KO SELEMAIA 32
32
Ko Hono Fakatau ‘e Selemaia ha Konga ‘Api
1KO E folofola na‘e hoko kia Selemaia meia Sihova ‘i hono hongofulu ‘o e ta‘u ‘o Setekaia ko e Tu‘i Siuta, ‘a ia ko hono hongofulu mā valu ta‘u ‘o Nepukanesa.#2 Tu‘i 25.1-7 2Pea ‘i he taimi ko ia na‘e kapui ‘a Selusalema ‘e he tau ‘a e Tu‘i Pāpilone: pea ko Selemaia ko e palōfita na‘e mo‘u tāpunia ‘i he loto‘ā ‘o e ka‘ate, ‘a ia na‘e ‘i he fale ‘o e Tu‘i Siuta. 3He kuo tāpuni ia ‘e Setekaia ko e Tu‘i Siuta, he‘ene pehē, Ko e hā ‘oku ke fai palofisai ai, ‘o ke pehē, Ko e folofola eni ‘a Sihova, Ko au ē te u ‘atu ‘a e kolo ni ki he nima ‘o e Tu‘i Pāpilone, pea te ne puke ia; 4pea ‘e ‘ikai hao ‘a Setekaia ko e Tu‘i Siuta mei he nima ‘o e kau Kalitia, ka kuo pau ke tuku ia ki he nima ‘o e Tu‘i Pāpilone, pea ko e ngutu ‘o ē ‘e lea ki he ngutu ‘o ē, pea ko e mata ‘o ē ‘e sio ki he mata ‘o ē; 5pea te ne taki ‘a Setekaia ki Pāpilone, pea te ne ‘i ai kae‘oua ke u ‘a‘ahi kiate ia–ko Sihova ia mei he Ta‘ehāmai, Neongo ho‘omou tau‘i ‘a e kau Kalitia, kae ‘ikai te mou lava?
6Pea pehē ‘e Selemaia, Na‘e hoko kiate au ha folofola ‘a Sihova, ‘o pehē, 7Sī ni, ‘oku ha‘u kiate koe ‘a ‘Anameli foha ‘o Sālumi ko e tokoua ‘o ho‘o tamai, ke fakahā, Fakatau mu‘a mo‘ou ‘a e konga vao ‘o‘oku ‘oku ‘i ‘Anatoti: he ko e koeli totonu koe ki he huhu‘i. 8Pea ha‘u kiate au ki he loto‘ā ‘o e ka‘ate ‘a ‘Anameli, ko e foha ‘o e tokoua ‘o ‘eku tamai, ‘o hangē ko e folofola ‘a Sihova, pea ne pehē mai kiate au, Fakatau mu‘a ‘a e konga vao ‘o‘oku, ‘a ia ‘oku ‘i ‘Anatoti ‘i he fonua ‘o Penisimani: he ko koe ‘a e hoko totonu, pea ko koe ‘a e koeli; fakatau ia mo‘ou. Pea u ‘ilo ko e folofola ‘a Sihova ia. 9Ko ia na‘a ku fakatau ai ‘a e konga vao ‘i ‘Anatoti meia ‘Anameli ko e foha ‘o e tokoua ‘o ‘eku tamai, pea na‘a ku fua kiate ia ‘a e pa‘anga, ko e sikeli ‘e fitu mo e hongofulu, ‘a e siliva na‘e lau. 10Pea na‘a ku tohi ‘a e me‘a ‘i he tohi, pea u sila‘i ke ma‘u, pea u kumi ha kau fakamo‘oni, pea na‘a ku fua kiate ia ‘a e pa‘anga ‘i he me‘afua. 11Pea na‘a ku to‘o ‘a e tohi fakatau–‘a ia na‘e sila‘i, ‘a ia ‘oku ‘i ai ‘a e fakamatala mo e ngaahi tu‘utu‘uni,#32.11 ‘a ia… tu‘utu‘uni; pe ‘o taau mo e laó mo e ngaahi tu‘utu‘uní. 12Pea mo ia na‘e ava–pea u ‘atu ‘a e tohi fakatau kia Paluki ko e foha ‘o Nelaia, foha ‘o Ma‘aseia, ‘oku sio ki ai ‘a ‘Anameli ko e tokoua ‘o ‘eku tamai, pea ‘oku sio ki ai ‘a e kau fakamo‘oni na‘e ‘ai honau hingoa ki he tohi fakatau; ‘oku sio ki ai foki ‘a e kau Siu kotoa na‘e nofo ‘i he loto‘ā ‘o e ka‘ate. 13Pea u na‘ina‘i kia Paluki ‘i honau ‘ao, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli: 14Ke ke to‘o ‘a e tohi fakatau ko eni, ‘a e tohi kuo sila‘i mo eni ‘oku ava, ‘o tuku ki ha ipu ‘umea, koe‘uhi ke tolonga fuoloa. 15He ko eni ‘a e folofola ‘a Sihova Sāpaoti, ko e ‘Otua ‘o ‘Isileli; ‘E toe fakatau fale, moni konga vao, moni ngoue vaine, ‘i he fonua ko eni.
Ko ha Lotu ‘a Selemaia
16Pea hili ‘eku ‘atu ‘a e tohi fakatau kia Paluki foha ‘o Nelaia, na‘a ku fai ‘eku lotu kia Sihova, ‘o pehē, 17‘Oiauē ‘Ātonai Sihova! vakai ko koe na‘e ngaohi ‘a e langi mo e fonua ‘aki ho fu‘u ivi na, mo ho nima kuo mafao; ‘oku ‘ikai ha momo‘i me‘a ‘e faingata‘a ki he ‘Afiona: 18‘oku ke fai meesi ki he ngaahi toko afe, pea ‘oku ke totongi ‘a e kovi ‘a e mātu‘a ki he fatafata ‘o ‘enau fānau hili kinautolu: ko e ‘Otua lahi, ko e māfimafi, ‘a ia ko Sihova Sāpaoti hono huafa: 19ko e fungani ‘i he fai fakakaukau, pea kaukaua ‘i he fai ngāue: ‘a e ‘Afiona ‘oku ‘ā ho fofonga ki he ‘alunga fua pē ‘o e hako‘i tangata; ke ‘ange ki ai takitaha ‘o taau mo hono ‘alunga, mo e fua ‘o ‘ene ngaahi ngāue, 20‘a e ‘Afiona na‘a ke ‘ai ha ngaahi faka‘ilonga mo me‘a fakaofo ‘i ‘Isipite, pea talu ai pē mo ho‘o fai pehē ‘i ‘Isileli foki, mo e kakai kehe; pea ke ma‘u ai ha ongoongo hangē ko ia ‘oku fai ni. 21Pea na‘a ke fakahao mai ho kakai mei ‘Isipite, ‘a ‘Isileli, ‘aki ha ngaahi faka‘ilonga, mo e ngaahi mana, pea ‘aki ha tā mamafa mo e nima kuo hiki tā, mo e fakangeingei lahi. 22Pea na‘a ke ‘ange kiate kinautolu ‘a e fonua ni, ‘a ia na‘a ke fuakava ai ki he‘enau ngaahi kui, ke ‘ange mo‘onautolu, ko e fonua ‘oku mahutafea ‘i he hu‘akau mo e honi. 23Pea nau hū mai ki ai ‘o tofi‘a ‘aki; ka na‘e ‘ikai te nau fakaongo ki ho le‘o, pea ko ho‘o lao na‘e ‘ikai te nau fou ai; ko e ngaahi me‘a na‘a ke tu‘utu‘uni ke nau fai kuo ‘ikai te nau fai: ko ia kuo ke fakahoko kiate kinautolu ‘a e fu‘u kovi ni.
24Vakai, ko e ngaahi puke ena ‘oku nga‘unu mai ki he kolo, kae hamu ia; pea ko e kolo kuo tuku ia ke fa‘iteliha ai ‘a e kau Kalitia ‘oku tau‘i ia, ko e me‘a ‘i he heletā, mo e honge, mo e mahaki faka‘auha. ‘Io, ko e me‘a na‘a ke folofola ki ai kuo hoko; pea seuke, ‘oku ke ‘afio‘i pē. 25Ka kuo ke folofola mai, ‘Ātonai Sihova ē, Fakatau mo‘ou ‘a e konga vao ‘aki ha pa‘anga, pea kumi fakamo‘oni ki ai: ‘osi, kuo tuku ‘a e kolo ki he nima ‘o e kau Kalitia.
26Pea na‘e hoko ‘a e folofola ‘a Sihova kia Selemaia, ‘o pehē, 27Sī ni, ko Sihova au, ko e ‘Otua ‘o e kakano kotoa: hono ai ha me‘a ‘e faingata‘a kiate au? 28Ko ia, ko eni ‘a e folofola ‘a Sihova, Ko au eni ‘oku ou tuku ‘a e kolo ni ki he nima ‘o e kau Kalitia, pea ki he nima ‘o Nepukanesa ko e Tu‘i Pāpilone, pea te ne hamu ia.#2 Tu‘i 25.1-11; 2 Kal 36.17-21 29Pea ‘e hū mai ‘a e kau Kalitia ‘oku fai tau ki he kolo ni, pea te nau ‘ai ha afi ki he kolo ni, ‘o fakamomofi ia, mo e ngaahi fale ‘a ia kuo mou tutu ‘inisēnisi ‘i hono tu‘a fale kia Peali, mo fakatau ‘a e ngaahi feilaulau–kava ki he ngaahi ‘otua kehe, ke faka‘ita ‘aki au. 30He ko ha‘a ‘Isileli mo ha‘a Siuta, ko e me‘a pē kuo nau fai talu ‘enau talavou, ko e fai ‘o e me‘a ‘oku tau kovi kiate au; ‘io, ko e me‘a pē ‘a ha‘a ‘Isileli kuo fai ko e fakamamahi au ‘aki ‘a e ngāue ‘a honau nima–ko Sihova ia mei he Ta‘ehāmai. 31He talu ‘a e taimi na‘a nau langa ia, ‘o a‘u ki he ‘aho ni, mo e nofo mai ‘a e kolo ni ko e me‘a ke langa ai ‘eku ‘ita mo hono kakaha; ko hono ālonga ai pē ko ‘eku hiki kinautolu mei he fe‘ao kovi mo au. 32Ko e ‘ātunga ia ‘o e fu‘u kovi ‘a ha‘a ‘Isileli mo ha‘a Siuta, ‘a ia kuo nau fai ke faka‘ita ‘aki au, ‘e kinautolu, ‘a honau ngaahi tu‘i, ‘a honau hou‘eiki, ‘a honau kau taula‘eiki, mo honau kau palōfita, mo e tangata Siuta fua pē, mo e nofo Selusalema. 33Pea nau fuli mai honau tu‘a ‘o ‘ikai ko honau mata: pea neongo na‘a ku ako‘i kinautolu, ‘o u ‘ā hengihengi ke fai honau ako, ka na‘e ‘ikai te nau fakaongo ke tali akonaki. 34Pea kuo nau ‘ai ‘enau ngaahi fakalielia ‘i he fale ‘oku ui‘aki hoku hingoa, ke ‘uli‘i ia.#2 Tu‘i 23.10; Sel 7.30-31; 19.1-6 35Pea kuo nau tanu ‘a e ngaahi ‘esi ‘o Peali, ‘a ‘ena ‘i he Tele‘a ‘o e foha ‘o Hīnomi, ke fakalaka ai ‘enau fānau tangata mo fānau fefine kia Moloke; ‘a ia ko e me‘a na‘e ‘ikai te u tu‘utu‘uni kiate kinautolu, pea na‘e ‘ikai ke ake ‘i hoku loto ‘a e ai ha fakalielia pehē, ke fakahalaia ‘a Siuta.#Lev 18.21; 2 Tu‘i 23.10; Sel 7.31
Ko ha Tala‘ofa Fakatupu Fakatu‘amelie
36Pea koe‘uhi ko e me‘a ko ia, ko eni ‘oku folofola ‘a Sihova ko e ‘Otua ‘o ‘Isileli, ‘o pehē, Ko e me‘a ki he kolo ni, ‘a ia ‘oku mou pehē kuo tuku ki he nima ‘o e Tu‘i Pāpilone, ko e me‘a ‘i he heletā, mo e honge, mo e mahaki faka‘auha: 37ko au eni te u tānaki kinautolu mei he ngaahi fonua kehekehe kuo u sese‘e kinautolu ki ai, ‘i he‘eku ‘ita, mo ‘eku houhau, mo e tuputāmaki lahi; pea te u toe ‘omi kinautolu ki he potu ni, pea te u ‘ai ke nau nofo nonga: 38pea te nau nofo mai ko hoku kakai, pea te u nofo au ko honau ‘Otua. 39Pea te u ‘atu kiate kinautolu ha taha‘i loto, mo ha taha‘i ‘alunga, ko e ‘apasia kiate au ma‘u ai pē; ma‘anau lelei, pea ma‘a e lelei ‘a ‘enau fānau ‘oka hili kinautolu. 40Pea te u fai mo kinautolu ha kovinānite ta‘engata, ko e pehē ‘e ‘ikai te u tuku ‘eku muimui kiate kinautolu ke fai ha lelei; pea te u tuku ‘i honau loto ‘a e ‘apasia kiate au, ke ‘oua te nau afe meiate au. 41Pea te u fiefia ‘iate kinautolu ke fai ha‘anau lelei, pea te u hunuki kinautolu ‘i he fonua ni, ‘o fai mo‘oni ‘aki hoku loto kotoa mo hoku laumālie kotoa.
42He ko e folofola eni ‘a Sihova: Hangē ko ‘eku ‘omi ki he kakai ni ‘a e ngaahi fu‘u kovi ko eni, pehē te u ‘omi ‘e au kiate kinautolu ‘a e lelei kotoa ‘oku ou lea ki ai ma‘anautolu. 43Pea ‘e fefakatau‘aki ‘a e ngaahi konga vao ‘i he fonua ko eni, ‘a ia ‘oku mou pehē, Ko e lala ia, ta‘e‘i ai ha tangata pē manu; kuo tuku ki he nima ‘o e kau Kalitia. 44Te nau fakatau ha ngaahi konga vao ‘aki ‘a e pa‘anga, pea te nau fai ‘a e ngaahi tohi fakatau, ‘o sila‘i ke ma‘u, pea te nau kumi fakamo‘oni ki ai, ‘i he fonua ‘o Penisimani, pea ‘i he ngaahi tua‘ā ‘o Selusalema, pea ‘i he ngaahi kolo ‘o Siuta, pea ‘i he ngaahi kolo ‘o e mo‘unga, pea ‘i he ngaahi kolo ‘i Sēfela‘a, pea ‘i he ngaahi kolo ‘o e Tonga: he te u fakafoki ‘enau pōpula–ko Sihova ia mei he Ta‘ehāmai.
Currently Selected:
KO SELEMAIA 32: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
