KO ‘AISEA 10
10
1‘OIAUĒ ‘a kinautolu ‘oku fokotu‘u tu‘utu‘uni kovi,
Mo e kau sikalaipe ‘oku sila‘i me‘a fakamamahi:
2Ke ta‘ofi ‘a e masiva mei he tangi ki he‘enau totongi, pea ke fa‘ao ‘a e totonu meiate kinautolu ‘i hoku kakai ‘oku tu‘utāmaki; ke hoko ‘a e kau uitou ko ‘enau vete, mo folofua ‘a e tamai mate!
3Pea ko e hā te mou fai ‘i he ‘aho ‘o e ‘eke,
Pea ‘i he taufa ‘oku ha‘u mei he mama‘o?
Ko hai te mou hola ki ai ke ma‘u tokoni?
Pea te mou tuku ‘i fē ‘a e lāngilangi kuo mou ma‘u ka mou ‘alu?
4‘Oku toe pē ‘a e mapelu ‘i he potu ‘o e pōpula, pea te nau tō ‘i he potu ‘o e mate he tau.
Ka neongo ia kotoa,
Ka ‘oku ‘ikai lolou hono houhau,
Pea ‘oku kei mafao atu hono nima!
Ko Hono Me‘angāue‘aki ‘e he ‘Otuá ‘a e Tu‘i ‘Āsiliá
5‘Oiauē ‘a ‘Āsilia, ko e ‘akau ‘oku fakaai ‘aki ‘eku matalili; ‘io, ko e mātā ‘oku nau to‘o ko ‘eku tautea!#‘Ais 14.24-27; Nēhu 1.1–3.19; Sef 2.13-15 6Toki ai ha pule‘anga mālualoi pea u fekau ia ki ai, pe ha kakai ‘oku ou houhau ki ai te u fai hono tu‘utu‘uni, ke vete mai ha vete, mo fa‘ao mai ha fa‘ao, ‘o tuku ia ko e me‘a ke malakekina hangē ko e pelepela ‘i he ngaahi hala.
7Ka tala‘ehai ‘oku pehē ‘ene fakakaukau ‘a‘ana, pea tala‘ehai ‘oku hā pehē ki hono loto; ka ko e me‘a ‘oku ‘i hono loto ke faka‘auha mo tu‘usi ‘ani kakai–hono ta‘inga? 8He ‘oku ne pehē, Ko e hou‘eiki ‘o ‘eku tau, ‘ikai koni tu‘i fua pē? 9‘Ikai ‘oku tatau ‘a Kālino mo Kalikimisi? ‘ikai na‘e tatau ‘a Hēmati mo ‘Āpati! ‘ikai na‘e tatau ‘a Samēlia mo Tāmasikusi? 10Hangē ko e a‘u hoku nima ki he ngaahi pule‘anga ‘otua noa na, (pea na‘e lahi honau ‘aitoli ‘onautolu ‘i Selusalema mo Samēlia), 11pea hangē ko ‘eku fai ki Samēlia mo hono ngaahi ‘otua noa, ‘ikai ‘e pehē mo ‘eku fai ki Selusalema mo hono ngaahi tamapua?
12Ko ia, ka faifai pea ‘osiki ‘e ‘Ātonai ‘ene ngāue kotoa ‘i Mo‘unga Saione, pea ‘i Selusalema, te u toki fai ha ‘eke ki he fua ‘o e loto pupula ‘o e Tu‘i ‘Āsilia, mo ‘ene fongofonga hihiki mai.
13He kuo ne pehē, Ko e ngū ‘o hoku nima ni kuo u fai‘aki ia, mo e poto ‘o‘oku–he ko e tama fakakaukau au–pea u hikihiki ‘a e kau‘ā ‘o e ngaahi kakai, pea u fa‘ao ‘enau koloa, pea u lī ki lalo ‘a e nofo taloni, ‘o taau mo e Pulu: 14pea na‘e a‘usia ‘e hoku nima ‘a e koloa, ‘a e ngaahi kakai, hangē ko e a‘usia ha pununga; pea hangē ko e tufi ‘a e ngaahi fo‘i manu ‘oku li‘aki, pehē kuo u tufi ‘e au ‘a māmani kātoa: pea koloto ke ai ha taha ke kapakapa, pe fakamanga, pe taukete mai.
15‘O pole koā ‘a e toki kiate ia ‘oku ne apo ia? pe fakapupula ‘a e kili kiate ia ‘oku ne kilisi ‘aki? Tā ko e tākalo ia ‘e he tokotoko ‘a kinautolu ‘oku hiki ia: tā ko e hiki ‘e he mātā ‘a ia ‘oku ‘ikai ko e ‘akau.
16Ko hono ō ia ‘e tuku atu ‘e ‘Ātonai Sihova Sāpaoti ki hono hou‘eiki nge‘enge‘e ‘a Fakalilelila; pea ‘i he loto lāngilangi ‘o‘ona ‘e tutu ha mōfia hangē ko e vela ha afi. 17Pea ‘e hoko ‘a e maama ‘o ‘Isileli ko e afi, pea ko hono Tāpuhā ko e ulo‘i afi: pea ‘oku ne tutu mo keina hono ‘akau veli mo hono talatala ‘i ha ‘aho pē taha. 18Pea ko e lāngilangi ‘o hono vao, mo hono tokanga ngoue, te ne keikeina ‘a e loto mo e kakano fakatou‘osi; 19pea te ne ‘au‘osi ai ‘o hangē ko e tangata mahaki.#10.19 hangē… mahaki; pe Hangē ha tangata to‘o fuká. Pea ko e toenga ‘akau ‘o hono vao ‘e ala lau; seuke, ‘e ala tohi kinautolu ‘e ha tamasi‘i.
Ko e Foki Mai ‘a e Ni‘ihi
20Pea ka hoko ‘a e ‘aho ko ia, pea ko e toenga ‘o ‘Isileli, mo e hao ‘o e fale ‘o Sēkope, ‘e ‘ikai te nau kei faaki kiate ia na‘a ne taa‘i kinautolu; ka te nau faaki kia Sihova ko e Tāpuhā ‘o ‘Isileli, ‘o fai mo‘oni. 21‘E foki ha toenga, ‘a e toenga ‘o Sēkope, ki he Helo ‘Otua. 22He neongo na‘e hangē ko e ‘one‘one ‘o e tahi ‘a ho kakai, ‘e ‘Isileli, ko e toenga pē ‘e foki: ko e fu‘u faka‘auha kuo tu‘utu‘uni, ‘o tafi atu mo e faitotonu.#Lom 9.27 23He ko e ‘auha, mo e tu‘utu‘uni pau, ‘oku lolotonga fai ‘e ‘Ātonai Sihova Sāpaoti ‘i he lotolotonga ‘o e fonua kotoa.
24Ko ia, ‘oku folofola mai ‘a ‘Ātonai Sihova Sāpaoti, ‘o pehē, ‘E hoku kakai, ‘a e nofo Saione, ‘oua te ke manavahē ki ‘Āsilia ‘i he‘ene taa‘i koe ‘aki ‘ene sēpita, mo ofa‘aki ‘ene mātā kia koe, ‘o hangē ko e fai ‘i ‘Isipite. 25He ‘oku toe si‘i ‘aupito, pea kuo ‘osi ‘a e tautea, pea nofo ‘a ‘eku matalili ke faka‘auha ‘a kinautolu na. 26Pea ‘e tākalo ‘a e uipi kiate kinautolu ‘e Sihova Sāpaoti, hangē ko e taa‘i ‘o Mitiani ‘i he Makatu‘u ‘o ‘Ōlepi; pea ko hono tokotoko ē ‘i he funga tahi; ‘io, ‘oku ne ofa ia hangē ko e fai ki ‘Isipite. 27Pea ‘e hoko ‘i he ‘aho ko ia, ‘e mole ‘enau kavenga mei ho uma, mo ‘enau ‘ioke mei ho kia; ‘io, ‘e motu ‘a e ‘ioke ‘i he tekena ‘e he ngako.#10.27 ‘io… ngako; ‘Oku ‘ikai ke mahino ‘a hono faka-Hepeluú.
Ko e ‘Oho Mai ‘a e Filí
Kuo ne a‘u ki ‘Ai!#10.27 ‘Ai; Ko e kolo ko ení mo e tukui kolo kehe ‘oku fakalau mai he veesi 28-32, ko e ngaahi kolo ofi ki Selusalema, ‘i he hala na‘e pau ke fou mai ai ha kautau te nau loto ke tau‘i ‘a Selusalema mei he tokelaú.
28‘Oku ne laka atu ‘i Mikiloni!
‘Oku ne tuku ‘i Mikimasi ‘ene ngaahi kavenga!
29Kuo nau tuku ki mui ‘a e hala fakateiapa‘a!
“Tau mohe ‘i Kepa,”
‘Oku tete ‘a Lama!
Kipea-Saula ‘oku hola!
30Foki ta‘ahine Kālimi,
‘Ai atu ha‘o fu‘u kaila!
Laisi ē, fakafanongo atu mu‘a!
‘Oiauē si‘i ‘Anatoti!
31Kuo mātuku atu ‘a Matemena!
‘Oku fetukutuku ‘a e nofo Kēpimi! 32Na‘a mo e ‘aho ni ‘oku ne ‘i Nopi, ‘o tu‘u!
‘Oku ne tākalo hono nima
‘I he mo‘unga ‘o e ta‘ahine ko Saione,
‘A e mo‘unga ko Selusalema!
33Vakai, ko ‘Ātonai Sihova Sāpaoti ‘oku ne have‘i atu, ‘o tā ‘a e ‘ulu‘ulu; pea ko e ngaahi fu‘u ‘akau mā‘olunga ‘oku tā, pea ko kinautolu ‘oku māmā‘olunga ‘oku fakatoutoumoloto pē. 34Pea ‘oku ne tā ‘a e ngaahi fihi ‘o e vao ‘aki ‘a e ukamea, pea ‘oku tō ‘a Lepanoni na ‘i he ngāue ‘a ha taha ‘oku hopo hake.
Currently Selected:
KO ‘AISEA 10: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
