KAU FAKAMAAU 16
16
Ko e ‘Alu ‘a Samisoni ki Kesa
1PEA ‘alu ‘a Samisoni ki Kesa, ‘o ne sio ai ki ha fefine fe‘auaki, ‘o ne ‘alu kiate ia. Pea na‘e fakahā ki he kau Kesa, ‘o pehē, Kuo ha‘u ‘a Samisoni ki heni. 2Pea na‘a nau nofo takatakai, ‘o toka malumu ki ai ‘i he pō ko ia ‘o ‘aho, ‘i he matanikolo; ‘o nau fakalongo pē ‘i he pō kotoa, he‘enau pehē, ‘Oua ke ‘aho hake, pea tau toki tāmate‘i ia. 3Pea tokoto ‘a Samisoni ‘o a‘u ki he tu‘uapō; ka ‘i he tu‘uapō mālie na‘a ne tu‘u, ‘o ne ala ki he ongo lau matapā ‘o e matanikolo, mo e ongo pou matapā, ‘o ne ta‘aki ia fakataha mo e ‘akau fakama‘u, ‘o ne hilifaki ki hono uma; ‘o ne ‘ohake ki he tumutumu ‘o e mo‘unga ‘oku hanga ki Hepeloni.
4Pea hili ia na‘e faifai pea ne ‘ofa ki ha fefine ‘i he tele‘a ‘o Sōleki, pea ko e hingoa ‘o e fefine ko Tīlila. 5Pea hā‘ele ange ki he fefine ‘a e hou‘eiki hau ‘o e kau Filisitia, ‘o nau pehē kiate ia, Fakatalanoa‘i ia ke vakai pe ‘oku tu‘u ‘i he hā hono fu‘u ivi, pea tu‘u ‘i he hā ha‘atau lava‘i ia, ka mau ha‘i ia ke fakavaivai‘i: pea te mau toki ‘atu ‘e kimautolu takitaha ha afe‘i pa‘anga mo ha teau.
6Ko ia, na‘e lea ai ‘a Tīlila kia Samisoni, Tala mai mu‘a pe ‘oku tu‘u ‘i he hā ho fu‘u ivi na, mo e hā ‘e lava ‘aki ho ha‘i ke fakavaivai‘i?
7Pea tali ‘e Samisoni ki ai, Ka ne ha‘i ‘aki au ha fitu‘i fau mata ‘a ia kuo te‘eki ke fakamōmoa, te u toki vaivai ai, ‘o u hoko ‘o hangē ha tangata kehe.
8Pea ‘ohake ki he fefine ‘e he hou‘eiki hau ‘o e kau Filisitia ha fitu‘i fau mata ‘a ia kuo te‘eki ke fakamōmoa; pea na‘a ne ha‘i ‘aki ia. 9Pea na‘e ai ha ni‘ihi na‘e nofo ke tokoni ki he fefine, ‘o nau toi ‘i he loki. Pea pehē ‘e he fefine kiate ia, Samisoni ē, ko e kau Filisitia ena ‘oku ‘oho mai kiate koe! Pea na‘a ne motuhi ‘a e fau, ‘o hangē ko e motu ha filo te‘ekafa ‘oka ki‘i lave ki ai ‘a e maama. Ko ia na‘e ‘ikai ‘iloa hono ivi.
10Pea pehē ‘a Tīlila kia Samisoni, Ko eni kuo ke kākaa‘i au, pea kuo ke lea‘aki mai ha koto loi; ‘ā! ke ke tala mai mu‘a pe ko e hā ‘e ha‘i ‘aki koe.
11Pea pehē ‘e ia ki he fefine, Kapau te nau mātu‘aki ha‘i au ‘aki ha ngaahi maea fo‘ou, ‘a ia kuo te‘eki fai‘aki ha ngāue, pea te u toki vaivai ai, ‘o tatau mo ha tangata kehe.
12Ko ia na‘e to‘o ‘e Tīlila ha ngaahi maea fo‘ou, ‘o ne ha‘i ‘aki ia, ‘o ne toki pehē ki ai, Samisoni ‘ē, ko e kau Filisitia ena ‘oku ‘oho mai kiate koe! (he na‘e ai ha malumu na‘e nofo ‘i he loki). Pea na‘a ne motuhi ‘a e ngaahi maea mei hono nima hangē ha filo.
13Pea lea ‘a Tīlila kia Samisoni, Tā ko ho‘o lea kotoa pē kiate au ko e koto kākā pē mo e loi; tala mai pe ko e hā ‘e ha‘i ‘aki koe.
Pea tali ‘e ia ki ai, Ka ne ke lalanga hoku fitu‘i fiinga ni fakataha mo e lālanga–
14Pea hanga ‘e he fefine, ‘o ne fakama‘u#16.14 ‘o ne fakama‘u: ‘Oku ngali tonu hono hiki ‘o: ‘o ne lalanga ki he me‘a lalangá; pea ‘oku pehē he hiki fuoloa ‘e taha: ‘o ne lalanga ki he me‘a lalangá ‘o ne ‘ai ‘o ma‘u; ka ‘oku ‘ikai ke pehē ‘a hono faka-Hepeluú. ‘aki ‘a e fa‘o, pea ne pehē ange, Samisoni ē, ko e kau Filisitia ena ‘oku ‘oho mai kiate koe! Pea ne ofo mei he‘ene mohe, ‘o ne ta‘aki ‘a e fa‘o ‘o e me‘a lalanga, pea mo e me‘a kuo lalanga.
15Pea pehē ‘e he fefine kiate ia, ‘Oku fēfē ho‘o lau ‘o pehē, ‘Oku ou ‘ofa kiate koe; ‘osi, ‘oku ‘ikai ‘iate au ho loto? ko e ta tu‘o tolu eni ho‘o kākaa‘i au, pea ‘oku ‘ikai te ke tala mai pe ‘oku tu‘u ‘i he hā ho fu‘u ivi na. 16Pea ‘i he‘ene fakafiu kiate ia, ‘i he‘ene lau ‘i he ‘aho kotoa pē, mo fakakina kiate ia, na‘e faifai pea ‘ikai te ne meimei kātaki ke mo‘ui; 17ko ia na‘a ne tala ki he fefine hono loto kotoa, ‘o ne pehē ki ai, Kuo te‘eki ke ‘ai ha tele ki hoku ‘ulu, he kuo u nofo ko e nāsili#16.17 nāsili; Vakai ki he 13.5. ki he ‘Otua talu hoku fanau‘i. Kapau ‘e fafai au, pea ‘e toki mahu‘i meiate au hoku ivi, pea te u vaivai ‘o tatau mo ha tangata kehe.
18Pea vakai ‘e Tīlila kuo ne tala eni hono loto kotoa, pea ne fekau ‘o ui mai ‘a e hou‘eiki hau ‘o e kau Filisitia, ‘o ne pehē, Me‘a mai ‘a e tātu‘otaha ko eni; he kuo ne fakahā mai ‘a e kotoa ‘o hono loto. Pea hā‘ele hake ki he fefine ‘a e hou‘eiki hau ‘o e kau Filisitia, ‘o nau ‘alu mo kinautolu ‘a e pa‘anga. 19Pea na‘a ne fakamohe ia ‘i hono funga; ‘o ne ui ange ‘a e tangata, pea tele ‘e he fefine#16.19 ‘a e tangata… fefiné Ko hono faka-Hepeluú ia, ka ‘oku ngali tonu hono hiki ‘o ‘a e tangata, ‘a ia na‘á ne tele. ‘a e fiinga ‘e fitu ‘i hono ‘ulu; ‘o ne kamata ke fakavaivai‘i ia, pea na‘e mahu‘i hono ivi meiate ia. 20Pea ne pehē ange, Samisoni ē, ko e kau Filisitia ena ‘oku ‘oho mai kiate koe! Pea ne ‘ā mei he‘ene mohe, ‘o ne pehē, Te u ‘alu atu pē ‘o hangē ko ‘eku fa‘a fai, ‘o tupe‘i. Ka na‘e ‘ikai te ne ‘ilo kuo mahu‘i ‘a e ‘Eiki meiate ia. 21Pea puke ia ‘e he kau Filisitia, ‘o nau kape‘i hono ongo mata, ‘o nau ‘ohifo ki Kesa, pea nau ha‘i palasa; pea na‘a ne fai ‘a e momosi ‘i he fale fakapōpula. 22Ka na‘e kamata ke toe tupu hono lou‘ulu hili hono fafai.
23Pea fakataha ‘a e hou‘eiki hau ‘o e kau Filisitia ke feia ha feilaulau lahi kia Tākoni ko honau fa‘ahikehe, pea ke fakafiefia: he na‘a nau pehē, Ko hotau ‘otua kuo ne tuku ki hotau nima ‘a hotau fili ko Samisoni. 24Pea ‘i he sio kiate ia ‘e he kakai na‘a nau halelu‘ia ki honau ‘otua; he na‘a nau pehē, Ko hotau ‘otua kuo ne tuku ki hotau nima ‘a hotau fili, ‘a e toko taha na‘a ne maumau‘i ‘a hotau fonua, pea kuo ne tāmate‘i hotau tokolahi. 25Pea ‘i he faifai pea māfana honau loto, na‘a nau pehē, Ui mai ‘a Samisoni ke ne fai faiva ma‘atautolu.#16.24-25 ke ne… ma‘atautolu; pe ka tau fakakata‘aki. Pea na‘a nau ui mai ‘a Samisoni mei he fale pōpula; pea na‘a ne fai faiva ‘i honau ‘ao:#16.24-25 pea na‘á ne… ‘ao; pe pea nau kakae kiate ia. pea na‘a nau taki ia ki he vaha‘a pou. 26Pea na‘e lea ‘a Samisoni ki he tama na‘e puke hono nima, Tuku ke u fāfā ki he ongo pou ‘a ia ‘oku tu‘u ai ‘a e fale, ka u faaki ki ai. 27Ka ko e fale na‘e fonu ‘i he kakai tangata mo e kakai fefine; pea na‘e ‘i ai ‘a e hou‘eiki hau kotoa ‘o e kau Filisitia; pea na‘e nofo mei he tu‘a fale ha toko tolu afe nai, ‘a tangata mo fafine, ‘o nau mamata ki he fai faiva ‘a Samisoni.#16.27 ki he… Samisoni; pe mo kakae kiate ia.
28Pea tautapa ‘a Samisoni kia Sihova, ‘o ne pehē: ‘Ātonai Sihova ē, manatu‘i au; ‘io, fakamālohi‘i au, ‘Elohimi ē, ‘a e tātu‘otaha ko eni: kehe pē ke u sauni ki he kau Filisitia ha taha ‘o hoku ongo poko‘i mata ‘o‘oku ni! 29Pea fā‘ofua ‘e Samisoni ‘a e ongo fu‘u pou loto, ‘a ia na‘e tu‘u ai ‘a e fale, ‘o ne puke ‘a e taha ‘aki hono nima to‘omata‘u mo e taha ‘aki hono to‘ohema. 30Pea pehē ‘e Samisoni, Ke mole ‘eku mo‘ui fakataha mo e kau Filisitia! Pea ne tulolo ‘aki hono ivi kotoa, pea na‘e holo ‘a e fale ki he hou‘eiki mo e kakai kotoa na‘e ‘i ai. Ko ia ko e kakai na‘a ne tāmate‘i ‘i he‘ene pekia na‘e tokolahi ‘i he kakai na‘a ne tāmate‘i ‘i he‘ene mo‘ui.
31Pea na‘e ‘alu hifo hono kāinga mo e fale kotoa ‘o ‘ene ‘eiki, pea na‘a nau fata ia, ‘o ‘ohake, ‘o nau telio ‘i he vaha‘a ‘o Sola mo ‘Esitaoli, ‘i he fonualoto ‘o ‘ene ‘eiki ko Mānoa. Pea kuo ne fakamaau ‘a ‘Isileli ‘i he ta‘u ‘e uofulu.
Currently Selected:
KAU FAKAMAAU 16: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
