KO SELEMAIA 2
2
Ko Hono Lehilehi‘i ‘e he ‘Otuá ‘a ‘Isileli
1PEA na‘e hoko ‘a e folofola ‘a Sihova kiate au, ‘o pehē, 2‘Alu, ‘o fanongonongo ki Selusalema, ‘o pehē, Ko e folofola eni ‘a Sihova: Kuo u manatu ma‘au ho‘o ‘ofa mai ‘i ho‘o finemui, mo ho‘o fakananivi ‘i he kamata ‘o ‘eta nonofo; ho‘o muimui kiate au ‘i he Toafa, he fonua na‘e ‘ikai tō ai ha ta‘u. 3Na‘e tapu ‘a ‘Isileli kia Sihova, he ko e polopolo ‘o hono ta‘u: ‘ilonga ha taha te ne kai ki ai ‘e halaia; ‘e hoko ha kovi kiate kinautolu–ko Sihova ia mei he Ta‘ehāmai.
Ko e Fai Angahala ‘a e Fanga Kui ‘a e Kakai ‘Isilelí
4Fanongo ki he folofola ‘a Sihova, ‘a e fale ‘o Sēkope, mo e ngaahi fāmili kotoa pē ‘o e fale ‘o ‘Isileli; 5Ko e folofola eni ‘a Sihova, Ko e hā ha kovi na‘e ‘ilo ‘e ho‘omou ngaahi kui ‘iate au, ‘a ia kuo nau fakamama‘o ai meiate au, ‘o muimui ki he muna, ‘o nau hoko ai ko e koto muna? 6Pea na‘e ‘ikai te nau pehē, Kofa‘ā ‘a Sihova ‘a ia ne ne ‘ohake kitautolu mei ‘Isipite, na‘e taki kitautolu ‘i he Toafa, ko e fonua mamate mo feluoluoki, ko e fonua mōmoa, pea ko e ‘ata-‘o-mate, ko e fonua ‘oku ‘ikai ke ‘alu ai ha taha, pea ‘oku ‘ikai nofo ai ha tangata? 7Ka na‘a ku ‘omi kimoutolu ki ha fonua ngoue‘anga, ke kai hono fua mo hono mahu; ka ko ho‘omou hū leva ki hoku fonua, pea mou ‘uli‘i, pea kuo mou ngaohi hoku tofi‘a ko e me‘a ke fakalili‘a ki ai. 8Na‘e ‘ikai ke pehē ‘e he kau taula‘eiki, Kofa‘ā ‘a Sihova? pea ko kinautolu na‘e ngāue ‘i he lao na‘e ‘ikai te nau ‘ilo au: pea ko e kau tauhi na‘a nau talangata‘a kiate au, pea ko e kau palōfita na‘a nau palofisai ‘ia Peali, pea nau muimui ki he ngaahi me‘a ‘oku ‘ikai ‘aonga.
Ko Hono Faka‘ilo ‘e Sihova ‘a Hono Kakaí
9Ko ia, ‘oku ou kei fakamaau mo kimoutolu–ko Sihova ia mei he Ta‘ehāmai–pea te u fakamaau mo e fānau ‘a ho‘omou fānau. 10He ke mou laka atu ki he ngaahi motu ‘o Kītimi, ‘o vakai; pea fekau atu ki Keta, ‘o tokanga lelei; ‘o vakai pe kuo ‘i ai ha ngaahi me‘a pehē. 11Kuo fetongi koā ‘e ha kakai honau ‘otua, neongo ko e ‘ata‘i ‘otua kinautolu? Ka ko hoku kakai kuo nau fetongi honau lāngilangi‘anga ‘aki ha me‘a ‘oku ‘ikai ‘aonga. 12Mou tumu, ‘a e ngaahi langi, ‘i he me‘a ni; ‘io, mou fakalilifu mo mo‘utāfu‘ua–ko Sihova ia mei he Ta‘ehāmai. 13He ‘oku lōua ‘a e kovi ‘oku fai ‘e hoku kakai; kuo nau li‘aki au ko e fauniteni ‘o e vai mo‘ui, kae foa lepa ma‘anautolu; ko e ngaahi lepa maumau, ‘a ia ‘e ‘ikai te nau Matānaki ha vai.
Ko e Nunu‘a ‘o e Hē ‘a ‘Isilelí
14Ko e pōpula koā ‘a ‘Isileli? pe ko e tupu pehē ‘i ‘api? Ko e hā ē kuo ngaohi ia hangē ha vete? 15Na‘e kālou ‘a e fanga laione kiate ia, ‘o nau tuku atu honau le‘o: pea kuo nau ngaohi hono fonua ko e koto maumau; kuo tutu hono ngaahi kolo, ‘o ‘ikai lava ha nofo ai. 16Ko e ha‘a Mēfisi foki, mo e ha‘a Tapanesi, kuo nau keikeina taha ‘a e lau ‘o ho ‘ulu. 17‘Ikai na‘e ‘omi ia kiate koe ‘e koe, ‘i ho‘o li‘aki ‘a Sihova ko ho ‘Otua, ‘i he taimi ‘oku ne fai ho taki ‘i he hala? 18Pea ko eni, ko e hā ‘au ‘oku tupu ai ho‘o fou ‘i he hala ki ‘Isipite, ke inu ‘a e vai ‘o Naila? Pea ko e hā ‘au ke tupu ai ho‘o fou ‘i he hala ki ‘Āsilia, ke inu ‘a e vai ‘o e Vaitafe? 19‘Oku tautea koe ‘e ho‘o kovi, pea ‘oku akonaki‘i koe ‘e ho‘o ngaahi holomui: pea mou ‘ilo ‘o vakai ko e me‘a kovi mo ifo tamala ho‘o li‘aki ‘a Sihova ko ho ‘Otua, pea ke ta‘eha manavahē kiate au–ko e folofola ia mei he Ta‘ehāmai ‘a ‘Ātonai Sihova Sāpaoti.
Ko e Ta‘eFie Tauhi ‘a ‘Isileli kia Sihova
20Seuke, talu mei tuai mo ho‘o maumau ho‘o ‘ioke,#2.20 ho‘o ‘ioke; pe ‘eku ‘ioke. mo motuhi ho‘o ngaahi ha‘i; pea na‘a ke pehē, ‘E ‘ikai te u ngāue; ka ‘i he ngaahi funga mā‘olunga kotoa pē, pea ‘i he lolo ‘akau mata fua pē, ko koe ena ‘oku ke tokoto ke fai fe‘auaki. 21Ka na‘a ku tō koe ko e vaine ‘eiki, ko e hako fakatou nge‘esi fua pē; pea fēfē fua ho‘o liliu ‘o laku mai kiate au ‘a e ngaahi lito kovi ‘o vaine kehe? 22He neongo ho‘o kaukau ‘aki ‘a e sota, mo fakalahi ho‘o sopu,#2.22 sopu; Ko e koá eni. kei ma‘uma‘utunga pē ho‘o kovi ‘i hoku ‘ao–ko ‘Ātonai Sihova ia mei he Ta‘ehāmai. 23Fēfē ho‘o lava ke lau, Kuo ‘ikai te u muimui ki he kau Peali? Vakai ho hala na ‘i he tele‘a, ke ke ‘ilo ‘a e me‘a kuo ke fai, ‘a e kāmeli fefine ‘oku lele holo ‘o fehauhau‘aki ‘i ho ngaahi hala na. 24Ko e ‘asi hehengi maheni mo e toafa ko ē,#2.24 Ko e ‘asi… ko eé; Ko hono faka-Hepeluú ia, ka ‘oku ngali tonu hono hiki ‘o: ‘Oku ‘oho atu ki he toafá. ka hoko hono taimi lala ‘oku ne fakananamu ‘a e matangi; ko hai ‘e lava ke ta‘ofi ‘ene holi? Ko kinautolu ‘oku kumi ki he manu fefine, ‘e ‘ikai te nau ongosia fai; ka hoko hono māhina, te nau ‘ilo ia. 25Ta‘ofi ho va‘e mei he ‘alu ta‘esū, mo ho u‘a mei he fie inua. Ka na‘a ke tali, ‘E ‘ikai lava: ‘ikai; he kuo u ‘ofa ki he muli, pea ko kinautolu te u muimui ki ai.
Ko Hono Taau ke Tautea ‘a ‘Isileli
26Hangē ko e mā ‘a e kaiha‘a ‘oka ma‘u, ‘oku pehē ‘a e mā ‘a e fale ‘o ‘Isileli; ko kinautolu, ‘a honau ngaahi tu‘i, ‘a honau hou‘eiki, mo honau ngaahi taula‘eiki, pea mo honau kau palōfita; 27he‘enau pehē ki he ‘akau, Ko ‘eku tamai koe; pea ki he maka, Ko koe na‘e fā‘ele‘i au: he kuo nau fuli mai honau tu‘a, ‘o ‘ikai honau mata: ka ki he taimi ‘o ‘enau kovi ‘oku nau pehē, Tu‘u, ‘o fakahaofi kimautolu.
28Ka kofa‘ā ho ngaahi ‘otua ‘a ia na‘a ke ngaohi ma‘a u? Ke tu‘u hake ‘a kinautolu, ‘o kapau te nau lava ke fakahaofi koe ‘i he taimi ‘o ho‘o kovi: he hangē ko e lau ‘o ho‘o ngaahi kolo, ‘e Siuta, ‘oku pehē ‘a e lau ‘o ho ngaahi ‘otua. 29Ko e hā ‘oku mou tangi ai ke fakamaau mo au? kuo mou angatu‘u kotoa pē kiate au–ko Sihova ia mei he Ta‘ehāmai. 30Kuo ta‘e‘aonga ‘eku taa‘i ho‘omou fānau: kuo ‘ikai te nau tali ‘a e akonaki; kuo keina ‘e ho‘omou heletā ‘a ho‘omou kau palōfita, hangē ha laione fekai. 31‘a e toki to‘utangata na! mou tokanga‘i ‘a e folofola ‘a Sihova. Ko e toafa au ki ‘Isileli? pe ko e fonua po‘uli ‘aupito? Ko e hā ‘oku lau ai ‘e hoku kakai, ‘o pehē, ‘Oku mau ‘alu fa‘iteliha pē; ‘e ‘ikai te mau toe ha‘u kiate koe? 32‘E ngalo ‘i ha ta‘ahine ‘ene teunga, pe ngalo ‘i ha polo‘i hono no‘o? ka kuo ngalo au ‘i hoku kakai ‘o ‘aho lahi ta‘emalaua. 33Hono ‘ikai mālie ho‘o le‘ei ho hala ke kumi ‘ofa! ko ia foki ‘oku ke fakamaheni ho ngaahi ‘alunga mo e ngaahi kovi. 34Ko e ngaahi tapa ‘o ho kofu foki ‘oku ‘ilonga ai ‘a e toto ‘o e ngaahi laumālie ‘o si‘i masiva ta‘ehalaia: tala‘ehai na‘a ke ma‘u kinautolu ‘oku nau hae fale, ka na‘a ke fai ‘i he funga ‘o e me‘a kotoa ko ē.#2.34 tala‘ehai… kotoa ko eé; ‘Oku fihi. ‘Oku hiki ‘e he ni‘ihi: na‘e ‘ikai te u ‘ilo ia ‘i he vaku ki ai, ka na‘e tekefili pē ‘i he funga me‘a ko ia kotoa.
35Ka ‘oku ke pehē, Tū ‘oku ou ‘atā; kuo pau kuo foki hono houhau meiate au. Ko au eni te ta hopo mo koe, koe‘uhi ko ho‘o pehē, Kuo ‘ikai te u angahala. 36Ko e hā ‘oku ke fu‘u lele holo ai ke le‘ei ho founga? Te ke maa‘i ‘a ‘Isipite foki, ‘o hangē ko ho‘o maa‘i ‘a ‘Āsilia. 37Te mou ha‘u mei he me‘a ni foki ‘oku mou fefofoa‘i homou ‘ulu: he kuo fakatale‘i ‘e Sihova ho ngaahi falala‘anga, pea ‘e ‘ikai ha‘amou tu‘umālie mei ai.
Currently Selected:
KO SELEMAIA 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
