KO SELEMAIA 5
5
Ko e Fai Angahala ‘a Selusalemá
1MOU lele holo ‘i he ngaahi hala ‘o Selusalema, ‘o mou vakai mu‘a mo ‘ilo, ‘o kumi ‘i hono ngaahi mala‘e, pe te mou ma‘u ha taha, pe ‘oku ai ha taha ‘oku fai ‘o taau mo e lao, ha taha ‘oku feinga ke fai tōnunga; ka pehē, te u fakamolemole ‘a e kolo. 2Pea kapau ‘oku nau pehē, Tangi ‘a e mo‘ui ‘a Sihova; tala atu ko ‘enau fuakava ki ha loi. 3‘E Sihova, ‘ikai ‘oku ke hanga ki he fai tōnunga? Kuo ke taa‘i kinautolu, ka ‘oku ‘ikai te nau ongo‘i mamahi ai; ‘oku ke ‘ai ke nau ‘osi, ka ‘oku ‘ikai te nau fie tali ‘a e akonaki: ‘oku nau ngaohi honau mata ke fefeka ange ‘i he maka; ‘oku ‘ikai te nau loto ke foki. 4Pea u pehē, ‘Ā, ko lāuvale pē kinautolu: ‘oku nau fai vale; he ‘oku ‘ikai te nau ‘ilo ‘a e ‘alunga ‘o Sihova, ‘a e konisitūtone ‘o honau ‘Otua: 5ka u ‘alu mu‘a ki ha hou‘eiki, ‘o alea mo kinautolu; he ko e fa‘ahinga ko ia ‘oku nau ‘ilo ‘a e ‘alunga ‘o Sihova, ‘a e konisitūtone ‘a honau ‘Otua. ‘Ā, ‘oku nau tatau mo ē ‘i he maumau ‘o e ‘ioke: kuo nau motuhi ‘a e ngaahi ha‘i. 6Ko hono ‘ō ia ‘e taa‘i kinautolu ‘e ha laione mei he vao, ‘e maumau kinautolu ‘e ha ulofi mei he ngaahi fonua mamate; ‘oku le‘o ha lēpati ‘i honau ngaahi tu‘a kolo; ‘ilonga ha taha ‘oku hū kitu‘a mei ai, ‘e hae: koe‘uhi ‘oku lahi ‘enau ngaahi talangata‘a, ‘oku kaukaua ‘enau ngaahi holomui. 7Te u fakamolemole fēfē koe? kuo li‘aki au ‘e ho‘o fānau, pea kuo nau fuakava ‘i ha ngaahi ‘ata‘i ‘otua: na‘a ku fakafuakava kinautolu, ka na‘a nau maumau ‘enau alafianga, pea na‘a nau lolofi ki he fale ‘o e pa‘umutu. 8Ko e fanga hoosi tangata tofu pē kuo puta ‘i he kai: ‘oku nau fakahongi holo; ‘oku takitaha tangi ki he uaifi ‘o hono kaungā‘api. 9Pea ‘ikai koā te u ‘eke ‘a e ngaahi me‘a pehē–ko Sihova ia mei he Ta‘ehāmai; pea ‘ikai koā fai sauni ‘e hoku laumālie ki ha pule‘anga ‘oku hangē ko ia? 10Kaka hake he sino ‘o e ‘akau,#5.10 ‘Oku fihi: ‘Oku hiki ‘e he ni‘ihi: ‘ā maka. ‘o maumau; kae‘oua ‘e fai ke ‘osi: ‘ave hono ngaahi va‘a: he ‘oku ‘ikai kau kia Sihova ia. 11He kuo mātu‘aki fai kākā kiate au ‘a e fale ‘o ‘Isileli, mo e fale ‘o Siuta–ko Sihova ia mei he Ta‘ehāmai.
Ko Hono Li‘aki ‘e Sihova ‘a ‘Isileli
12Kuo nau faka‘ikai‘i ‘a Sihova, ‘o nau pehē, ‘Oku ‘ikai ‘i ai ia;#5.12 ‘Oku ‘ikai ‘i ai ia; pe ‘E ‘ikai te ne fai ‘e ia ha me‘a; pe ‘oku ‘ikai te tau fie felāve‘i mo ia. pea ‘e ‘ikai hoko ‘a e kovi kiate kitautolu; pea ko e heletā mo e honge ‘e ‘ikai te tau sio ki ai. 13‘Ā, ko e kau palōfita ko ē te nau hoko ko e matangi, he ‘oku ‘ikai ‘iate kinautolu ‘a ia ‘oku folofola: ke pehē ‘ene hoko kiate kinautolu. 14Ko ia ko eni ‘a e folofola ‘a Sihova, ‘a e ‘Otua Mohu Hōsitē, Ko e me‘a ‘i ho‘omou fai ‘a e lea ni, ko au eni ‘oku ou ngaohi ‘eku ngaahi lea ‘i ho ngutu ko e afi, pea ko e kakai ni ko e ‘akau, pea te ne keina kinautolu.
15Ko au eni ‘oku ou ‘omi kiate kimoutolu ha pule‘anga mei he mama‘o, si‘i fale ‘o ‘Isileli–ko Sihova ia mei he Ta‘ehāmai: ko e pule‘anga kaukaua ia, ko e pule‘anga tupu‘a ia, ko e pule‘anga ‘oku ‘ikai te ke ‘ilo ‘enau lea, pea ‘oku ‘ikai te ke ongo‘i ‘a e me‘a ‘oku nau lau. 16Ko ‘enau hōfangahau ko e fa‘itoka kuo fakamanga, ko e kau helo fua pē. 17Pea te nau kai ho ta‘u mo ho‘o me‘akai, ‘a ia na‘e mei kai ‘e ho‘o fānau tangata mo fānau fefine, te nau kai ho‘o fanga sipi mo kosi mo ho‘o fanga pulu: te nau kai ho‘o vaine mo ho‘o fiki: te nau laiki ho ngaahi kolo talitau‘anga, ‘a ia ‘oku ke falala ki ai, ‘aki ‘a e heletā.
18Ka na‘a mo e taimi ko ia, ‘e ‘ikai te u ‘ai kimoutolu ke ‘osi–ko Sihova ia mei he Ta‘ehāmai. 19Pea ‘i he taimi ko ia, kapau te mou pehē, Koe‘uhi ko e hā nai kuo fai ‘e Sihova ko hotau ‘Otua ‘a e ngaahi fu‘u me‘a ni kiate kitautolu? Pea te ke pehē kiate kinautolu, Hangē ko ho‘omou li‘aki au, mo tauhi ‘otua kehe ‘i he fonua ‘omoutolu, pehē te mou tauhi ha kau muli ‘i ha fonua ‘oku ‘ikai ‘omoutolu.
Ko e Fakatokanga ‘a e ‘Otuá ki Hono Kakaí
20Mou fakahā eni ki he fale ‘o Sēkope, pea fanongonongo ‘i Siuta, ‘o pehē, Fanongo mu‘a ki he me‘a ni, ‘a e kakai sesele pea ta‘ema‘u ‘atamai; 21‘oku mou mata ka ‘oku ‘ikai sio ‘aki; ‘oku mou telinga ka ‘oku ‘ikai fanongo ‘aki:#‘Ais 6.9-10; ‘Isi 12.2; Ma‘ake 8.18 22‘o ‘ikai koā te mou manavahē kiate au?–ko Sihova ia mei he Ta‘ehāmai–pea ‘ikai te mou tete ‘i hoku ‘ao, ‘a au kuo u ‘ai ‘a e ‘one‘one ko e kau‘ā ki he tahi, ko e laine ta‘engata, pea tapu ‘ene laka ai? pea ‘oku fakapupula hake hono ngaahi peau, ka ‘oku ‘ikai te nau lava; ‘io, ‘oku nau ‘u‘ulu, ka ‘oku ‘ikai te nau lava ke laka atu ai.#Siope 38.8-11 23Ka ‘oku ‘i he kakai ni ha loto talangata‘a mo pau‘u; na‘a nau foki atu ‘o ‘alu. 24Pea na‘e ‘ikai te nau pehē ‘i honau loto, Tau ‘apasia mu‘a kia Sihova ko hotau ‘Otua, ‘a ia ‘oku ne tuku ‘uha mai, ‘a e vaimu‘a mo e vaimui, ‘i hono taimi totonu; ‘oku ne ta‘ofi ma‘atautolu ‘a e ngaahi uike kuo tu‘utu‘uni ki he ututa‘u. 25Kuo le‘ei atu ‘a e ngaahi me‘a ko ia ‘e ho‘omou ngaahi kovi, pea kuo tāpuni ‘a e lelei meiate kimoutolu ‘e ho‘omou ngaahi angahala.
26He kuo ‘ilo ‘i hoku kakai ha kau pau‘u: ‘oku nau tokamalumu ‘o hangē ko e hanoku ‘a e hilimanu;#5.26 ‘oku nau… hilimanu; ‘Oku ‘ikai ke mahino ‘a hono faka-Hepeluú. ‘oku nau kamosi ‘a e hele, ‘oku nau pō kakai. 27Hangē ko e fīnaki ‘oku fonu ‘i he manupuna, pehē ‘oku fonu honau ngaahi fale ‘i he kākā: ko hono ō ia kuo nau hoko ‘o lahi, ‘o nau ma‘u koloa. 28Kuo nau sino, kuo nau taleilei: tala atu, ko ‘enau ngaahi ngāue kovi ‘oku fu‘u hulu: ‘oku ‘ikai te nau momo‘i mamahi‘i ‘a e me‘a ‘a e tamai mate, ke ma‘u ‘e he fa‘ahinga ko ē hā tu‘umālie; pea ‘i he‘enau fakamaau ‘oku ‘ikai te nau fakaai ‘a e totonu ‘o e kau masiva.
29Pea ‘ikai koā te u ‘eke ‘a e ngaahi me‘a pehē?–ko Sihova ia mei he Ta‘ehāmai–pea ‘ikai koā fai sauni ‘e hoku laumālie ki ha pule‘anga ‘oku hangē ko eni? 30Kuo fai ‘i he fonua ha me‘a ‘oku ne to‘o hoku ivi, ‘o ne ‘ai ke u vavana. 31‘Oku palofisai loi ‘a e kau palōfita, pea ‘oku fai ‘e he kau taula‘eiki ‘enau pule ‘i he angi ‘a ē; pea ‘oku manako hoku kakai ke pehē: ka ko e hā ‘amoutolu ‘e fai ka hoko hono ngata‘anga?
Currently Selected:
KO SELEMAIA 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
