KO SĒNESI 30
30
1PEA ‘i he vakai ‘e Lesieli ‘oku ‘ikai te ne fanau kia Sēkope, na‘a ne meheka ki hono ta‘okete, pea ne pehē kia Sēkope, Fei mo ‘omi ha‘aku fānau; he ka ‘ikai, te u mate.
2Pea ‘ita ‘a Sēkope kia Lesieli; pea ne pehē, He kuo u fetongi ‘a e ‘Otua, ‘a ia kuo ne ta‘ofi meiate koe ‘a e fua ‘o e manava?
3Pea pehē ‘e Lesieli, Ko ‘ena ‘eku kaunanga ko Pīla‘a, ke ke ‘alu kiate ia; ke ne fanau ki hoku funga, ka u ma‘u fānau foki ‘e au ‘iate ia. 4Ko ia na‘a ne foaki kiate ia ‘a Pīla‘a ko ‘ene kaunanga mōno uaifi; pea na‘e ‘alu ‘a Sēkope ki ai. 5Pea feitama ‘a Pīla‘a, pea ne fā‘ele‘i kia Sēkope ha tama tangata. 6Pea pehē ‘e Lesieli, Kuo fakamāu‘i ‘eku me‘a ‘e he ‘Otua, pea kuo ne fanongo foki ki hoku le‘o, pea kuo ne foaki mai ha tama tangata: ‘ā e ā na‘a ne fakahingoa ia ko Tani (ko Fakamāu).#30.6 Tani; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e fakamaau ‘oku tonuhia. 7Pea toe feitama ‘a Pīla‘a ko e kaunanga ‘a Lesieli, ‘o ne fā‘ele‘i kia Sēkope ha tama tangata ko hono ua. 8Pea pehē ‘e Lesieli, Ko e ngaahi fefa‘uhi lalahi kuo u fefa‘uhi ai mo hoku ta‘okete, pea kuo u lava foki: ko ia na‘a ne fakahingoa ia ko Nafitalai (ko ‘Eku Fefa‘uhi).#30.8 Nafitalai; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e fefa‘uhi, fuhu.
9Pea ‘i he vakai ‘e Lia kuo motu ‘ene fanau, na‘a ne ‘ave ‘e ia ‘ene kaunanga ko Sīlipa, ‘o ne foaki ia kia Sēkope mōno uaifi. 10Pea fanau kia Sēkope ‘e Sīlipa ko e kaunanga ‘a Lia, ko e tama tangata. 11Pea pehē ‘e Lia, Kuo u mālie; pea ne fakahingoa ko Kata (ko Ta‘imālie).#30.11 Kata; Ko e ‘uhinga ‘o e hingoá ni ‘i he faka-Hepeluú ko e “ta‘imālie, monū‘ia”. 12Pea fanau kia Sēkope ‘e Sīlipa ko e kaunanga ‘a Lia ha tama tangata ko hono ua. 13Pea pehē ‘e Lia, Kuo u monū‘ia; he kuo kamata lau au ‘e he kau fefine ko e monū‘ia; pea ne fakahingoa ia ka ‘Āseli (ko Monū‘ia).#30.13 ‘Āseli; Ko e ‘uhinga ‘o e hingoá ni ‘i he faka-Hepeluú ko e “fiefia”.
14Pea ‘alu ‘a Lūpeni ‘i he taimi ututa‘u uite, pea ne ‘ilo ‘i he vao ‘a e ‘akau fakafanau,#30.14 ‘akau fakafanau; Na‘e tui ‘a e kakai ‘o ono‘ahó ko e ‘akau eni ‘e lava ke toe fanau ai ha fefine pa‘a, pea toe na‘e ngāue‘aki pē ko e sausau ke manako ha taha ‘ia kita. pea ne ‘omi ki he‘ene fa‘ē ko Lia. Pea pehē ‘e Lesieli kia Lia, ‘Omi mu‘a ma‘aku ha me‘a mei he ngaahi ‘akau fakafanau na ‘a ho‘o tama.
15Pea ne tali, Ko e me‘a si‘i koā ho‘o ‘ave hoku husepāniti, pea te ke ‘ave foki ‘a e ngaahi ‘akau fakafānau ‘a ‘eku tama? Pea pehē ange ‘e Lesieli, Ka me‘a, pea ne mohe mo koe ‘apō ko e totongi ‘o e ngaahi ‘akau fakafānau ‘a ho‘o tama.
16Pea ‘i he ha‘u ‘a Sēkope mei ‘uta ‘i he efiafi, na‘e ‘alu atu ‘a Lia ke fakafetaulaki kiate ia, ‘o ne pehē ange, Te ke ha‘u kiate au; he kuo u mātu‘aki unga koe ‘aki ‘a e ngaahi ‘akau fakafānau ‘a ‘eku tama. Pea ne mohe mo ia ‘i he pō ko ia.
17Pea na‘e ongo‘i ‘e he ‘Otua ‘a Lia, pea ne feitama, ‘o ne fā‘ele‘i kia Sēkope ha tama tangata ko hono toko nima. 18Pea pehē ‘e Lia, kuo ‘omi ‘e he ‘Otua ‘eku totongi, koe‘uhi na‘a ku ‘atu ‘eku kaunanga ki hoku husepāniti: pea ne fakahingoa ka ‘Īsaka (ko ‘Oku-ai-ha-Totongi).#30.18 ‘Īsaka; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e kuo unga ha tangata mo e ‘oku ‘i ai ha totongi. 19Pea toe feitama ‘a Lia, ‘o ne fā‘ele‘i kia Sēkope ha tama tangata ko hono toko ono. 20Pea pehē ‘e Lia, Kuo fakakoloa ‘aki au ‘e he ‘Otua ha koloa lelei; kuo pau eni ke nofo mai hoku husepāniti kiate au; he kuo u fā‘ele‘i kiate ia ha fānau tangata ‘e toko ono: ko ia na‘a ne fakahingoa ia ka Sepulone (ko Nonofo).#30.20 Sepulone; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e tali mo e me‘a‘ofa. 21Pea hili ia na‘a ne fā‘ele‘i ha ta‘ahine, pea ne fakahingoa ia ko Taina.
22Pea manatu ‘e he ‘Otua kia Lesieli, pea ongo‘i ia ‘e he ‘Otua, ‘o ne fakafanau ia. 23Pea ne feitama, ‘o ne fā‘ele‘i ha tama tangata; pea ne pehē, Kuo hiki ‘e he ‘Otua hoku mā‘anga: 24pea ne fakahingoa ia ko Siosifa (ko Fakalahi);#30.24 Siosifa; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e ke ne toe ‘oatu ha taha mo e kuó ne ‘ave. he‘ene pehē, Ke fakalahi mai kiate au ‘e Sihova ‘aki ha tama ‘e taha.
Ko e Aleapau ‘a Sēkope mo Lēpani
25Pea ‘i he hili ‘a e fā‘ele‘i ‘o Siosifa ‘e Lesieli, na‘e lea ‘a Sēkope kia Lēpani ‘o pehē, Tuku mai au ke u ‘alu ki hoku ‘api, mo hoku fonua. 26Tuku mai hoku ngaahi uaifi mo ‘eku fānau, ‘a ia kuo u ngāue ai kiate koe, ka u ‘alu: he ‘oku ke ‘ilo ‘e koe ‘a e ngāue kuo u fai kiate koe.
27Pea tali ‘e Lēpani ki ai, Ka ‘oku ke ‘ofa kiate au, ‘oua: kuo u ‘ilo ‘i he tongafisi tā kuo tāpuaki au ‘e Sihova koe‘uhi ko koe. 28Pea ne pehē, Tu‘utu‘uni mai hao totongi, pea te u ‘atu.
29Pea ne pehē ange, ‘Oku ke ‘ilo pē ‘a e anga ‘o ‘eku ngāue kiate koe, pea mo e anga ‘o e ‘iate au ho‘o fanga manu. 30Hono ‘uke ‘a e me‘a na‘a ke ma‘u ‘i he te‘eki te u ha‘u? pea kuo tupu ko e fu‘u me‘a; pea kuo ō mo au ho tāpuekina ‘e Sihova;#30.30 kuo ō mo au; pe koe‘uhi ko au [kuo fai ho… ] pea ko eni, te u ngāue fakakū ‘e au foki ma‘a hoku fāmili?
31Pea ne pehē, Ko e hā te u ‘atu? Pea tali ‘e Sēkope, ‘E ‘ikai te ke ‘omi ha me‘a kiate au: ka ‘o kapau te ke fai mai ‘a e me‘a ko eni, te u toe fafanga mo tauhi ho‘o fanga manu.
32Te u ‘asi atu ‘i ho‘o fanga manu kotoa pē he ‘aho ni, pea te u vahe‘i mei ai ‘a e manu kotoa pē ‘oku tukumisi pe pulepule,#30.32 ‘Oku pehē ‘i he hiki fuoloa ‘e taha: ‘a e ki‘i manu ‘uli‘uli kotoa pē; ka ko hono faka-Hepeluú: ‘a e ki‘i manu kotoa pē ‘oku tukumisi pe pulepule, mo e ki‘i manu ‘uli‘uli kotoa pē. mo e manu kotoa pē ‘oku kelo ‘i he fanga sipi, mo e pulepule mo e tukumisi ‘i he fanga kosi: pea ko e fa‘ahinga ko ia ko ‘eku totongi ‘amui. 33Ko ia ‘e fakamo‘oni ma‘aku ‘e he‘eku faitotonu ‘amui, ‘oka ke ka ha‘u ki he‘eku totongi hono vakai‘i: ‘ilonga ha manu ‘i he‘eku fanga kosi ‘a‘aku ‘oku ‘ikai ke tukumisi pe pulepule, pea ‘ilonga ha manu ‘i he‘eku fanga sipi ‘oku ‘ikai ko kelo, ‘e lau ia ko ‘eku kaiha‘a.
34Pea pehē ‘e Lēpani, Taumaiā ke fai ‘o hangē ko ia kuo ke lea ki ai. 35Pea ne hanga ‘i he ‘aho ko ia, ‘o ne vahe‘i ‘a e fanga kosi tangata na‘e lavatea mo pulepule pea mo e fanga kosi fefine na‘e tukumisi pe pulepule ‘io, ‘a e manu kotoa pē na‘e ai hā fo‘i me‘a ‘oku hinehina, pea mo ia ‘i he fanga sipi na‘e ‘uli‘uli, pea ne tuku ia ke tauhi ‘e he‘ene fānau. 36Pea ne tu‘utu‘uni ‘a e mama‘o ‘o Sēkope mo ia, ke fe‘unga mo e fononga ‘i he ‘aho ‘e tolu: pea na‘e tauhi ‘e Sēkope ‘a hono toe ‘o e fanga manu ‘a Lēpani.
37Pea tā ‘e Sēkope ‘a e ngaahi va‘a ‘o e ‘akau ko e popilā mata mo e ‘ai, mo e paleini; pea na‘a ne fohi fakanikoniko‘i ke pule hinehina, he‘ene ‘ai ke hā ‘a e kakano hina ‘o e ngaahi va‘a. 38Pea ne tuku ‘a e ngaahi va‘a kuo ne fohi ki he ngaahi kumete na‘e tu‘u ‘i he ngaahi fakainu‘anga, ‘oka ha‘u ‘a e fanga sipi ke inu, ke fehangahangai mo e fanga sipi; hei‘ilo te nau tou‘ia ‘i he‘enau ha‘u ke inu. 39Pea na‘e tou‘ia ‘a e fanga sipi ‘i he‘enau ‘i he ngaahi va‘a, pea nau fā‘ele‘i ha fanga manu na‘e lavatea mo tukumisi mo pulepule.
40Pea vahe‘i ‘e Sēkope ‘a e fanga lami, pea ne ‘ai ‘a e fanga manu ke hanga ki he lavatea mo e fa‘ahinga kelo kehekehe: ko e fai ia ki he fanga manu ‘a Lēpani, ka ko e fanga manu ‘a‘ana na‘e tuku fakaekinautolu, pea na‘e ‘ikai te ne tuku ke nau ofi ki he fanga manu ‘a Lēpani.
41Pea ko eni, ka tau‘i ‘a e fanga manu mālohi, na‘e ‘ai ‘e Sēkope ‘a e ngaahi va‘a ‘i he ‘ao ‘o e fanga manu ‘i he ngaahi kumete, ke nau tou‘ia ‘i he‘enau ‘i he ngaahi va‘a. 42Ka ‘oka vaivai ‘a e fanga manu na‘e ‘ikai te ne ‘ai: ko ia na‘e faifai pea tō kia Lēpani ‘a e ha‘a vaivai, kae ‘ia Sēkope ‘a e mālohi. 43Ko ia na‘e ‘oho hake ‘a e tangata ko e me‘a fakamanavahē, pea na‘e tokolahi ‘ene fanga manu, mo ‘ene kau kaunanga, mo ‘ene kau tamaio‘eiki, mo ene fanga kāmeli, mo ‘ene fanga ‘asi.
Currently Selected:
KO SĒNESI 30: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.