KO ‘AISEA 29
29
Ko e Iku‘anga ‘o Selusalema
1‘OIAUĒ ‘Alieli, ‘Alieli, si‘i kolo na‘e ‘apitanga ai ‘a Tēvita! fakahoko mai ha ta‘u mo ha ta‘u; foli ‘a e ngaahi kātoanga: pea te u toki faka‘efihi ‘a ‘Alieli, 2pea ‘e ai ha to‘e mo ha māpuhoi: kae hoko ia kiate au ko e ‘Alieli tofu pē (talikula‘anga ‘o e ‘Otua). 3Pea te u ‘apitanga takatakai kiate koe, pea te u loki koe ‘aki ha ngaahi tu‘unga le‘o, pea te u fokotu‘u kiate koe ha ngaahi taua. 4Pea ka fakamo‘ulaloa koe, te ke lea mei he kelekele, pea ‘e ongo mei he efu ho‘o lea, ‘o alamuhu pē: ‘io, ‘e ongo hake ho‘o lea mei he kelekele hangē ha lea ‘a ha fa‘ahikehe, ‘io, ‘e ongo mei he efu ho‘o lau, ‘o fanafana pē.
5Ka ko ho‘o fu‘ufu‘unga fili na ‘oku ongoonga‘a mai, te nau hoko ko e efu valevale; pea ko e fu‘ufu‘unga kau fakamālohi na ‘oku ongoonga‘a mai, te nau hangē ko e kafukafu ‘oku punakaki: pea ‘e hoko fakafokifā, fakafokifā ‘aupito. 6‘Oku ha‘u meia Sihova ha ‘a‘ahi, ha‘u mo e fatulisi, mo e mofuike, mo e fu‘u longoa‘a ‘a e ‘ahiohio mo e afā, mo e ulo ha afi faka‘auha. 7Pea ko e fu‘ufu‘unga pule‘anga ‘oku ongoonga‘a mai kuo nau fakatē mai ke tau‘i ‘a ‘Alieli, ‘io, ko kinautolu kotoa ‘oku tau‘i ia mo hono talitau‘anga, mo kinautolu ‘oku faka‘efihi ia, te nau hangē ha misi, ha vīsone po‘uli. 8‘Io, ‘oku hangē ko e misi ‘a e tangata fiekaia, tā ‘oku ne kai; ka ‘i he‘ene ‘ā ko e koto nge‘esi ‘ene holi: pea hangē ko e misi ha tangata fie inu, tā ‘oku ne inu; ka ‘i he‘ene ‘ā, ‘oku ne vaivai, pea ‘oku manganga ‘ene holi: ‘e pehē ‘a e fu‘ufu‘unga pule‘anga ‘oku ongoonga‘a mai, ‘a ia ‘oku nau fakatē mai ki Mo‘unga Saione.
9‘Io, mou tu‘u, ‘o ofo; fakakuikui kimoutolu, ‘o hoko ko e kui: ko e fa‘ahinga konā ena, ka ‘oku ‘ikai ko e uaine; ‘oku nau tāsipesipa, ka ‘oku ‘ikai ko e kava mālohi. 10He kuo lilingi kiate kimoutolu ‘e Sihova ha laumālie mohe ma‘u, pea kuo ne tāpuni homou mata–ko e kau palōfita; pea kuo ne fakapūlou homou ‘ulu–‘a e kau matalōloa.#Lom 11.8 11Ko ia ko e palofisai kotoa ‘e tatau kiate kimoutolu mo e lea ‘o e tohi kuo sila‘i, ‘a ia kuo nau ‘ange ki ha taha ‘oku poto ‘i he tohinima, mo nau pehē, Lau mu‘a eni: ka ka tali mai ‘e ia, ‘Oku ‘ikai te u lava, he kuo sila‘i. 12Pea ‘ange ‘a e tohi ki ha taha ‘oku ‘ikai ke poto ‘i he lau tohi, mo pehē, Lau mu‘a eni; ka ka tali ‘e ia, ‘Oku ‘ikai te u poto ‘i he lau tohi.
13Pea folofola mai ‘a ‘Ātonai, Ko e me‘a ‘i he ‘unu mai ‘a e kakai ni ‘aki honau ngutu, mo fakalāngilangi‘i au ‘aki honau loungutu, ka ko honau loto kuo nau fakamama‘o meiate au, pea kuo hoko ‘enau lotu kiate au ko e tu‘utu‘uni pē ‘a e tangata kuo nau ako ai:#Māt 15.8-9; Ma‘ake 7.6-7 14ko ia ko au eni te u fai atu ‘eku ngāue fakaofo ki he kakai ni, ko e fakaofo ka ko ha fakaofo: pea kuo ka‘anga ‘a e poto ‘a e kau poto, pea ko e fakakaukau ‘a honau kau ‘atamai ‘e puli.#1 Kol 1.19
Ko e ‘Amanaki Lelei ki he Kaha‘ú
15‘Oiauē ‘a kinautolu ‘oku uku loloto meia Sihova ke fufū ‘enau fakakaukau! ko ia, ‘oku hoko ko e koto po‘uli ‘enau me‘a ‘oku fai, pea nau lau, Ko hai ‘oku sio mai? pea ko hai ‘oku ‘ilo ‘etau me‘a? 16Te mou fakakehe me‘a koā? ‘E lau ‘a e tufunga ‘umea ko e ‘umea, kae lau ‘e he me‘a kuo ngaohi kiate ia na‘a ne ngaohi, Na‘e ‘ikai te ne ngaohi au; pe lau ‘a e me‘a na‘e fa‘u kiate ia na‘e fa‘u ia, ‘Oku ‘ikai ha‘ane poto?#‘Ais 45.9
17‘Ikai ‘oku toe si‘i ‘aupito pea liliu ‘a Lepanoni ko e tokanga ngoue, pea lau ‘a e tokanga ngoue ko e vao pē?
18Pea ‘i he taimi ko ia ‘e ongo‘i ‘e he tuli ‘a e lea ‘o e tohi, pea ‘e sio ‘e he mata ‘o e kui mei he nenefu mo e po‘uli ‘oku nau ‘i ai. 19Kae fakautuutu ‘a e fiefia ‘a e anga malū ‘ia Sihova, pea ko e kau masiva ‘o e kakai te nau tome‘e ‘i he Tāpuhā ‘o ‘Isileli. 20He ko e tangata fakamālohi kuo ‘ikai, pea ko e tangata kakae kuo ‘osi, pea kuo tu‘usi ‘a kinautolu fua pē ‘oku hehenga ki he kovi: 21‘a kinautolu ‘oku fakahalaia ha tangata ‘i ha lea pē, pea ‘oku nau fanga tauhele ki ha taha ‘oku fakatonutonu me‘a ‘i mala‘e,#29.21 ‘i mala‘e; pe ‘i matanikolo. ‘o le‘ei ‘a e me‘a ‘a e faitotonu ‘aki ha me‘a noa.
22Ko ia, ko eni ‘a e folofola ‘a Sihova ki he fale ‘o Sēkope, ‘a ‘Ene ‘Afio na‘a ne huhu‘i ‘a ‘Epalahame; Hili eni ‘e ‘ikai mā ‘a Sēkope, pea hili eni ‘e ‘ikai tea hono fofonga. 23He ka mamata ‘e he‘ene fānau ‘a e ngāue ‘a hoku nima ‘i honau lotolotonga, ‘e tāpuhā ‘a hoku hingoa ‘iate kinautolu; ‘io, te nau tāpuhaa‘i ‘a e Tāpuhā ‘o Sēkope, pea te nau teki ki he ‘Otua ‘o ‘Isileli. 24Pea ko kinautolu ‘oku laumālie hē ‘oku ‘ilo poto, pea ko e kau hanu ‘oku nau tali akonaki.
Currently Selected:
KO ‘AISEA 29: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
