KO SELEMAIA 7
7
Ko ha Malanga ‘a Selemaia ‘i he Temipalé
1KO E folofola na‘e hoko kia Selemaia meia Sihova, ‘o pehē, 2Tu‘u ‘i he matapā ‘o e fale ‘o Sihova, ‘o tala ai ‘a e lea ko eni, pea ke pehē, Fanongo ki he folofola ‘a Sihova, ‘a e Siuta kotoa ‘oku hū ‘i he matapā ni ke fai lotu kia Sihova. 3Ko e folofola eni ‘a Sihova Sāpaoti, ko e ‘Otua ‘o ‘Isileli: Ngaohi ke lelei homou ngaahi ‘alunga, mo ho‘omou ngaahi fai anga, pea te u ‘ai ke mou nofo ma‘u ‘i he potu ni. 4‘Oua na‘a tu‘u ho‘omou falala ki he ngaahi lea loi, ‘a e pehē mai–
Ko e temipale ‘o Sihova
Ko e temipale ‘o Sihova
Ko e temipale ‘o Sihova eni.
5Ka ‘o kapau te mou mātu‘aki ngaohi ke lelei homou ngaahi ‘alunga, mo ho‘omou ngaahi fai anga; kapau te mou mātu‘aki fakamaau totonu ‘a e vā ‘o e tangata mo e tangata; 6kapau ‘oku ‘ikai te mou fakamālohia ‘a e vūlangi, ‘a e tamai mate mo e uitou, ‘o ‘ikai te mou lilingi ‘a e toto ‘o e ta‘ehalaia ‘i he potu ni, ‘o ‘ikai te mou muimui ki he ngaahi ‘otua kehe, ‘a ia ko e me‘a te mou kovi ai: 7pea te u toki ‘ai ke mou nofo ma‘u ‘i he potu ko eni, ‘a e fonua kuo u ‘atu ki ho‘omou ngaahi kui ke nau ma‘u mei ‘ītāniti ki ‘ītāniti.
8Vakai, ‘oku tu‘u ho‘omou falala ki he ngaahi lea loi; ‘osi, ko e ngaahi me‘a ta‘e‘aonga. 9He ‘oku pehē ha me‘a? ke kaiha‘a, ke fai ha fakapō, pea ke tono ‘unoho, pea ke fuakava ki ha loi, pea ke tutu ‘inisēnisi kia Peali, pea ke muimui ki he ngaahi ‘otua kehe, ha ni‘ihi na‘e ‘ikai te mou ‘ilo ki ai, 10pea ke toki hū mai, ‘o tu‘u ‘i hoku ‘ao ‘i he fale ko eni, ‘a ia ‘oku ui‘aki hoku hingoa, pea mou toki pehē, Kuo tau mo‘ui; koe‘uhiā ke fai atu ‘a e ngaahi fu‘u fakalielia ko ē? 11Tā ‘apē ko e fale ni, ‘a ia ‘oku ui‘aki hoku hingoa, kuo hoko ‘i ho‘omou vakai ko e ‘ana ‘o e kau fakapō? Tala atu, ko au eni kuo u sio ki ai–ko Sihova ia mei he Ta‘ehāmai.#Māt 21.13; Ma‘ake 11.17; Luk 19.46 12Ko ia mou ō mu‘a ki hoku feitu‘u na‘a ku ma‘u ‘i Sailo,#7.12 Sailo; Ko e kolo ia na‘e tuku ai e ‘A‘ake ‘o e Fuakavá ‘i he kuonga ‘o ‘Īlaí (vakai kia 1 Sām 1.3). Na‘e faka‘auha ‘a e koló, ‘e he kakai Filisitiá nai. ‘a ia na‘a ku tuku ke nofo ai hoku hingoa ‘i he kamata‘anga, pea mou vakai ki he me‘a kuo u fai ki ai, koe‘uhi ko e kovi ‘a hoku kakai ‘Isileli.#Sios 18.1; Saame 78.60; Sel 26.6 13Pea ko eni, ko e me‘a ‘i ho‘omou fai ‘a e ngaahi fu‘u me‘a ko eni–ko Sihova ia mei he Ta‘ehāmai–pea na‘a ku lea kiate kimoutolu, ‘o te ‘ā hengihengi ke lea, kae ‘ikai te mou ongo‘i; ‘io, na‘a ku ui kimoutolu, kae ‘ikai te mou tali: 14ko ia te u fai ki he fale ni–‘a ia ‘oku ui‘aki hoku hingoa, ‘a ia ‘oku mou tui ki ai–‘io, te u fai ki he potu ni, ‘a ia kuo u ‘atu kiate kimoutolu mo ho‘omou ngaahi kui, hangē ko ‘eku fai ki Sailo. 15Pea te u li‘aki kimoutolu mei hoku ‘ao, ‘o hangē kuo u li‘aki homou fu‘u kāinga na ‘a e hako kotoa ‘o ‘Ifalemi.
Ko e Talangata‘a ‘a e Kakaí
16Pea ko koe, ‘oua te ke hufekina ‘a e kakai ni, pea ‘oua te ke ofa‘aki ha‘o tangi pe lotu koe‘uhi ko kinautolu, pea ‘oua te ke o‘i au; he ‘oku ‘ikai te u ongo‘i koe. 17‘Ikai ‘oku ke sio ki he me‘a ‘oku nau fai ‘i he ngaahi kolo ‘o Siuta mo e ngaahi hala ‘o Selusalema? 18Ko e fānau tangata ‘oku okooko, pea ‘oku tafu ‘a e afi ‘e he mātu‘a, pea ko e kau fefine ‘oku nau natu ‘a e takaonga, ke ngaohi keke ‘aki ki he kuini ‘o langi, pea ke fakatau feilaulau–kava ki he ngaahi ‘otua kehe, koe‘uhiā ke faka‘ita ‘aki au.#Sel 44.7-19 19He ko au pē ‘oku nau faka‘ita?–ko Sihova ia mei he Ta‘ehāmai–‘ikai ko kinautolu pē? he ko hono ‘ātunga ē ‘a e laea honau mata. 20Ko ia, ko eni ‘a e folofola ‘a ‘Ātonai Sihova: Vakai, ‘e malingi ‘i he potu ni ‘eku ‘ita mo hono kakaha, ki he tangata pea ki he manu, pea ki he ‘akau ‘o e vao pea ki he fua ‘o e kelekele; pea ‘e vela ia ‘o ‘ikai mafu‘ifu‘i.
21Ko e folofola eni ‘a Sihova Sāpaoti, ko e ‘Otua ‘o ‘Isileli: ‘Ai fakataha ho‘omou ngaahi feilaulau-mōifua mo ho‘omou ngaahi feilaulau kehe, pea kai hono kakano. 22He tala‘ehai na‘a ku lea ki ho‘omou ngaahi kui, pea tala‘ehai na‘a ku fai tu‘utu‘uni kiate kinautolu ‘i he ‘aho na‘a ku fakahao mai kinautolu mei ‘Isipite, ‘o kau ki ha feilaulau-mōifua pe ko ha feilaulau kehe: 23ka ko eni pē ‘a e lea na‘a ku fonosi‘aki kinautolu, ‘o pehē, Mou fakaongo ki he‘eku lea, pea te u hoko ko homou ‘Otua, pea ko kimoutolu te mou hoko ko hoku kakai: pea mou fou ‘i he ‘alunga kotoa kuo u tu‘utu‘uni atu, koe‘uhi ke mou tu‘umālie. 24Ka na‘e ‘ikai te nau fakaongo, pea na‘e ‘ikai te nau fokotu‘u telinga mai; ka nau fou ‘i he ngaahi fakakaukau ‘a e ta‘emīngao honau loto kovi, ‘o nau fuli mai honau tu‘a, ‘o ‘ikai ko honau mata. 25Talu ‘a e ‘aho na‘a ku fakahao mai ai ho‘omou ngaahi kui mei ‘Isipite ‘o a‘u mai ki he ‘aho ni, mo ‘eku fekau atu kiate kimoutolu ‘eku kau sevāniti kotoa ko e kau palōfita, ‘o te ‘ā hengihengi ‘i he ‘aho kotoa pē, ‘o fekau atu: 26ka na‘e ‘ikai te nau fakaongo kiate au, pea na‘e ‘ikai te nau fokotu‘u telinga mai, ka nau fakakekeva honau kia: na‘a nau faikovi ange ‘i he‘enau ngaahi kui.
27Pea neongo ho‘o fai kiate kinautolu ‘a e ngaahi fu‘u lea ko eni, ka tala‘ehai te nau fakaongo kiate koe; pea neongo ho‘o ui kiate kinautolu, kae ‘ikai te nau tali. 28Ko ia, ke pehē ho‘o lea kiate kinautolu, Ko e kakai eni ‘oku ‘ikai ke fakaongo ki he lea ‘a Sihova ko honau ‘Otua, pea ‘oku ‘ikai ke tali akonaki: kuo ka‘anga ‘a e fai tōnunga, pea na‘a mo honau ngutu ‘e motu mei ai.
Ko ha ngaahi ‘Ulungāanga Angahala‘ia na‘e Fai ‘i Tele‘a Hīnomi
29Fefine, kosi ho lāngilangi, ‘o li‘aki, pea ofa‘aki ha tangilāulau ‘i he ngaahi mo‘unga molemole; he kuo fakatale‘i ‘e Sihova mo li‘aki ‘a e to‘utangata ‘oku ne houhau ki ai.
30He ko ha‘a Siuta ‘oku nau fai ‘a e me‘a ‘oku tau kovi kiate au–ko Sihova ia mei he Ta‘ehāmai: kuo nau ‘ai ‘enau ngaahi fakalielia ‘i he fale ‘oku ui‘aki hoku hingoa, ke ‘uli‘i ia. 31Pea kuo nau tanu ‘a e ngaahi ‘esi ‘i Tōfeti, ‘a ia ‘oku ‘i he Tele‘a ‘o e foha ‘o Hīnomi, ke fakamomofi ‘enau fānau tangata mo ‘enau fānau fefine ‘i he afi: ‘a ia ko e me‘a na‘e ‘ikai te u tu‘utu‘uni, pea na‘e ‘ikai ake ia ‘i hoku loto.#Lev 18.21; 2 Tu‘i 23.10; Sel 32.35 32Ko ia, vakai, ‘oku hoko mai ha taimi–ko Sihova ia mei he Ta‘ehāmai–‘e ‘ikai te nau kei lau ai ki Tōfeti, mo e Tele‘a ‘o e foha ‘o Hīnomi, ka te nau ui ia ko Tele‘a Tāmate, pea te nau tanu kakai ‘i Tōfeti, kae ‘ikai hao.#7.32 kae ‘ikai hao; pe ko e ‘ikai ha potu ki ai. 33Pea ‘i he taimi ko ia, ko e ngaahi ‘anga‘anga ‘o e kakai ni ‘e tuku ke me‘akai ‘aki ‘e he manupuna ‘o e ‘atā, mo e manu ‘o e fonua; ‘o ‘ikai ha taha ke sese‘e. 34Pea te u ‘ai ke ‘ikai kei ongo mai ‘i he ngaahi kolo ‘o Siuta mo e hala ‘o Selusalema ‘a e le‘o ‘o e fiefia, mo e le‘o ‘o e mavava, ‘a e le‘o ‘o e ‘eiki ta‘ane, mo e le‘o ‘o e ta‘ahine: ‘e hoko ‘a e fonua ko e lala.#Sel 16.9; 25.10; Fkhā 18.23
Currently Selected:
KO SELEMAIA 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
