Sēmisí 1
1
1TŪ ko au sēmisi, ko e tamaio‘eiki ‘a e ‘Otua mo e ‘Eiki ko Sīsū Kalaisi,#Māt 13.55; Ma‘ake 6.3; Ngā 15.13; Kal 1.19 ko ‘eku tohi ki he matakali ‘e hongofulu mā ua ‘oku nofo movetevete: ‘ofa atu.
Ko e Tuí mo e Potó
2Si‘oku kāinga, mou lau ko e koto fakafiefia ‘oka mou ka tō ki he ngaahi ‘ahi‘ahi kehekehe; 3ko ho‘omou ‘ilo, ko e sivi ‘o ho‘omou tui ‘oku ne fakatupu ‘a e kātaki. 4Pea ko eni, tuku ke fai ‘e kātaki ‘ene ngāue ke haohaoa, koe‘uhi ke mou haohaoa, mo tu‘u kakato, ‘o ta‘emasiva ‘i ha me‘a. 5Ka ‘o kapau ko e poto ‘oku masiva ai ha taha, ke ne kole mei he ‘Otua, ‘a ia ‘oku ne foaki ‘ata‘atā pē ki he kakai kotoa pē, ‘o ‘ikai ‘atu mo e lau; pea ‘e foaki ia ki ai. 6Ka ke ne kole tui pē, ‘o ‘oua ‘e tāla‘a. He ko ia ‘oku tāla‘a ‘oku ne hangē ko e peau ‘o e tahi ‘oku fakateka ‘o fepālekina ‘e he matangi. 7‘Io, ke ‘oua na‘a mahalo ‘e he tangata ko ia te ne ma‘u ha me‘a mei he ‘Eiki. 8Ko e tangata lotolotoua ia, ta‘emaau ‘ene anga kotoa pē.
Ko e Masivá mo e Koloa‘iá
9Pea ko eni, ke vīkiviki si‘i tokoua lotu ‘oku mā‘ulalo ‘oka hākeaki‘i ia: 10ka ko si‘i koloa‘ia ‘oka fakatōkilalo‘i: he ‘oku hangē ko e fisi‘i mohuku ‘ene mole ‘a‘ana.#‘Ais 40.6-7 (LXX) 11He na‘e hopo ‘a e la‘ā mo ‘ene faka‘a‘afu, pea mae ‘a e mohuku, pea ngangana hono fisi, pea mole hono matamatalelei. ‘E pehē pē foki ‘a e kekena ‘a si‘i koloa‘ia, ‘oka fai atu hono ‘alunga ko ia.
Ko e Ngaahi Faingata‘a mo e ‘Ahi‘ahi
12Monu‘ia ā ka ko e tangata ‘oku ne kātaki ha ‘ahi‘ahi: he ‘oka ‘osi hono sivi, te ne ma‘u ai ‘a e kalauni ‘o e mo‘ui, ‘a ia kuo ne tala‘ofa kiate kinautolu ‘oku ‘ofa kiate ia. 13Ke ‘oua na‘a lau ‘e ha toko taha ‘Oka ‘ahi‘ahi‘i, ‘Oku mei he ‘Otua hoku ‘ahi‘ahi‘i: he ko e ‘Otua ‘oku ‘ikai ma‘ahi‘ahi‘i ‘e he kovi, pea ‘oku ‘ikai ke ‘ahi‘ahi‘i ha taha ‘e He‘ene ‘Afio. 14Ka ‘oku ‘ahi‘ahi‘i ‘a e tangata takitaha he tohoaki ia ‘e he‘ene holi ‘a‘ana, mo taki ‘aki ha mounu. 15Faifai pea tu‘itu‘ia ‘a e holi ko ia, ‘o ne fanau‘i ha angahala: pea ko e angahala ko ia, ‘oka kakato, ‘oku ne fā‘ele‘i ‘a e mate.
16Si‘oku kāinga ‘ofa‘anga, ‘oua te mou hē. 17‘Ilonga ha foaki lelei, pea ‘ilonga ha me‘a‘ofa haohaoa, ko e ‘alu hifo pē ia mei he Tamai ‘a e ngaahi maama, ‘a ia ‘oku ‘ikai ‘i He‘ene ‘Afio ha feto‘oaki, pe ko ha nenefu tupu ‘i ha‘ane liliu. 18Koe‘uhi ko hono finangalo pē ‘o‘ona na‘a ne fakatupu ai ‘a kitautolu ‘aki ‘a e folofola ‘o e mo‘oni, koe‘uhi ke tau hoko ko e polopolo tokua ‘o e ngaahi me‘a kuo ne ngaohi.
Ko e Fanongó mo e Talangofuá
19Seuke, ‘oku mou lāu‘ilo pē, si‘oku kāinga ‘ofeina: ka ke vave ‘a e tangata fua pē he fanongo, kae fakatotoka ki he lea, pea fakatotoka ki he ‘ita. 20He ko e ‘ita ‘a e tangata ‘oku ‘ikai te ne ngāue ki he mā‘oni‘oni faka‘otua. 21Ko ia, mou hiko ‘a e veve kotoa pē, mo e ngaoha‘a ‘o e lotokovi, ‘o mou tali anga vaivai ‘a e folofola kuo tō, ‘a ia ‘oku mafai ke fakamo‘ui homou laumālie.
22Ka mou hoko ko e kau fai ki he folofola, ‘o ‘ikai ko e kau fanongo pē, ‘o mou kākaa‘i kimoutolu. 23He ka ai ha taha, ‘a ia ko ha fanongo pē ki he folofola, ka ko ha ta‘efai ki ai, ‘oku tatau ia mo ha siana ‘oku ne fakasio ki he fōtunga na‘e tupu mo ia ‘i ha sio‘ata: 24he kuo ne fakasio leva kiate ia, pea ne ‘alu, pea ngalo leva pe ko e hā hono anga. 25Ka ko ia ‘oku ne fakasio hifo ki he lao haohaoa, ‘a e lao tau‘atāina, ‘o ne ta‘utu ai, kae‘uma‘ā ‘oku ‘ikai te ne hoko ko ha taha fanongo kae ngalo, ka ko ha taha fai ngāue, ‘ē, ‘e monū‘ia ‘a e toko taha ko ia ‘i he‘ene fai.
26Ka ai ha taha ‘oku lau ko e lotu ia; ‘osi, ‘oku ‘ikai te ne ‘ai piti hono ‘elelo, ka neongo ia ka ‘oku ne kākaa‘i pē hono loto, ‘ē, ko e lotu ‘a e toko taha ko ia ko e launoa, 27Ko eni ia ‘a e tō‘onga lotu ‘oku ma‘a mo ta‘ehano ‘uli ‘i he ‘afio ‘a e ‘Otua ko ‘etau Tamai, ‘a ‘ete ‘a‘ahi ki he fa‘ahinga mātu‘a mate mo e kau uitou ‘i he‘enau mamahi, ‘a ‘ete tauhi kita mei māmani ke ta‘ehato ‘ila.
Currently Selected:
Sēmisí 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
