Hepelū 5
5
1HE ‘ilonga ha Taula‘eiki Lahi, ko e me‘a ‘i hono to‘o mei he kakai, ko ia ‘oku fakanofo ia ma‘a e kakai, ke tokanga ki he‘enau ngaahi me‘a mo e ‘Otua; ke ne ‘atu koe‘uhi ko e angahala ‘a e ngaahi me‘a‘ofa mo e ngaahi feilaulau. 2Ko e toko taha ‘oku ne lava ke fai faka‘atu‘i ki he fai vale, mo e kakai kuo hē; koe‘uhi kuo kāpui mo ia foki ‘e he vaivai‘anga. 3Pea koe‘uhi ko e me‘a ko ia, kuo pau ai ke ‘atu ha feilaulau ma‘a e angahala; ‘o ‘ikai‘ia ko e kakai pē, ka ma‘ana foki.#Lev 9.7 4Kae‘uma‘ā ‘oku ‘ikai ke to‘o ‘e ha taha ‘a e lakanga ko ia ma‘ana, ka ‘i hono ui ki ai ‘e he ‘Otua, ‘o hangē foki ko ‘Ēlone.#‘Eki 28.1
5Ko ia, na‘a mo Kalaisi, na‘e ‘ikai te ne hākeaki‘i ‘e ia ia ke Taula‘eiki Lahi, ka ko ia pē na‘a ne folofola kiate ia,#Saame 2.7
Ko hoku ‘Alo koe;
Kuo u fakatupu koe he ‘aho ni.
6Hangē foki ko ‘ene folofola ‘i he potu ‘e taha,
Ko e taula‘eiki koe ‘o laui ‘ītāniti
‘I he ‘alunga ‘o Melekiseteki.#5.6: ‘I… Melekiseteki; pe ‘o hangē ko Melekisetekí; pe ‘i he hohoko fakahangatonu mai meia Melekiseteki.
7Ko e toko taha ko ia ‘i he ngaahi ‘aho ‘o ‘ene nofo kakano, na‘a ne ‘atu ‘a e ngaahi lotu, mo e ngaahi hū tōtōaki, kiate ia na‘e mafai ke fakahaofi ia mei he mate, ‘o ne fai‘aki ‘a e fu‘u kalanga, mo e tangi lo‘imata: pea na‘e tali ko e me‘a ‘i he‘ene fai fakaongoongo. 8‘Io, neongo ko e ‘Alo ia, ka na‘a ne lava ‘i ‘ene talangofua, ko e ako ‘e he‘ene ngaahi mamahi. 9Pea kuo fakahaohaoa leva, na‘a ne hoko ma‘anautolu fua pē ‘oku talangofua kiate ia, ko e tupu‘anga ‘o ha fakamo‘ui ‘oku laui ‘ītāniti; 10he ui ia ‘e he ‘Otua, ko e Taula‘eiki Lahi ‘i he ‘alunga ‘o Melekiseteki.#5.10: ‘i… Melekiseteki; (vakai ki he 5.6).
Ko e Fakatokanga he Li‘aki ‘ete Tuí
11‘A ia ‘oku lahi ‘emau fakamatala ke fai ki ai, pea faingata‘a hono faka‘uhinga; koe‘uhi ko ho‘omou hoko ko e kau ongongata‘a. 12He neongo na‘e totonu ke mou faiako, koe‘uhi ko ho‘omou fuoloa, ka ko homou taau ‘eni ke toe ako kiate kimoutolu ‘e ha taha ‘a e motu‘alea ‘o e ngaahi ‘elemēniti ‘o e folofola ‘a e ‘Otua. ‘Io, kuo mou hoko ko ha kakai ‘oku tuha mo ha hu‘akau pē, ‘o ‘ikai mo e me‘akai mālohi.#1 Kol 3.2 13He ‘ilonga ‘a ia ‘oku me‘akai ‘aki ‘a e hu‘akau, ‘oku ne ta‘epoto ‘i he folofola ‘o e mā‘oni‘oni, he ko e valevale ia. 14Ka ko e me‘akai mālohi ‘oku ‘anautolu ‘oku matu‘otu‘a, ‘a kinautolu ‘a ia ko e me‘a ‘i he‘enau fa‘a fai, kuo ako honau ngaahi ongo‘anga ke sivi ‘a e lelei mo e kovi.
Currently Selected:
Hepelū 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
