KO SELEMAIA 4
4
Ko ha Fakakouna ‘o e Kakaí ke Fakatomala
1‘E ‘Isileli, kapau te ke foki mai–ko Sihova ia mei he Ta‘ehāmai–kapau te ke foki mai kiate au, pea kapau te ke ‘ave ho‘o ngaahi fakalielia ke ‘oua te nau kei fe‘ao mo au, pea ke tuku ho‘o ‘alu holo: 2pea ke fuakava, ‘o pehē, Tangi ‘a e mo‘ui ‘a Sihova, ‘o fai ‘i mo‘oni, fai ‘i he fakalao mo e totonu; pea ‘e toki fai#4.2 pea ke fuakava… toki fai; pe pea ‘e totonu leva ke ke fuakava… pea ‘e toki fai; pe pea kapau te ke fuakava… pea ‘e toki fai. ‘a e talamonū ‘e he ngaahi kakai ‘i He‘ene ‘Afio, pea ‘i He‘ene ‘Afio te nau vīkiviki.
3He ko eni ‘a e folofola ‘a Sihova ki he tangata Siuta, pea ki Selusalema, Keli ma‘amoutolu ha potu fo‘ou, pea ‘oua ‘e tō ta‘u ‘i he funga talatala.#Hōs 10.12 4Fai ho‘omou kamu kia Sihova, pea hu‘i ‘a e kili ‘o homou loto, ‘a e tangata Siuta mo e nofo Selusalema: na‘a pā atu ‘eku ‘ita hangē ha afi, ‘o vela ta‘emafu‘ifu‘i koe‘uhi ko e kovi ‘a homou fai anga.
Ko e Teu Tau‘i ‘o Siuta
5Tala ‘i Siuta, pea fanongonongo ‘i Selusalema; ‘io, mou pehē, Ifi ‘a e talupite ‘i he fonua: kalanga le‘o lahi, pea mou pehē, Fakataha mai, ka tau ō ki he ngaahi kolo talitau‘anga. 6Fokotu‘u ha fuka ke tuhu ki Saione: hola ke mo‘ui, ‘oua ‘e uatei: he ‘oku ai ha kovi mo ha faka‘auha lahi ‘oku ou ‘omi mei he tokelau. 7‘Oku ‘alu hake ha laione mei hono fihi, ‘io, ‘oku fononga mai ha tama tā pule‘anga; ‘oku ne hū kitu‘a mei hono potu ke ngaohi ho fonua ko e lala, ko e koto maumau ho ngaahi kolo, ke ta‘eha nofo ai. 8Mou no‘o tauanga‘a koe‘uhi ko e me‘a ko ia, tangilāulau mo ‘oiauē: he kuo te‘eki foki meiate kitautolu ‘a e kakaha ‘o e houhau ‘a Sihova.
9Pea ‘e hoko ‘i he taimi ko ia–ko Sihova ia mei he Ta‘ehāmai–‘e ka‘anga ‘a e loto ‘o e tu‘i mo e loto ‘o hou‘eiki; pea ‘e puputu‘u ‘a e kau taula‘eiki, pea ko e kau palōfita ‘e mo‘utāfu‘ua.
10Pea na‘a ku pehē, ‘Oiauē, ‘Ātonai Sihova! tā kuo ke mātu‘aki fiemua‘i ‘a e kakai ni mo Selusalema, ho‘o folofola mai, Te mou ma‘u melino: ‘osi, ‘oku ‘asi ‘a e heletā ‘i he mo‘ui.
11‘I he kuonga ko ia ‘e ai ha lea ‘e fai ki he kakai ni mo Selusalema: Ko e matangi vela mei he ngaahi mo‘unga molemole ‘i he toafa ‘oku fakaholo mai ki he ‘ōfefine ‘o hoku kakai, ‘oku ‘ikai ha‘u ke fai‘aki ha sivi koane, pe fai‘aki ha fakama‘a. 12Ko e matangi mālohi fau ki he alā me‘a pehē ‘oku ha‘u ma‘aku: ko e taimi ni ko au foki te u tala ‘a e tautea ‘o ‘eku fakamaau kinautolu.
Ko e ‘Ākilotoa ‘o Siuta ‘e hono ngaahi Filí
13Vakai, ‘oku ‘alu hake ia hangē ko e ngaahi ‘ao, pea ko ‘ene ngaahi sāliote ‘oku hangē ko e ‘ahiohio: ‘oku vave ange ‘i he ‘īkale ‘ene fanga hoosi. ‘Oiauē kitautolu, he kuo tau ‘auha!
14‘E Selusalema, fufulu ho loto mei he kovi, koe‘uhi ke ke mo‘ui. ‘E ngata ‘afē ‘a e ‘apitanga ‘i ho loto ‘a e ngaahi fakakaukau kovi?
15He ongo mai ha tala me‘a mei Tani, pea ‘oku ai ha fanongonongo kovi mei Mo‘unga ‘Ifalemi. 16Fakamanatu ‘a e ngaahi me‘a ki he ngaahi kakai; Sī ni, fanongonongo ‘a e kovi ki Selusalema. Ko e kau ha‘o kolo ē ‘oku ha‘u mei ha fonua mama‘o, pea ‘oku nau tala le‘o lahi ‘a e me‘a te nau fai ki he ngaahi kolo ‘o Siuta. 17Hangē ko e kau ‘ōfisa vao ‘oku nau takatakai kiate ia; he kuo ne angatu‘u kiate au–ko Sihova ia mei he Ta‘ehāmai.
18Ko ho founga mo ho‘o ngaahi fai anga kuo fakatupu ‘a e ngaahi me‘a ko ia kiate koe; ko e me‘a ni ko ho‘o kovi; hono ‘ikai ifo tamala, hono ‘ikai ‘asi ‘i ho loto!
Ko e Faka‘ofa‘ia ‘a Selemaia ‘i Hono Kakaí
19Hoku fatu! hoku fatu! ‘Ā, ‘oku ou mamahi; hoku mafu ni ka foa! ‘a e tupe hoku mafu ni ‘iate au! ‘Oku ‘ikai te u malongo pē, he kuo ke ongo‘i, si‘oku laumālie, ‘a e le‘o ‘o e talupite, ‘a e longoa‘a ‘o e tau. 20‘Oku fetautaulaki mai ‘a e tala ‘auha; he kuo maumau ‘a e fonua kotoa: hono kuo maumau fakafokifā hoku ngaahi tēniti, mo hoku ngaahi fale tupenu ‘i ha fo‘i kemo. 21‘E ngata ‘afē ‘eku mata fuka, ‘a e ongo mai ‘a e le‘o ‘o e talupite? 22Seuke, ‘oku vale hoku kakai, ‘oku ‘ikai te nau ‘ilo au; ko e hako‘i sesele kinautolu, pea ko e fa‘ahinga ta‘e‘atamai, ‘oku nau ngoto ‘i he faikovi, ka ko e failelei ‘oku ‘ikai te nau ‘ilo ki ai.
Ko e Sio ‘a Selemaia ki he Faka‘auha ‘oku Tu‘unuku Mai
23Na‘a ku fakasio ki māmani, pea tā ‘oku maomaonganoa mo lala pea ki he ngaahi langi, ka na‘e ‘ikai ha maama ‘i ai. 24Na‘a ku fakasio ki he ngaahi mo‘unga, tā ‘oku nau tete, pea fākalue ‘a e ngaahi mā‘olunga kotoa. 25Na‘a ku fakasio, pea tā ‘oku ‘ikai ha tangata, pea na‘a mo e fanga manupuna ‘o e ‘atā kuo nau hola kotoa. 26Na‘a ku fakasio, pea tā kuo hoko ‘a e tokanga ngoue ko e fonua maomaonganoa, pea kuo holoki hono ngaahi kolo kotoa, ‘i he fotu mai ‘a Sihova, ‘i he fotu mai ‘a e kakaha ‘o hono houhau.
27He ko eni ‘a e folofola ‘a Sihova, ‘E hoko ‘a e fonua kotoa ko e koto maumau; kae ‘ikai te u ‘ai ke ‘osi ‘aupito. 28Koe‘uhi ko e ngaahi me‘a ko ia ‘e tangilāulau ‘a māmani, pea ‘ai faka‘ilonga ‘uli ‘a e langi mei ‘olunga: koe‘uhi kuo u lea, kuo u tu‘utu‘uni ia, pea ‘oku ‘ikai te u fakatomala au, pea ‘e ‘ikai te u foki mei ai. 29‘I he ongoonga‘a mai ‘a e kau heka hoosi, mo e kau fana, ‘oku hola ‘a e ngaahi kolo kotoa; ‘oku nau hū ki he ngaahi vao fihi, pea ‘oku nau ‘alu hake ki he ngaahi ava‘i makatu‘u: kuo li‘aki ‘a e kolo kotoa pē, pea ‘oku ‘ikai ha taha ‘e nofo ai. 30Pea ko koe, si‘i vetea, ko e hā ‘au ‘e fai? Neongo ho‘o kofu ‘aki ‘a e kula-‘aho‘aho, neongo ho‘o teunga ‘aki ‘a e ngaahi siueli koula, neongo ho‘o mātu‘aki polo ho mata, ko e laufanō pē ho‘o fakamatamatalelei koe: ‘oku fakatale‘i koe ‘e ho kau ‘ofa‘anga, ko ho‘o mo‘ui eni ‘oku nau kumi ki ai. 31He ‘oku ongo mai ha le‘o hangē ha fefine ‘oku langā, ko e mamahi hangē ha fefine he ‘uluaki fā‘ele; ko e le‘o ‘o e ta‘ahine ko Saione, ‘oku ne tōtōngā, ‘oku ne fola hono nima, ‘oku ne “‘Oiauē kita, he ‘oku holo hifo ‘eku mo‘ui ‘i he kau fakapō!”
Currently Selected:
KO SELEMAIA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
