KO SĒNESI 31
31
Ko e Hola ‘a Sēkope meia Lēpani
1PEA na‘a ne fanongo ki he lau ‘a e ngaahi foha ‘o Lēpani, ‘o pehē, Kuo ‘ave ‘e Sēkope ‘a e me‘a kotoa ‘a ‘etau tamai; ‘io, ko ‘ene fu‘u mamalu ni ‘oku mei he koloa ‘a ‘etau tamai. 2Pea na‘e vakai ‘e Sēkope, tā ‘oku ‘ikai lelei ‘a e fofonga ‘o Lēpani kiate ia, ‘o hangē ko e taimi mu‘a. 3Pea na‘e folofola ‘a Sihova kia Sēkope, ‘o ne pehē, Foki ki he fonua ‘o ‘ao ngaahi tamai, pea ki ho tupu‘anga; pea te u ‘iate koe.
4Pea fekau atu ‘e Sēkope ke tala kia Lesieli mo Lia ke na ‘alu ange ki ‘uta ki he‘ene fanga manu; 5pea ne pehē kiate kinaua, ‘Oku ou vakai ‘e au ‘a e fofonga ‘o ho‘omou tamai, ‘oku ‘ikai lelei kiate au, ‘o hangē ko e taimi mu‘a: ka kuo ‘iate au ‘a e ‘Otua ‘o ‘eku tamai. 6Pea ko kimoua ‘oku mo ‘ilo kuo u fai tūkuingata ‘eku ngāue ki ho‘omou ‘eiki. 7Pea kuo kākaa‘i au ‘e ho‘omo tamai, pea kuo ne fakakehe ‘eku totongi ‘o tu‘o hongofulu; ka na‘e ‘ikai tuku ‘e he ‘Otua ke lava ha‘ane kovi kiate au. 8Kapau na‘a ne pehē, ‘A‘au ‘a e tukumisi ko ho‘o totongi; pea fanau tukumisi ‘a e fanga manu kotoa pē: pea kapau na‘a ne pehē, ‘A‘au ‘a e lavatea ko ho‘o totongi; pea na‘e fanau lavatea ‘a e fanga manu kotoa pē. 9Ko ia kuo to‘o ‘e he ‘Otua ‘a e fanga manu ‘a ho‘omo ‘eiki, pea kuo ne foaki kia au.
10Pea ko eni ‘i he taimi na‘e lala ai ‘a e fanga manu, na‘a ku hanga hake ‘i ha‘aku misi, ‘o u vakai, tā ko e ngaahi kosi tangata ‘oku tau‘i ‘a e fanga manu ‘oku nau lavatea mo tukumisi mo pulepule. 11Pea folofola kiate au ‘a ‘Āngelo ‘a e ‘Otua ‘i he‘eku misi, ‘o pehē, ‘E Sēkope. Pea u pehē, Ko au eni. 12Pea folofola ‘e ia, Hanga hake mu‘a ‘o vakai, ko e ngaahi manu ‘oku tau‘i ‘a e fanga kosi ‘oku nau lavatea kotoa pē, pe tukumisi, pe pulepule: he kuo u sio ki he ngaahi me‘a ‘oku fai ‘e Lēpani kiate koe. 13Ko au ‘a e ‘Otua Pēteli, ‘a ia na‘a ke pani ai ‘a e pou, pea na‘a ke fai ai ‘a e tukumo‘ui kiate au: pea ke ke tu‘u, ‘o ‘alu atu mei he fonua ni, ‘o foki ki he fonua ‘o ho tupu‘anga.#Sēn 28.18-22
14Pea tali ‘e Lesieli mo Lia, ‘o na pehē kiate ia, He ‘oku ai homa kei ‘inasi pe tofi‘a ‘i he fale ‘o ‘ema tamai? 15‘Ikai ‘oku ma tatau kiate ia mo ha ongo muli? he kuo ne fakatau kimaua, pea ‘oku ne kaikai ai pē ‘ema pa‘anga. 16Pea ko ia, ‘ilonga ha koloa kuo to‘o ‘e he ‘Otua mei he‘ema tamai, ‘oku ‘amaua ia, mo ‘ema fānau: pea ko eni ko e me‘a kotoa pē kuo folofola ai ‘a e ‘Otua kiate koe ke ke fai.
17Pea tu‘u ‘a Sēkope, ‘o ne fakaheka ‘ene fānau mo hono ngaahi uaifi ki he fanga kāmeli: 18pea ne taki atu ‘ene fanga manu kotoa pē, ‘io, ‘a e koloa kotoa pē kuo ne ma‘u, ‘ene fanga manu ngāue‘i, ‘a ia kuo ne ma‘u ‘i Mesopotēmia, ko ‘ene ‘alu ki he‘ene tamai ko ‘Aisake ki he fonua ko Kēnani. 19Ka kuo ‘alu ‘a Lēpani ke kosi ‘ene fanga sipi: pea kaiha‘asi ‘e Lesieli ‘a e ngaahi telāfimi na‘e ‘a ‘ene tamai. 20Pea na‘e fakamatavalea‘i ‘e Sēkope ‘a e motu‘a Mesopotēmia ko Lēpani, ‘o ‘ikai te ne tala ki ai ‘e ‘alu pē ia. 21Pea na‘a ne hola mo ‘ene me‘a kotoa, pea ne hanga ‘o a‘a ‘i he Vaitafe, pea ne tu‘utu‘uni ‘ene fononga ke ‘alu fakahangatonu ki he mo‘unga ko Kiliati.
Ko e Kumi ‘e Lēpani ‘a Sēkope
22Pea na‘e toki fakahā kia Lēpani ‘i hono ‘aho tolu kuo hola ‘a Sēkope. 23Pea ne ‘alu mo ia hono kāinga, ‘o ne tuli ki ai ‘o ‘aho fitu; pea ne toki ma‘u ia ‘i he mo‘unga ko Kiliati. 24Pea na‘e hā‘ele ‘a e ‘Otua kia Lēpani ko e tangata Sīlia ‘i he‘ene misi, po‘uli, pea ne folofola ki ai, Tokanga kiate koe na‘a papa‘ivale ha‘o lea kia Sēkope ‘i hē, pe ko ē. 25Pea a‘u atu ‘a Lēpani kia Sēkope. Pea kuo fokotu‘u ‘e Sēkope hono tēniti ‘i he mo‘unga; ko Lēpani foki na‘e fokotu‘u tēniti mo hono kāinga ‘i he mo‘unga ko Kiliati.
26Pea pehē ‘e Lēpani kia Sēkope, Ko e hā eni kuo ke fai? ‘a ho‘o fakamatavalea‘i au, mo taki atu hoku ongo ‘ōfefine, ‘o hangē ha pōpula ma‘u tau? 27Ko e hā kuo ke hola fakafufū mo fakakaiha‘asi meiate au; ‘o ‘ikai te ke tala mai, ke u tuku atu koe mo e mavava, mo ha hiva, mo ha tā nafa, mo ha tā ha‘ape; 28mo e ‘ikai te ke tuku ke u ‘uma ki hoku ngaahi foha mo hoku ngaahi ‘ōfefine? ‘Ā, kuo ke fai vale ho‘o fai pehē. 29‘Oku mafai noa pē ‘e hoku nima ni ke tautea koe; ka ko e ‘Otua ‘o ho‘omou tamai na‘a ne folofola mai kiate au ‘anepō, ‘o pehē, Tokanga kiate koe ke ‘oua te ke lea kia Sēkope ‘a ē, pe ko ē. 30Pea ko eni, neongo na‘e pau ho‘o ‘alu, koe‘uhi na‘a ke mātu‘aki manatu ki he fale ‘o ho‘o tamai, ka ko e hā kuo ke kaiha‘asi ai si‘oku ngaahi ‘otua?
31Pea tali ‘e Sēkope, ‘o ne pehē kia Lēpani, He na‘a ku manavahē; ‘o u pehē, Na‘a ‘iloange te ke fa‘ao ho ongo ‘ōfefine meiate au. 32‘Ilonga ia te ke ‘ilo ki ai ho ngaahi ‘otua ke ‘oua te ne mo‘ui: ke ke ‘eke ‘i he ‘ao ‘o hota kāinga ‘a e me‘a ‘a‘au ‘oku ‘iate au, pea ke to‘o atu. He na‘e ‘ikai ‘ilo ‘e Sēkope kuo kaiha‘asi ia ‘e Lesieli.
33Pea hū ‘a Lēpani ki he tēniti ‘o Sēkope, mo e tēniti ‘o Lia mo e tēniti ‘o e ongo kaunanga; ka na‘e ‘ikai te ne ‘ilo ki ai. Pea ne ‘alu mei he tēniti ‘o Lia, ‘o ne hū ki he tēniti ‘o Lesieli. 34Ka kuo hanga ‘e Lesieli ‘o ‘ai ‘a e ngaahi telāfimi ‘i he nofo‘a fale ‘o e kāmeli, ‘o ne hekeheka ai. Pea fotofota holo ‘e Lēpani ‘a e ngaahi me‘a ‘i he tēniti, ka ka ‘ikai ‘ilo. 35Pea lea ange ‘a e fefine ki he‘ene tamai, Ke ‘oua na‘a tuputāmaki ‘a hoku ‘eiki ‘i he ‘ikai te u lava ke tu‘u ki ‘olunga ‘i ho‘o me‘a mai; he ‘oku ‘iate au ‘a e anga fakafefine. Pea ne hakule, kae ‘ikai te ne ‘ilo ‘a e ngaahi telāfimi.
36Pea ‘ita ‘a Sēkope, ‘o ne ngaohi ‘a Lēpani; ‘io, na‘a ne tali ‘a Lēpani ‘o pehē, Ko e hā ha‘aku kākā? Ko e hā ha‘aku angahala kuo fai ke pehē fau ho‘o teletauta‘a ‘i hoku tuli? 37He ko eni kuo ke fota‘i ‘eku ngaahi me‘a kotoa, ko e hā fua ha me‘a mei ho fale kuo ke ‘ilo ai? Tuku hena ‘i he ‘ao ‘o hoku kāinga mo ho kāinga, ke nau fakamaau ‘iate kitaua. 38Ko e ta‘u eni ‘e uofulu mo ‘eku ‘iate koe; pea tala‘ehai kuo ‘uhi mate ho‘o fanga sipi, pe ko ho‘o fanga kosi, pea ko ho‘o fanga manu tangata na‘e ‘ikai te u kai. 39Ko ia na‘e hae ‘e ha manu na‘e ‘ikai te u ‘omi kiate koe; na‘a ku totongi pē ia ‘e au; ko au pē na‘a ke ‘eke ki ai, pe na‘e mole ‘aho pe mole po‘uli. 40Ko eni ‘eku nofo na‘e fai; ‘i he ‘aho na‘a ku mate ‘i he māfana pea ko e momoko ‘i he pō; ko ia na‘e mahu‘i ‘a e mohe mei hoku mata. 41Ko e uofulu ta‘u eni kuo u nofo ‘i ho fale; ko e ta‘u ‘e hongofulu mā fā na‘a ku ngāue kiate koe koe‘uhi ko ho ongo ‘ōfefine, pea ko e ta‘u ‘e ono ki ho‘o fanga manu: pea kuo ke fakakehe ‘eku totongi ‘o tu‘o hongofulu. 42Ka ne ta‘e‘oua ‘a e ‘iate au ‘a e ‘Otua ‘o ‘eku ‘eiki, ‘a e ‘Otua ‘o ‘Epalahame mo e Manavahē‘anga ‘o ‘Aisake, pehē kuo ke tukuange mola au ‘i he taimi ni. Na‘e ‘afio‘i ‘e he ‘Otua hoku ngaohikovi‘i mo e vevela ‘o hoku ‘aofinima ni, ko ia na‘a ne valoki ai koe ‘anepō.
Ko e Aleapau ‘a Sēkope mo Lēpani
43Pea tali ‘e Lēpani, ‘o ne pehē kia Sēkope, Ko e tu‘unga fafine ni ko hoku ngaahi ‘ōfefine, pea ko e tamaiki ni ko hoku ngaahi foha, pea ko e fanga manu ni ko ‘eku fanga manu, ‘io, ko e me‘a kotoa pē ‘oku ke sio ki ai ko ‘eku me‘a pea ko hoku ongo ‘ōfefine ni, ko e pehē koā ke u fai ha me‘a he ‘aho ni kiate kinaua, pe ki he fānau kuo na fanau‘i? 44‘Ē, ta fai mu‘a ha fuakava, ‘a au mo koe, mo fakamo‘oni ‘iate kitaua.
45Pea to‘o ‘e Sēkope ha maka, ‘o ne fokotu‘u ko e pou. 46Pea lea ‘a Sēkope ki hono kāinga, Mou tānaki maka; pea nau tufi maka, ‘o tanu ha ‘esi, pea na‘a nau kai ‘i he funga ‘esi. 47Pea na‘e fakahingoa ia ‘e Lēpani ko Seka‘a-sahatuha:#31.47 Seka‘a-sahatuha; Ko e ‘uhinga ‘o e hingoá ni ‘i he faka-‘Ālameá ko e “fokotu‘unga me‘a ke fakamanatu kiate kitautolu”. ka ka ui ia ‘e Sēkope ko Kāleti.#31.47 Kāleti; Ko e ‘uhinga ‘o e hingoá ni ‘i he faka-Hepeluú ko e “fokotu‘unga me‘a ke fakamanatu kiate kitautolu”. 48Pea na‘e pehē ‘e Lēpani, Ko e ‘esi ko eni ko e fakamo‘oni ‘iate kitaua he ‘aho ni. Ko hono ‘uhinga ia ‘o e fakahingoa ia ko Kāleti (ko ‘Esi Fakamo‘oni). 49Na‘e ui ko Misipā foki (ko Potu-le‘o),#31.49 Misipā; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e feitu‘u ke fai mei ai ha le‘o. he‘ene pehē, Ke le‘o ‘e Sihova hota vaha‘a, ‘oka ta ka fepulingaki. 50‘Ilo ‘e koe ‘o kapau ‘oku ke ngaohikovi‘i hoku ongo ‘ōfefine, pea kapau te ke ‘omi ha kau fefine ke tata‘o ‘aki hoku ongo ‘ōfefine: neongo ‘oku ‘ikai ha tangata ‘iate kitaua, vakai ko e ‘Otua ‘oku ne fakamo‘oni ki he‘eta me‘a. 51Pea lea ‘a Lēpani kia Sēkope, Sio atu, ko e ‘esi ‘ena mo e pou ‘a ia kuo u fokotu‘u ‘i hota vaha‘a–ke fakamo‘oni ‘a e ‘esi ni. 52Pea ke fakamo‘oni ‘a e pou ni ‘o kapau te u maumau ‘eku fuakava: ‘e ‘ikai te u laka atu ‘i he ‘esi ni kiate koe ke fai ha kovi, pea ko koe ‘e ‘ikai te ke laka mai ‘i he ‘esi ni mo e pou ni kiate au. 53Ko e ‘Otua ‘o ‘Epalahame mo e ‘Otua ‘o Nēhoa#31.53 ‘Epalahame… Nēhoa; Ko ‘Epalahamé ko e kui ia ‘a Sēkope, pea ko Nēhoá ko e kui ia ‘a Lēpani. ke ne fakamaau ‘eta me‘a, ‘io, ‘a e ‘Otua ‘o ‘ena tamai. Ka ka fuakava ‘e Sēkope ‘i he Manavahē‘anga ‘o ‘ene tamai ko ‘Aisake. 54Pea fai feilaulau ‘a Sēkope ‘i he mo‘unga, pea ne tala ki hono kāinga ke nau ha‘u ‘o kai; pea na‘a nau kai, ‘o nau mohe ‘i he mo‘unga ‘i he pō ko ia. 55Pea tu‘u hengihengi hake ‘a Lēpani, ‘o ne ‘uma ki hono ngaahi foha mo hono ngaahi ‘ōfefine, ‘o ne tāpuaki‘i kinautolu: pea ‘alu ‘a Lēpani, ‘o foki ki hono feitu‘u.
Currently Selected:
KO SĒNESI 31: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.