KO SIOPE 24
24
1KO E hā kuo ‘ikai tuku tauhi ai meia Sātai
Ha ngaahi taimi tu‘utu‘uni?
‘O ‘ikai sio ki hano ngaahi ‘aho fakamaau
‘E he kakai ‘oku lave‘i ia?
2‘Oku ai ha ni‘ihi ‘oku hiki kau‘ā;
‘Oku nau fa‘ao tākanga manu, ‘o fafanga.
3‘Oku nau ‘ave ‘a e ‘asi ‘a e kau tamai mate,
‘Oku nau ta‘ofi ‘a e pulu toho palau ‘a e uitou mo‘o talifaki.
4‘Oku nau heu‘i ‘a e masiva mei he hala;
Kuo pau ke mātu‘aki toi ‘a e mā‘ulalo ‘o e fonua.
5Vakai ‘enau ‘alu atu ‘enau ngāue!
Ko e fanga ‘asi kaivao tofu pē,
Si‘enau uhu atu ko e faka‘ete ‘a‘alu:
Ko e fonua mamate ko e ma‘unga me‘akai
‘A si‘i motu‘a ki he fānau.
6‘I he vao tōkanga te nau utu mai ‘a e ta‘u ‘a manu ‘a e matāpule kovi;#24.6 ‘I he vao… kovi; pe ‘Oku nau si‘i tānaki he ngou‘anga kehe. ‘A ia, ‘oku fa‘ao honau kelekele ‘onautolú pea nau si‘i ngāue ai pē he kakai kehe ki he totongi si‘isi‘i ‘aupito.
Pe te nau fakaeve ‘ene ngoue vaine.
7‘Oku nau mohe telefua ko e ‘ikai hanau kofu,
Pea ‘oku ‘ikai hanau kafu ‘i he momoko.
8‘Oku nau viku ‘i he vaivao ‘o e mo‘unga,
‘Oku nau lafi ki he makatu‘u ko e ‘ikai hanau palehahau.
9‘Oku ai ha ni‘ihi te nau hamusi ‘a e tamai mate mei he huhu ‘ene fa‘ē,
‘O nau to‘o mo‘o talifaki ‘a e me‘a ‘oku ‘ai ‘e he masiva:
10Ko ia, ‘oku femoulu‘i atu ‘a e fa‘ahinga ko ē ‘oku nau telefua ‘aupito,
Pea ‘oku nau fiekaia neongo ‘oku nau fetuku ‘a e ‘ū koane;
11‘Oku nau ngaohi lolo kae ‘aa‘i kinautolu ‘e he fa‘ahinga ko ē;
‘Oku nau fai ‘a e malaki ‘i he tata‘o‘anga uaine, kae fie inu pē.
12‘Oku ongo mai mei he kolo kakai ha ni‘ihi ‘oku to‘e,
Pea ‘oku mahe‘a mai ‘a e laumālie ‘o e kau kafo:
Ka tala‘ehai ‘oku toka‘i ‘e ‘Elohā ‘ene ngali kehe.
13Ko e fa‘ahinga ‘e taha kuo hoko ‘o tu‘u ki he maama;
‘Oku ‘ikai te nau fie ‘ilo hono ngaahi ‘alunga,
Pea ‘oku ‘ikai te nau nofo ki hono ngaahi afenga makini.
14Kei hengihengi ‘oku tu‘u hake ‘a e fakapō,
‘Oku ne tāmate‘i ‘a e mā‘ulalo mo e masiva;
Pea ‘i he pō ‘oku ne fai hangē ha kaiha‘a.
15Ko e mata foki ‘o e tono fefine ‘oku ne tatali ki he ataata,
He‘ene pehē, ‘E ‘ikai sio ha mata kiate au:
‘Oku ne ‘ai foki ha nge‘esi mata.
16‘I he po‘uli ‘oku nau toli ‘a e holisi ‘oni fale:
‘Aho, ‘oku nau nofo loki;
‘Oku ‘ikai te nau fie ‘ilo ki he maama.
17He ko e pongipongi ‘oku tatau kiate kinautolu mo e kaupō‘uli;
He ‘oku nau maheni mo e nānunga ‘o e kaupō‘uli.
Ko Sofa‘a#24.18 Sofa‘a; ‘Oku ‘ikai ke tu‘u e hingoa ‘o Sofa‘á he potu tohí ni, ka ‘oku tui ‘a e kau vete Tohitapu tokolahi ko e lea eni ‘a‘ana.
18‘Oku ne ‘auhia hangē ha me‘a ma‘ama‘a;
‘Oku taku mala‘ia honau tofi‘a ‘i he fonua:
Tala‘ehai ‘oku ne kei ‘alua ‘a e hala ‘o e ngaahi ngoue vaine.#24.18 ‘Oku fihi e kupu‘i lea ko ení.
19Ko e tatanu mo e pupuha ‘oku na fōngia hifo ‘a e vai sinou:
Pehē ‘a e fai ‘a Hētesi ki he kau angahala na.
20‘Oku ngalo ia ‘i he fatu na‘a ne ‘i ai;
‘Oku misi ia ‘e he kelemutu;
‘Oku ‘ikai kei manatua:
Ko ia, ‘oku motuhi hangē ha ‘akau ‘a e koto kovi na.
21‘Osi, ko ia na‘a ne keikeina ‘a e pa‘a na‘e ‘ikai ke fanau;
‘O ‘ikai te ne fai ha lelei ki si‘i uitou.
22Seuke, ‘oku toloaki ‘e He‘ene ‘Afio ‘a e mafi ‘aki Hono ivi:
‘Oku ne toetu‘u; ‘osi, na‘e ‘ikai te ne ‘amanaki te ne mo‘ui.
23‘Oku ne ‘ange ki ai ha nonga,
Pea ‘oku ne tu‘u mo e poupou;
Pea ‘oku nau fou atu ‘i honau hala
Kae sio ki ai ‘a ‘Ene ‘Afio.
24‘Oku hākeaki‘i kinautolu;
Ko e taimi si‘i pea nau ‘ikai;
Pea ka nau ka tālolo,
‘Oku utu kinautolu ‘o hangē ha kakai kehe,
‘O kamu‘i hangē ko e ‘ulu‘i uite.
25Pea kapau ‘oku ‘ikai ko ia,
Ko hai te ne fakamo‘oni ‘eku loi,
‘O faka‘ikai ‘eku lea?
Currently Selected:
KO SIOPE 24: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
