Sioné 13
13
Ko e Tafitafi ‘e Sīsū ‘a e Va‘e ‘o ‘Ene Kau Akó
1PEA ko eni, ‘i he te‘eki fai ‘a e kātoanga ‘o e Pāsova, ko e me‘a ‘i he‘ene mea‘i ‘e Sīsū kuo hokosia hono taimi ke hiki mei he maama ko eni ‘o ‘alu ki he Tamai, pea ko e me‘a ‘i he‘ene ‘ofa ki hono kakai ‘o‘ona ‘oku ‘i māmani; ko ia na‘a ne fai ‘ene ‘ofa taupotu kiate kinautolu.
2Pea ‘i he fai ha kai; pea kuo ‘osi ‘ai ‘e he Tēvolo ki hono loto ke lavaki‘i ia ‘e Siutasi, ko e foha ‘o Saimone, ‘a ‘Isikāliote;#13.2 kuo ‘osi… ‘Isikāliote; pe Ne ‘osi fakapapau‘i ‘e he Tēvoló ko Siutasi, ‘a e foha ‘o ‘Isikalioté, te ne lavaki‘i ‘a Sīsuú. 3pea ‘i he ‘ilo ‘e Sīsū, kuo tuku kiate ia ‘e he‘ene Tamai ‘a e me‘a kotoa pē ke ne fa‘iteliha ai, pea kuo ne ha‘u mei he ‘Otua pea ‘oku ne ‘alu ki he ‘Otua; 4ko ia na‘a ne tu‘u mei he kai, ‘o ne tuku hono ngaahi kofu tu‘a; ‘o ne to‘o ha tauveli, ‘o ne no‘o. 5Pea ne toki lilingi ha vai ki he kumete, ‘o ne hanga ‘o fufulu ‘a e va‘e ‘o e kau ako, mo ne holoholo ‘aki ‘a e tauveli kuo ne no‘o ‘aki. 6Pea ne ha‘u ai kia Saimone Pita: pea lea ia ki ai, ‘Eiki, ko ho‘o fufulu ‘e koe hoku va‘e koā?
7Pea tali ‘e Sīsū ‘o pehē kiate ia, Ko e me‘a ‘oku ou fai ‘oku ‘ikai te ke ‘ilo ‘e koe ‘i he taimi ni; ka ‘e faifai pea mahino ‘amui.
8Pea lea ‘a Pita ki ai, ‘e ‘ikai ‘aupito te ke fufulu hoku va‘e ‘o ta‘engata.
Pea tali ‘e Sīsū ki ai, Kapau ‘e ‘ikai te u fufulu koe, tā ‘oku ‘ikai ha‘o kau mo au.
9Pea pehē ange ‘e Saimone Pita, ‘Eiki, ‘oua ‘e ngata ‘i hoku va‘e pē, kae fai ki hoku ongo nima ni mo hoku ‘ulu.
10Pea me‘a ki ai ‘a Sīsū, Ko ia kuo pālutu, koe‘uma‘ā ‘ene toe fufulu ia ngata pē ‘i hono va‘e,#13.10 ngata pē ‘i hono va‘é; ‘Oku ‘ikai ke ‘asi ‘a e kupu ko ení ‘i he ngaahi hiki fuoloa ‘e ni‘ihi. ka kuo ma‘a hono kotoa: pea ‘oku ma‘a foki ‘a kimoutolu, ka ‘oku ‘ikai te mou pehē kotoa pē. 11He na‘a ne mea‘i ‘a e toko taha ‘e lavaki‘i ia; ko ia na‘a ne pehē ai, ‘Oku ‘ikai te mou ma‘a kotoa pē.
12Pea kuo ‘osi leva ‘ene fufulu honau va‘e, mo ‘ene ‘ai hono kofu ‘o toe tokoto, pea ne folofola kiate kinautolu, ‘Oku mahino kiate kimoutolu ‘a e me‘a kuo u fai kiate kimoutolu?#Luk 22.27 13‘Oku mou ui au ko Lāpai, mo ‘Eiki; pea ‘oku totonu ho‘omou lea pehē; he ko au ia. 14Pea kapau ā kuo u fufulu homou va‘e, ‘a au ko e ‘Eiki mo e Lāpai; pea ‘oku totonu ke fai ‘e kimoutolu foki, ‘o fefufulu‘aki homou va‘e ‘omoutolu. 15He kuo u tuku hamou fa‘ifa‘itaki‘anga, koe‘uhi ke mou fai foki, ‘o hangē ko ‘eku fai kiate kimoutolu. 16Ko au ē, ko au ē, ‘oku ou tala atu, ‘Oku ‘ikai ha tamaio‘eiki ‘e lahi ‘i he‘ene ‘eiki, pe ha talafekau ‘iate ia na‘a ne fekau‘i ia.#Māt 10.24; Luk 6.40; Sioné 15.20 17Kapau ‘oku mou ‘ilo ‘a e ngaahi me‘a ko ia, pea ko e toki kakai monū‘ia kimoutolu, ‘o kapau te mou fai ia.
18‘Oku ‘ikai kau ‘eku lea kiate kimoutolu kotoa pē: ‘oku ou ‘ilo pē ‘e au ‘a e anga ‘o kinautolu ne u fili: ka ko hono ‘uhinga, koe‘uhi ke fakamo‘oni ki he potu tohi, Ko ia ‘oku kai ‘eku mā kuo ne hiki hono muiva‘e kiate au.#Saame 41.9 19Ko ‘eku kamata ‘eni ke fakahā ia kiate kimoutolu ‘i he te‘eki hoko, koe‘uhi ‘oka hoko ia ke mou tui ko au ia. 20Ko au ē, ko au ē, ‘oku ou tala atu, Ko ia ‘oku ne tali ha toko taha pē te u fekau, ‘oku ne tali au; pea ko ia ‘oku ne tali au, ‘oku ne tali ‘a ia na‘a ne fekau mai au.#Māt 10.40; Ma‘ake 9.37; Luk 9.48; 10.16
Ko e Tala ki Mu‘a ‘e Sīsū Hono Lavaki‘í
(Māt 26.20-25; Ma‘ake 14.17-21; Luk 22.21-23)
21‘I he folofola pehē ‘e Sīsū, na‘e takatu‘u hono laumālie, pea ne fakapapau mai ‘o pehē, Ko au ē, ko au ē, ‘oku ou tala atu, Ko e toko taha ‘iate kimoutolu te ne lavaki‘i au.
22Pea fesiofaki ai ‘a e kau ako kuo nau fiu‘a fili, pe ko ‘ene lau kia hai? 23Na‘e ai ha toko taha ‘o ‘ene kau ako na‘e tokoto ‘i he ‘ao ‘o Sīsū, ko e toko taha na‘e ‘ofa ai ‘a Sīsū. 24Ko ia na‘e kamo ‘a Saimone Pita ki he toko taha ko ia, ‘o ne pehē ki ai, Tala, pe ko hai ia ‘oku ne me‘a ki ai.
25Pea hanga ‘a e toko taha ko ia ‘i he‘ene tokoto pehē, ‘o ne faaki atu ki he fatafata ‘o Sīsū, mo ne pehē ki ai, ‘Eiki, ko hai ia?
26Pea tali ‘e Sīsū, Ko ia ia ‘a ia te u unu ‘eku konga mā ‘o ‘ange ma‘ana. Pea ne unu ai ‘ene konga mā, ‘o ne to‘o, ‘o ‘ange kia Siutasi ko e foha ‘o Saimone ‘Isikāliote. 27Pea hili ‘ene ‘ange ‘a e konga mā, mo e hū leva ki he siana ko ia ‘a Sētane. Pea folofola ai ‘a Sīsū kiate ia, Fai vave ange ‘a e me‘a ‘oku ke fai, 28pea na‘e ‘ikai mahino ki ha taha ‘iate kinautolu na‘e tākoto ‘i he kai pē ko ‘ene lea ki ai ke hā. 29He na‘e mahalo ‘a e ni‘ihi, ko e me‘a ‘i he ‘ia Siutasi ‘enau puha pa‘anga, ko ia ko e lea ‘a Sīsū ki ai ‘oku pehē, Fakatau mu‘a ‘a e ngaahi me‘a kuo te‘eki ke tau ma‘u ki he kātoanga; pē ko e pehē ke ne ‘ange ha me‘a ki he masiva.
30Pea ‘i he to‘o ‘a e konga mā ‘e he siana ko ia na‘a ne ‘alu atu leva kitu‘a: pea kuo po‘uli.
Ko ha Fekau Fo‘ou
31Pea kuo ne ‘alu atu ki tu‘a, pea folofola ‘a Sīsū, Ko eni kuo fakalāngilangi‘i ‘a e Fanautama ‘a Tangata, pea kuo fakalāngilangi‘i ‘a e ‘Otua ‘iate ia: 32pea ‘e fakalāngilangi‘i ia ‘e he ‘Otua ‘i he ‘ene ‘Afio, pea ‘e vave ni ‘ene fakalāngilangi‘i ia. 33Si‘i fānau, ‘oku kei toe si‘i ‘eku ‘iate kimoutolu. Te mou kumi au: kae hangē ko ‘eku lea ki ha‘a Siu, ‘o pehē, Ko e potu ‘oku ou ‘alu ki ai, ‘e ‘ikai te mou lava ke a‘u ki ai; ‘oku pehē foki ‘eku lea ni kiate kimoutolu.#Sioné 7.34 34Ko e tu‘utu‘uni fo‘ou ‘oku ou tuku kiate kimoutolu, Ke mou fe‘ofa‘aki: hangē ā ko ‘eku ‘ofa‘i kimoutolu, ke pehē foki ho‘omou fe‘ofa‘aki.#Sioné 15.12,17; 1 Sione 3.23; 2 Sione 5 35Ko e me‘a ko ē ‘e ‘ilo ai ‘e he kakai kotoa pē ko e kau ako kimoutolu ‘a‘aku, ‘o kapau ‘e ai ha‘amou fe‘ofa‘aki.
Ko e Fakapapau ‘a Pita
(Māt 26.31-35; Ma‘ake 14.27-31; Luk 22.31-34)
36Pea lea ki ai ‘a Saimone Pita, ‘Eiki, ko ho‘o me‘a ki fē?
Pea tali ‘e Sīsū, Ko e potu ‘oku ou ‘alu ki ai ‘e ‘ikai te ke lava ke muimui mai ki ai ‘i he taimi ni; ka te ke muimui ki ai ‘amui.
37Pea lea ki ai ‘a Pita, ‘Eiki, ko e ‘ikai te u lava ke muimui atu ki ai ‘i he taimi ni, ko e hā? Na‘a mo ‘eku mo‘ui te u li‘aki ia ma‘au.
38Pea tali ‘e Sīsū, Te ke li‘aki koā ho‘o mo‘ui koe‘uhi ko au, ‘o? Ko au ē, ko au ē, oku ou tala atu, ‘e ‘ikai ‘aupito ‘u‘ua ‘a e moa, kae‘oua ke ke fakafisinga au, ‘o tu‘o tolu mālō.
Currently Selected:
Sioné 13: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.