KO SIOPE Ko e Talateu
Ko e Talateu
Ko e Tohi ‘o Siopé ko e talanoa ki ha tangata lelei na‘á ne a‘usia ‘a e faingata‘a taupotu–ko e mole kotoa ‘ene fānaú mo ‘ene koloá pea toe tu‘ia hono mahaki palakū. Pea ‘oku fakahaa‘i ‘e he fa‘utohí ‘i ha ngaahi tālanga hokohoko ‘e tolu ‘a e anga hono tali ‘e he ngaahi kaungāme‘a e tolu ‘o Siopé, mo Siope pē, ‘a e ngaahi faingata‘a ko ‘eni. Ko e me‘a ‘oku iku ki aí ko e hā mai kia Siope ‘a e ‘Otuá tonu, pea ko e kaveinga tu‘ukimu‘a ‘o e ngaahi tālangá ko e ngaahi fefāinga ‘a e ‘Otuá mo e fa‘ahinga ‘o e tangatá.
‘Oku faka‘uhinga‘i ‘e he ngaahi kaume‘a ‘o Siopé ‘a ‘ene mamahí ‘aki ‘a e ngaahi fakakaukau fakalotu tukufakaholo. Ko ‘enau laú, ko e ‘Otuá ‘okú ne fakapale‘i ma‘u ai pē ‘a e fai leleí ka ne tautea ‘a e faikoví, pea ‘i he‘ene peheé leva tā ko e ‘uhinga pē ‘o e ngaahi mamahi ‘o Siopé ko ha‘ane ngaahi fai angahala. Ka kia Siope ia ko e faka‘uhinga tasīsī eni; tokua ‘oku ‘ikai ke taau mo ia ke ne fuesia ha fu‘u tautea kovi pehē, he tokua ko e tokotaha ia na‘e hulu atu ‘ene fai leleí mo ‘ene faitotonú. Na‘e faingata‘a ke mākupusi ‘e hono ‘atamaí ‘e faifai pea faka‘atā ‘e he ‘Otuá ke hoko ha kovi lahi pehē ki ha taha ‘o hangē ko iá, peá ne loto lahi ai ke pole‘i ‘a e ‘Otuá. Na‘e ‘ikai li‘aki ‘e Siope ‘ene tuí, ka na‘e hoholi hono lotó ke fakatonuhia‘i ia ‘i he fofonga mai ‘a e ‘Otuá pea fakafoki mai hono ongoongoleleí.
Na‘e ‘ikai ke tali fakahangatonu ‘e he ‘Otuá ‘a e fakafehufehu‘i ‘a Siopé, ka ne tali ‘ene tuí ‘aki ‘ene fakahā ange ki ai ha fu‘u vīsone mālie ‘o hono māfimafi mo hono poto faka-‘Otuá. Pea na‘e toki fakamo‘oni‘i fakatōkilalo leva ‘e Siope ‘a e poto mo māfimafi ‘a e ‘Otuá mo ne fakatomala‘i ‘ene ngaahi lea papūnoa mo fakatahamuhamu na‘e fai he‘ene tālanga mo hono ngaahi kaume‘á.
Ko e tātuku ‘o Tohi ‘o Siopé ko e talanoa ki hono toe fakafoki ‘o Siope ki he tu‘unga fuoloa ‘o ‘ene mo‘uí, ‘o toe lahi ‘ene mo‘umo‘ua ko ‘ení ‘i he‘ene mo‘umo‘ua ko eé. Ne valoki‘i lahi ‘e he ‘Otuá ‘a e ngaahi kaungāme‘a ‘o Siopé koe‘uhí ko e ‘ikai ke nau lava ‘o maa‘usia ‘a e ‘uhinga ‘o e ngaahi faingata‘a‘ia ‘o Siopé. Ko Siope pē na‘e ataata ki ai ‘a e makehe atu pē ‘a e ‘Otuá ia ‘i he ngaahi fakakaukau kotoa kiate ia na‘e fai mai ‘i he anga ‘o e lotu tukufakaholó.
Ko e Kakano ‘o e Tohí
Ko e Talateu (1.1–2.13)
Ko Siope Mo Hono Ngaahi Kaugāme‘a (3.1–31.40)
a. Ko e hanu ‘a Siope (3.1-26)
e. Ko e ‘uluaki tālanga (4.1-14.22)
f. Ko e tālanga hono ua (15.1–21.34)
h. Ko e tālanga hono tolu (22.1–27.23)
i. Ko hono fakahīkihiki‘i ‘o e potó (28.1-28)
k. Ko e fakamatala faka‘osi ‘a Siopé (29.1–31.40)
Ko e lea ‘a ‘Ēlihu (32.1–37.24)
Ko e Tali ‘a e ‘Otuá kia Siope (38.1–42.6)
Ko e Tātuku (42.7-17)
Currently Selected:
KO SIOPE Ko e Talateu: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.