anga ‘o Hēvaní. mo hono fa‘ao ‘e ha kau fakamālohi.#Luk 16.16 13He ko e kau Palōfita kotoa pē mo e Lao, ‘o a‘u mai kia Sione na‘a nau palofisai pē. 14Pea hei‘ilo pe te mou tali ‘a e lea, ka ko eni ia ‘a e ‘Ilaisiā ka hoko mai.#Mal 4.5; Māt 17.10-13; Ma‘ake 9.11-13 15Ko ia ‘oku telinga, ke ne ongo‘i.
16Ka te u fakatatau ki he hā ‘a e to‘utangata ni? ‘Oku hangē ko ha tu‘unga tamaiki ‘oku nofo ‘i he mala‘e, ‘o kalanga ange ki ha tamaiki kehe, 17‘o pehē, Ne mau tā nafa atu, kae ‘ikai te mou me‘e; pea mau hua ‘a e ‘oiauē, kae ‘ikai te mou sī fatafata. 18He na‘e ha‘u ‘a Sione ‘o ‘ikai keinanga mo faikava; pea nau pehē, ‘oku ‘iate ia ha tēvolo. 19Na‘e ha‘u ‘a e Fanautama ‘a Tangata ‘o keinanga mo faikava; pea nau pehē, ‘Isa, ko e tama fa‘a kai mo fa‘a inu kava, ko e kaume‘a ‘o e kau pōpilikane mo e kau angahala. Ka na‘e fakatonuhia ‘a Poto ‘e he‘ene fānau.
Ko e Ngaahi Kolo Ongongata‘a
(Luk 10.13-15)
20Toki hanga ‘e Sīsū ‘o valoki‘i ‘a e ngaahi kolo ‘a ia na‘e fai lahi ai ‘ene ngaahi ngāue mamafa, koe‘uhi na‘e ‘ikai te nau fakatomala. 21‘Oiauē koe, Kōlesini! ‘Oiauē koe, Petesaita! he ka ne fai ‘i Taia mo Saitoni ‘a e ngaahi ngāue mamafa ne fai ‘iate kimoua, ne loa pē ‘enau fakatomala, ‘o ‘ai tauanga‘a mo pani efuefu.#‘Ais 23.1-18; ‘Isi 26.1–28.26; Sioelí 3.4-8; ‘Ēmosi 1.9-10; Sāk 9.2-4 22Ka ‘oku ou tala atu, ‘E kātakingofua ‘i he ‘Aho Fakamaau ‘a Taia mo Saitoni ‘iate kimoua. 23Pea ko koe foki, Kāpaneume; ‘e hiki koe koā ki langi? ‘e hifo koe ki Hētesi: he ka ne momo‘i fai ‘i Sōtoma ‘a e ngaahi ngāue mamafa ne fai ‘iate koe, pehē ne tolonga ‘o a‘u mai ki he ‘aho ni.#‘Ais 14.13-15; Sēn 19.24-28 24Ka ‘oku ou tala atu, ‘E kātaki ngofua ‘i he ‘Aho fakamaau ‘a e fonua ko Sōtoma ‘iate koe.#Māt 10.15; Luk 10.12
Ha‘u Kiate Au ka Mou Nonga
(Luk 10.21,22)
25‘I he taimi ko ia na‘e tali ki ai ‘e Sīsū, ‘o ne pehē, ‘oku ou fakatonuhia‘ia koe, ‘e Tamai, ko e ‘Eiki ‘o e langi mo māmani, ‘i ho‘o fufū ‘a e ngaahi me‘a peheni mei ha kakai ‘oku poto mo ‘ilo‘ilo, ka ke tatala ki ha kau tamaiki. 26‘Io, ‘e Tamai: tonuhia ho‘o finangalo ke pehē.
27Kuo tuku mai kiate au ‘e he‘eku Tamai ‘a e ngaahi me‘a fuli pē: pea ‘oku ‘ikai ha toko taha ‘e ‘ilo lelei ‘a e Foha, ngata pē ‘i he Tamai; kae‘uma‘ā ‘a e ‘ilo ‘o e Tamai ‘e ha taha, ngata pē ‘i he Foha, pea mo ha taha ‘e loto ‘e he Foha ke faka‘ilo ia ki ai.#Sioné 3.35; 1.18; 10.15
28Ha‘u kiate au, ‘a kimoutolu kotoa pē ‘oku fakaongosia mo mafasia, pea te u fakamālōlō kimoutolu. 29‘Ai ‘eku ‘ioke kiate kimoutolu, pea mou ako ‘iate au: he ‘oku ou fa‘a kātaki mo anga fākatu‘a, pea te mou ‘ilo ha mālōlō ‘i homou laumālie.#Sel 6.16 30He ko e ‘ioke ‘a‘aku ‘oku molū, pea ko e kavenga ‘a‘aku ‘oku ma‘ama‘a.
Currently Selected:
Mātiú 11: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
