KO ‘AISEA 28
28
Ko ha Fakatokanga ki he Pule‘anga Tokelaú
1‘OIAUĒ ‘a e kalauni ‘oku pōlepole ai ‘a e kau konā ‘o ‘Ifalemi, ‘io, ki he fisi maheikau ko hono teunga matamatalelei, ‘a ia ‘oku tu‘u ki he funga tekeutua, ‘i he tafangafanga mahu ‘o e kau ikuna ‘e he kava! 2Vakai, ‘oku ‘ia ‘Ātonai ha me‘a mālohi mo tuotuofefeka; ha me‘a hangē ha taufa maka, ha afā maumau, hangē ha fu‘u taufa vai‘oho te ne fakahifo ha‘aha‘a mai ki māmani. 3Te nau malaki ‘aki honau va‘e ‘a e kalauni ‘oku pōlepole ai ‘a e kau konā ‘o ‘Ifalemi: 4pea ko e me‘a ‘e hoko ki he fisi maheikau ko hono teunga matamatalelei, ‘a ia ‘oku ‘i he funga tekeutua ‘i he tafangafanga mahu, ‘a e me‘a ‘oku hoko ki ha fo‘i fiki tokamu‘a te‘eki hoko ‘a e to‘ukai, ‘a ia ka sio leva ki ai ha taha, te‘eki ke ne meimei ala kuo folo.
5‘I he taimi ko ia ‘e hoko ‘a Sihova Sāpaoti ko e kalauni teunga ‘ia, mo e pale matamatalelei, ki he toenga ‘o hono kakai; 6pea ko e laumālie anga fakamaau kiate ia ‘oku nofo ‘i he nofo‘a ‘a fakamaau, mo e ivi fakahelo ‘oka lingina ‘a e tau ‘i he matanikolo.
Ko ‘Aisea mo e Kau Palōfita Hua‘akava‘ia ‘o Siuta
7Pea ko e fa‘ahinga ko ena foki ‘oku tāsipesipa ‘enau uaine‘ia, pea ‘oku nau ninimo ‘i he kava mālohi; ‘oku tāsipesipa ‘a e Taula‘eiki mo e Palōfita ‘i he kava mālohi, kuo fōngia ‘e he uaine; ‘oku nau ninimo mei he kava mālohi, ‘oku nau tāsipesipa lolotonga ‘enau mata vīsone, ‘oku nau fai tete pē ‘a e fakamaau. 8Seuke, kuo fonu ‘a e ngaahi tēpile ‘i he lua me‘a kovi, ‘o ‘ikai toe ha potu.
9Ko hai tū ‘oku ne fie ako me‘a ki ai? pea ko hai tū ‘oku ne fie fakamatala ongoongo ki ai? Ko e tamaiki mavae ‘apē, ko e fa‘ahinga toki mavahe mei he huhu? 10‘Ene- “Ko e fekau ē mo e fekau ē, ko e fekau ē mo e fekau ē; ko e laine ko ē mo e laine ko ē, ko e laine ko ē mo e laine ko ē; toe taha ki hē, toe taha ki hē.”
11Lelei, te ne fai ‘ene lea ki he kakai ni ‘aki ‘a e fa‘ahinga le‘o vale, pea ‘aki ‘a e ‘elelo kehe.#1 Kol 14.21 12He na‘a ne pehē kiate kinautolu, Ko eni pē ‘a e mālōlō‘anga–mou tuku ‘a e ongosia ke mālōlō–pea ko eni pē ‘a e me‘a ‘e ma‘u ai ‘a e fakamānava hake: ka na‘e ‘ikai te nau fie fanongo. 13Ko ia, ‘e hoko ai ‘a e folofola ‘a Sihova kiate kinautolu ko e fekau mo e fekau, ko e fekau mo e fekau; ko e laine ē mo e laine ē, ko e laine ē mo e laine ē; toe taha ki hē, toe taha ki hē; koe‘uhi ke nau ‘alu, ‘o tō fo‘ohake, ‘o lailai, ‘o mo‘ua ‘i he hele, ‘o pō kinautolu.
Ko ha Maka Tuliki Mo‘o Saione
14Ko ia mou fanongo ki he folofola ‘a Sihova, ‘a e tu‘unga me‘a kakae, ‘oku mou pule ki he kakai ni ‘oku ‘i Selusalema: 15he ‘oku mou pehē, Kuo tau fai talite mo Mate, pea ‘oku ai ‘etau alea mo Hētesi; ko ia ko e uipi lōmaki, ka laka ange, ‘e ‘ikai a‘u kiate kitautolu; he kuo tau fili ‘a e loi mootau hūfanga, pea ko e kākā kuo tau toi ai. 16Ko ia ko eni ‘a e folofola ‘a ‘Ātonai Sihova: Vakai, ko au eni kuo ‘ai ‘i Saione ha maka, ha maka sivi, ha maka tuliki mahu‘inga kuo fungani hono fakatoka: ko ia ‘oku tui ‘e ‘ikai ‘oho.#Saame 118.22-23; Lom 9.33; 10.11; 1 Pit 2.6 17Pea te u tuku ‘a e fakalao mōno fua, pea ko e faitotonu mōno fuavai tu‘u: pea ‘e ‘ave ‘e ‘uha maka ‘a e hūfanga loi, pea ko e toitoi‘anga ‘e ‘auhia.
18Pea ko ho‘omou fuakava mo Mate ‘e tāmate‘i, pea ko ho‘omou alea mo Hētesi ‘e ‘ikai tu‘u; ka laka ange ‘a e uipi lōmekina, te mou hoko ko e me‘a ke malakia ai. 19Ka ai ha‘ane laka ange, te ne ‘ave kimoutolu; he ko e pongipongi kotoa pē te ne laka ange, ‘o fai ‘aho mo e pō; pea ko e fakamatala ongoongo ko e koto fakalifulifu pē. 20He ‘oku nounou ‘a e mohenga ke fakaloloa ai ha taha; pea ‘oku fusimo‘omo ‘a e kafu ke takai ‘aki. 21He tu‘u ‘a Sihova ‘o hangē ‘ene tu‘u ‘i Felesimi, pea te ne tuputāmaki ‘o hangē ko ‘ene fai ‘i he tele‘a ‘o Kipione, ke fai ‘ene ngāue, ka ko e ngāue kehe, ‘io, ke fai hono fatongia ka ko ha fatongia fo‘ou.#Sios 10.10-12; 2 Sām 5.20; 1 Kal 14.11
22Pea ko eni, ‘oua te mou ha‘aki kakae, na‘a tuki ke ma‘u homou kii‘i: he ko e me‘a kuo u fanongo ki ai meia ‘Ātonai Sihova Sāpaoti ko e ‘auha mo e tu‘utu‘uni pau ki he fonua kotoa.
Ko e Poto ‘o e ‘Otuá
23Fokotu‘u telinga mai, pea fanongo ki hoku le‘o: tokanga, ‘o ongo‘i ‘eku lea. 24Ko e fa‘a ‘i he‘ene tō ta‘u he ‘oku ne fai ai pē ‘a e huo palau? ‘a e keli fulihi mo e leeki ‘o e kelekele? 25Ka lava hono fakatokalelei, ‘ikai ‘oku ne tūtuu‘i ‘a e kesia, mo laku veteki ‘a e komino? Ka ‘oku ne ‘ai ‘a e uite faka‘otu, mo e pa‘ale#28.25 ‘Oku ‘i ai mo e fo‘i lea ‘e taha ‘oku tu‘u heni ‘i he faka-Hepeluú, ka ‘oku ‘ikai ke mahino ‘a hono ‘uhingá. ‘i he potu ‘oku vahe‘i, mo e kusemi ‘i he kau‘ā. 26He kuo ako‘i ia ‘e He‘ene ‘Afio ki hono konisitūtone, ‘oku hīnoi‘i ia ‘e hono ‘Otua. 27Seuke, ‘oku ‘ikai ke ‘au‘au ‘a e kesia ‘aki ha sāliote, pe fakateka ‘a e va‘e ‘o e sāliote ki he komino; ka ko e kesia ‘oku hahahaha ‘aki ha kupu‘i ‘akau, pea ko e komino ‘aki ha tokotoko. 28He ‘oku laiki ‘a e ta‘u ‘oku ngaohi mā ‘aki? ‘Ā, tala‘ehai ‘oku ne haha ia ma‘u ai pē, mo fakateka ai ‘a e va‘e ‘o ‘ene sāliote mo ‘ene fanga hoosi; ‘oku ‘ikai te ne ‘ai ke laiki. 29Ko e me‘a ko ia foki ‘oku ‘alu atu meia Sihova Sāpaoti, ‘a e ‘Afio ‘oku fakaofo ‘ene fakakaukau, pea fungani ‘ene ‘ilo me‘a.
Currently Selected:
KO ‘AISEA 28: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
