KAU FAKAMAAU 21
21
Ko ha ngaahi Mali mo‘ó e Kakai Tangata ‘o e Matakalai Penisiamaní
1PEA ko e kau ‘Isileli kuo nau fuakava ‘i Mīsipa, ‘o pehē, ‘E ‘ikai ‘ange ‘e hatau toko taha hano ‘ōfefine ke mali ki Penisimani. 2Pea ha‘u ‘a e kakai ki Pēteli, pea nau nofo ‘i he ‘ao ‘o ‘Elohimi ‘i he potu ko ia ‘o a‘u ki he efiafi, pea nau ‘ai ‘enau fu‘u fākafoa. 3Pea nau pehē, ‘E Sihova, ‘Otua ‘o ‘Isileli, ko e hā kuo hoko ai ‘a e me‘a ni ‘i ‘Isileli? he ko e ‘aho ni kuo tō ha matakali ‘e taha ‘i ‘Isileli.
4Pea pongipongi hake, na‘e tu‘u hengihengi ‘a e kakai, ‘o nau fokotu‘u ha ‘ōlita ‘i he potu ko ia, ‘o nau feia ai hani feilaulau-mōifua mo hani feilaulau-‘ofa. 5Pea fepehē‘aki ‘e ha‘a ‘Isileli, Ko hai ‘i he ngaahi matakali ‘Isileli na‘e ‘ikai ha‘u ki he fakataha kia Sihova? He kuo nau fai ha fuakava mamafa, ‘o kau kiate ia na‘e ‘ikai ‘alu hake kia Sihova ki Mīsipa, ‘o pehē, ‘E mate tāmate‘i ia. 6Pea kuo fakatomala ‘a ha‘a ‘Isileli koe‘uhi ko honau tokoua ko Penisimani, ‘o nau pehē, Kuo tu‘usi he ‘aho ni ha matakali ‘e taha mei ‘Isileli. 7Ko e hā te tau fai kiate kinautolu ‘oku toe, ke nau ma‘u uaifi ai? he ko kitautolu kuo tau fuakava ‘ia Sihova ‘e ‘ikai te tau ‘ange hatau fānau fefine mōnau ‘unoho.
8Ko ia na‘a nau pehē ai, Ko hai ha taha ‘i he ngaahi matakali ‘Isileli ne ‘ikai ‘alu hake kia Sihova ki Misipa? Pea tā na‘e ‘ikai ha‘u ki he ‘apitanga ha taha mei Siepesi-kiliati ke kau ‘i he fakataha. 9Pea na‘e lau ‘a e kakai, pea tā na‘e ‘ikai ha taha mei he kakai ‘o Siepesi-kiliati. 10Pea fekau atu ki ai ‘e he fakataha ‘a e toko taha mano mā ua afe mei he kau to‘a, ‘o nau tu‘utu‘uni kinautolu ‘o pehē, ‘Alu ‘o taa‘i ‘a e nofo Siepesi-kiliati ‘aki ‘a e mata ‘o e heletā, ‘a e kau fefine foki mo e tamaiki. 11Pea ko eni ‘a e me‘a te mou fai, ‘ilonga ha tangata, pea ‘ilonga ha fefine kuo ne ‘ilo ha tangata, te mou faka‘auha. 12Pea na‘e ‘ilo ‘i he kakai ‘o Siepesi-kiliati ha fāngeau‘i finemui kei tāupo‘ou, pea na‘a nau ‘omi kinautolu ki he ‘apitanga ki Sailo, ‘a ia ‘oku ‘i Kēnani Mo‘oni.
13Pea fekau atu ‘e he fakataha kotoa ke lea ki he kau Penisimani na‘e ‘i he makatu‘u ko Līmoni, ‘o tala kiate kinautolu kuo melino. 14Pea foki ‘a Penisimani ‘i he taimi ko ia, pea nau ‘atu kiate kinautolu ‘a e kau fefine kuo nau fakamo‘ui ‘i he kau fefine Siepesi-kiliati, ka na‘e ‘ikai te nau tofu ai.
15Pea na‘e fakatomala koe‘uhi ko Penisimani, he kuo fakaava ‘e he ‘Eiki ha tu‘unga ‘e taha ‘i he ngaahi matakali ‘Isileli. 16Pea pehē ‘e he mātu‘a ‘o e fakataha, Ko e hā te tau fai ma‘a e toe, ke nau ma‘u uaifi ai, he kuo faka‘auha ‘a e kau fefine Penisimani? 17Pea nau pehē, Kuo pau ke ‘i ai ha tofi‘a ki he kakai kuo hao ‘i Penisimani, ke ‘oua na‘a tāmate‘i ha matakali mei ‘Isileli. 18Ka ko kitautolu ‘e ‘ikai te tau lava ke ‘atu hanau ‘unoho mei he‘etau fānau fefine: he kuo fuakava ‘a ha‘a ‘Isileli, ‘o pehē, Ke mala‘ia ‘a ia te ne ‘ange ha uaifi ki Penisimani.
19Pea nau pehē, Ko eni, ‘oku ai ha kātoanga ‘o Sihova ‘oku fai ‘i he ta‘u kotoa pē ‘i Sailo (‘a ia ‘oku tu‘u ‘i he potu tokelau ‘o Pēteli, ‘i he potu hahake ‘o e hala tanu ‘oku ‘alu mei Pēteli ki Sikemi, pea ‘oku tu‘u ‘i he potu saute ‘o Lēpona). 20Pea nau tu‘utu‘uni ki he kau Penisimani, ‘o pehē, ‘Alu ‘o fakatoka malumu ‘i he ngaahi ngoue vaine; 21pea mou vakai, pea ka ‘iloange ‘e ‘alu atu ‘a e kau ta‘ahine Sailo ke me‘e ‘i he ngaahi me‘e, pea mou ‘alu ki tu‘a mei he ngaahi ngoue vaine, ‘o takitaha puke hano uaifi ‘i he kau ta‘ahine Sailo, ‘o mou ō ki he fonua ‘o Penisimani. 22Pea kapau ‘e ha‘u#21.22 ha‘u; Ko hono faka-Hepeluú: ha‘u kiate kimautolu; ka ‘oku pehē he hiki fuoloa ‘e taha: ‘alu atu kiate kimoutolu. ‘enau mātu‘a, pe ko honau ngaahi tuonga‘ane, ke lāunga mai, pea te mau#21.22 mau: Ko hono faka-Hepeluú ia, ka ‘oku ngali tonu hono hiki ‘o mou. pehē kiate kinautolu, Me‘a‘ofa ‘aki mai pē, koe‘uhi na‘e ‘ikai te mau ma‘u ma‘anautolu takitaha ha uaifi ‘i he tau: pea na‘e ‘ikai te mou ‘ange ‘e kimoutolu, he ka ne pehē kuo mou halaia ni.
23Pea fai pehē ‘e ha‘a Penisimani, ‘o nau ma‘u meiate kinautolu na‘e me‘e ha kau fefine ke nau tōfuhia ai, ‘a ia na‘a nau holataki‘i, pea nau laka ‘o foki ki honau ngaahi tofi‘a, ‘o nau langa ‘a e ngaahi kolo ‘o nofo ai. 24Pea movete mo ha‘a ‘Isileli ‘i he taimi ko ia, ‘o ‘alu takitaha ki hono matakali mo hono fāmili, pea nau ‘alu mei ai takitaha ki hono tofi‘a. 25Ko e taimi ko ia na‘e ‘ikai ha tu‘i ‘i ‘Isileli: na‘e takitaha fai hono loto.#Fkm 17.6
Currently Selected:
KAU FAKAMAAU 21: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
