KO SIONA 4
4
Ko e ‘Ita ‘a Siona mo e ‘Alo‘ofa ‘a e ‘Otuá
1KA na‘e kovi‘ia lahi ai ‘a Siona, pea ne ‘ita. 2Pea ne lotu kia Sihova, ‘o pehē, Fakamolemole, ‘Eiki, ‘ikai ko ‘eku lea ia ‘i he‘eku kei ‘i hoku fonua? Ko hono ‘uhinga ia na‘a ku sinaki hola ai ki Tāsisi; he na‘a ku ‘ilo ko e ‘Otua ‘ofa ‘a e ‘Afiona, mo fa‘a fakamolemole, ko e fakatotoka ki he houhau, pea mohu angalelei, pea ko ho anga ke lolou ‘i ha fai tautea.#‘Eki 34.6 3Pea ko eni, ‘Eiki, ke ke to‘o atu mu‘a ‘eku mo‘ui; he ‘oku lelei kiate au ke mate ‘i ha‘aku mo‘ui atu.#1 Tu‘i 19.4
4Pea folofola ‘a Sihova, ‘Oku tonuhia ‘a ho‘o ‘ita na?
5Pea hū ki tu‘a ‘a Siona mei he kolo, ‘o ne nofo mei he potu hahake ‘o e kolo, ‘o ne ngaohi ai mo‘ona ha me‘i fale lou‘akau, ‘o ne nofo ‘i hono malumalu kae‘oua ke ne vakai pe ko e hā ‘e hoko ki he kolo. 6Pea tokonaki ‘e Sihova ‘Elohimi ha fu‘u lepo, ‘o ne fakakaka hake mei ‘olunga kia Siona, ke fakamalumalu ki hono ‘ulu, ke fakalelulelu ki he‘ene mamahi. 7Pea fiefia lahi ‘a Siona ‘i he lepo, Ka ka tokonaki ‘e he ‘Otua ha ‘unufe ‘i he ma‘a ‘a e ‘aho ‘apongipongi, pea ne keina ‘a e lepo, pea mae. 8Pea ‘i he faifai, pea ‘alu hake ‘a e la‘ā, pea kuo tokonaki ‘e he ‘Otua ha matangi ‘a‘afu fakahahake; pea taa‘i ‘e he la‘ā ‘a e ‘ulu ‘o Siona, pea ne vaivaia, pea ne kole ke mole ‘ene mo‘ui,#4.8 kole ke mole ‘ene mo‘ui; pe faka‘amu ange ke ne mate. he‘ene pehē, ‘E lelei ‘eku mate ‘i he‘eku mo‘ui.
9Pea folofola ‘a e ‘Otua kia Siona, ‘Oku tonuhia ho‘o ‘ita ‘i he lepo?
Pea pehē ‘e ia, ‘Oku tonuhia ‘eku ‘ita, ‘o a‘u ki he mate.
10Pea folofola ‘a Sihova, Na‘a ke mamae koe ki he lepo, ‘a ia na‘e ‘ikai te ke ongosia ai, pea na‘e ‘ikai te ke fakafu‘ulahi, ‘a ia na‘e tupu ia ‘i ha fo‘i pō, pea mole ‘i ha fo‘i pō. 11Pea ‘ikai ā te u mamae koā ‘e au ki Ninive, ‘a e fu‘u kolo ni; ‘a ia ‘oku ‘i ai ha kakai ‘e taha kilu mā ua mano tupu, ‘a e fa‘ahinga ‘oku ‘ikai te nau ‘ilo honau nima to‘omata‘u mo e to‘ohema, mo e fu‘u fanga manu foki?
Currently Selected:
KO SIONA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
