KO SIOSIUA 14
14
Ko Hono Vahevahe ‘o e Fonua mei he Fakahihifo ‘o e Vaitafe ko Soataní
1PEA ko eni ‘a e ngaahi tofi‘a na‘e ma‘u ‘e ha‘a ‘Isileli ‘i he fonua ko Kēnani, ‘a ia na‘e vahe kiate kinautolu ‘e ‘Eliesa ko e taula‘eiki mo Siosiua ko e foha ‘o Nuni, mo e hou‘eiki ‘ulumotu‘a ‘o e ngaahi matakali ‘o ha‘a ‘Isileli: 2na‘e tufa talotalo kiate kinautolu ‘o hangē ko e tu‘utu‘uni ‘a Sihova ‘ia Mōsese, ‘io, ki he matakali ‘e hiva mo e vaeua ‘o e matakali.#14.2 talotalo; Ko hono founga mahení ko hono ngāue‘aki ha ngaahi fo‘i maka kuo faka‘ilonga‘i kehekehe ke fakapapau‘i e finangalo o e ‘Otuá. #Nōm 26.52-56; 34.13 3(He kuo vahe tofi‘a ‘e Mōsese ki he matakali ‘e ua mo e vaeua ‘o e matakali, ‘i he kauvai ‘e taha ‘o Soatani, pea na‘e ‘ikai te ne vahe ha tofi‘a ki ha‘a Līvai fakataha mo kinautolu). 4He ko e hako ‘o Siosifa kuo matakali ua, ko Manase mo ‘Ifalemi; pea na‘e ‘ikai vahe tofi‘a ki he kau Līvai ‘i he fonua, ko e ngaahi kolo pe ke nofo ai, pea mo e ngaahi ‘api takatakai ma‘a ‘enau monumanu mo ‘enau koloa.#Nōm 32.33; 34.14-15; Teu 3.12-17 5Hangē ko e tu‘utu‘uni ‘a Sihova ‘ia Mōsese na‘e pehē ‘a e fai ‘a ha‘a ‘Isileli ‘i he‘enau vahe ‘a e fonua.
Ko Hono Vahe ‘o Hepeloni mo‘o Kēlepi
6Pea fe‘unu‘i mai ‘a ha‘a Siuta kia Siosiua ‘i Kilikali: pea fakalea ange kiate ia ‘e Kēlepi ko e foha ‘o Sīfune ko e ha‘a Kēnasi ‘o pehē, ‘Oku ke mea‘i ‘a e me‘a na‘e folofola‘aki mai ‘e Sihova kia Mōsese ko e tangata ‘o ‘Elohimi ‘o kau kiate au mo koe ‘i Kētesipanea.#Nōm 14.30 7Na‘a ku fāngofulu ta‘u ‘i he fekau au ‘e Mōsese, ko e sevāniti ‘a Sihova, ke u ‘alu mei Kētesipanea ke asiasi ‘a e fonua; peau foki mo au ‘a e tala na‘e hoa mo hoku loto.#Nōm 13.1-30 8Ka ko e kāinga na‘e ‘alu hake mo au na‘a nau fakavaivai‘i ‘a e loto ‘o e kakai: ka ko au na‘a ku topuva‘e taha mo Sihova ko hoku ‘Otua. 9Pea na‘e fuakava ‘a Mōsese ‘i he ‘aho ko ia ‘o pehē, ‘Ilo ‘e au ‘o kapau ‘e ‘ikai hoko ‘a e kelekele na‘e tu‘u ai ho va‘e ko ho tofi‘a, mo ho hako ‘o ta‘engata, koe‘uhi kuo te topuva‘e taha mo Sihova ko hoku ‘Otua.#Nōm 14.24 10Pea ko eni, vakai, hangē ko ‘ene folofola, kuo tauhi ‘e Sihova ‘eku mo‘ui ‘i he ta‘u ‘e fāngofulu mā nima ko ē, talu ‘ene fai ‘a e folofola ko ia kia Mōsese, pea lolotonga ‘a e hā‘ele ‘a ‘Isileli ‘i he Toafa: pea ko eni, vakai, kuo u valungofulu-mā-nima ta‘u eni he ‘aho ni. 11‘Oku ou kei mālohi tatau he ‘aho ni mo e ‘aho na‘e fekau ai au ‘e Mōsese: hangē ko hoku ivi he taimi ko ē, ko hoku ivi ai pē ia he taimi ni, pe ke tau pe ke ‘alu ki ‘uta mo foki mai. 12Pea ko ia ke ke tuku kiate au ‘a e mo‘unga ni, ‘a ia na‘e kau ki ai ‘a e folofola ‘a Sihova he ‘aho ko ē he na‘a ke fanongo he ‘aho ko ē, tā ‘oku ‘i ai ‘a e kau ‘Ānaki, mo e ngaahi kolo lalahi kuo ‘aa‘i: hei‘ilo ‘e kau ‘a e ‘Eiki mo au, pea te u kapusi kinautolu ‘o hangē ko ‘ene folofola.
13Pea fai ‘e Siosiua hono tāpuaki‘i, ‘o ne vahe ‘a Hepeloni kia Kēlepi ko e foha ‘o Sīfune moono tofi‘a. 14(‘A ē ā na‘e tō ai ‘a Hepeloni kia Kēlepi ko e foha ‘o Sīfune, ko e ha‘a Kēnasi, ko hono tofi‘a ‘o a‘u ki he ‘aho ni; koe‘uhiā na‘a ne topuva‘e taha mo Sihova ko e ‘Otua ‘o ‘Isileli, 15Ka ko e hingoa mu‘a ‘o Hepeloni ko e Kiliati-A‘apa (ko e kolo ‘o ‘Ā‘apa; ko e tangata lahi ia ‘i he kau ‘Ānaki). Pea na‘e mālōlō ‘a e fonua mei he tau.
Currently Selected:
KO SIOSIUA 14: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
