KO SĒNESI 26
26
Ko e Nofo ‘a ‘Aisake ‘i Kela
1PEA na‘e faifai pea honge ‘a e fonua (taha kehe ‘a e ‘uluaki honge ‘a ia na‘e hoko ‘i he kuonga ‘o ‘Epalahame), pea ‘alu ‘a ‘Aisake ki Kela, kia ‘Apimeleki ko e Tu‘i Ha‘a Filisitia. 2Pea hā kiate ia ‘a Sihova, ‘o ne folofola mai, ‘Oua te ke ‘alu hifo ki ‘Isipite; ‘ilonga pe ha fonua te u fakahā atu, pea ke nofo ai. 3Ke ke nofonofo hifo ‘i he fonua ni, pea te u kau mo koe, pea te u tāpuaki‘i koe: he ko koe mo ho hako te u foaki ki ai ‘a e ngaahi fonua kotoa ko eni; pea te u fakaai ‘a e fuakava ‘a ia na‘a ma fefuakava‘aki mo ‘Epalahame ko ho‘o tamai:#Sēn 22.16-18 4pea te u fakatokolahi ho hako ke tatau mo e ngaahi fetu‘u ‘o e langi; pea te u ‘atu ki ho hako ‘a e ngaahi fonua kotoa ko eni; pea ko ho hako ‘e monū‘ia mei ai ‘a e ngaahi pule‘anga ‘o māmani: 5Koe‘uhi ā na‘e tuitala ‘a ‘Epalahame ki he‘eku lea, mo ne tauhi ‘eku ngaahi fekau, ‘a ‘eku ngaahi tu‘utu‘uni, mo ‘eku ngaahi fono, pea mo ‘eku ngaahi lao.
6Ko ia na‘e nofo ‘a ‘Aisake ‘i Kela: 7pea ko e kau tangata ‘o e feitu‘u na‘a nau fehu‘i kiate ia ‘i hono uaifi; pea ne pehē, Ko hoku tuofefine ia: he na‘a ne manavahē ke tala, Ko hoku uaifi, he‘ene pehē, Na‘a tāmate‘i kita ‘e he kakai ‘o e potu koe‘uhi ko Lepeka, he ko e fefine hōihoifua.#Sēn 12.13; 20.2 8Pea kuo fuoloa ‘ene ‘i he potu ko ia, pea ‘iloange, ko ‘Apimeleki ko e Tu‘i Ha‘a Filisitia, ‘i he‘ene sio kitu‘a ‘i he tupa, na‘a ne vakai tā ‘oku fakavā ‘a ‘Aisake mo hono uaifi ko Lepeka. 9Pea ui ange ‘a ‘Apimeleki kia ‘Aisake, ‘o ne pehē, ‘Ā, tā ko ho uaifi pē ia: pea fēfē ai ho‘o pehē mai ko ho tuofefine ia? Pea tali ‘e ‘Aisake, Ko ‘eku pehē, na‘a faifai pea u mate koe‘uhi ko ia.
10Pea me‘a ‘e ‘Apimeleki, Ko e hā kuo ke fai pehē ai kiate kimautolu? he ka ne si‘i-kae-‘amo kae mohe ha taha ‘o e kakai mo ho uaifi, pehē kuo ke fakaangahala‘i kimautolu. 11Pea fonosi ‘e ‘Apimeleki ‘a e kakai kotoa, ‘o pehē, Ka ai ha taha te ne ala ki he tangata ni pe ko hono uaifi, te ne mātu‘aki mate.
12Pea tōta‘u ‘a ‘Aisake ‘i he fonua ko ia, pea ne utu ‘i he ta‘u ko ia ‘o taki tu‘o teau; he na‘e tāpuaki‘i ia ‘e Sihova. 13Pea na‘e mā‘olunga ‘a e tangata, pea ne faka‘a‘au ai pē ki mu‘a, ‘o faifai ‘o ne mā‘olunga ‘aupito: 14he na‘a ne mohu sipi, pea mohu pulu, pea tokolahi ‘ene kau tamaio‘eiki: pea na‘e meheka ‘a e kau Filisitia kiate ia. 15Pea ko e ngaahi vai kotoa pē ne keli ‘e he kau tamaio‘eiki ‘o ‘ene tamai ‘i he kuonga ‘o ‘ene tamai ko ‘Epalahame, ne pupunu ‘e he kau Filisitia, ‘o tanu kelekele.
16Pea me‘a ‘a ‘Apimeleki kia ‘Aisake, Ke ke hiki meiate kimautolu; he ‘oku ke mālohi fau ‘iate kimautolu. 17Pea toki hiki mei ai ‘a ‘Aisake, ‘o ne fokotu‘u tēniti ‘i he tele‘a ‘o Kela, ‘o ne nofo ‘i he potu ko ia. 18Pea hanga ‘a ‘Aisake ‘o toe keli ‘a e ngaahi vaikeli ‘a ia na‘e keli ‘i he kuonga ‘o ‘ene tamai ko ‘Epalahame; koe‘uhi kuo pupunu ‘e he kau Filisitia hili ‘a e pekia ‘a ‘Epalahame: pea ne ‘ai ki ai ‘a e ngaahi hingoa na‘e ‘ai ‘e he‘ene tamai.
19Pea na‘e keli holo ‘i he tele‘a ‘e he kau tamaio‘eiki ‘a ‘Aisake, pea nau ‘ilo ai ha matavai mo‘ui. 20Pea na‘e fakakikihi ai ‘a e kau tauhi manu ‘o Kela mo e kau tauhi manu ‘a ‘Aisake, ‘o nau pehē, Ko homau vai: ko ia na‘a ne fakahingoa ‘a e vai ko ‘Ēseki [ko Fakamālohi], koe‘uhi na‘a nau fai fakamālohi kiate ia.
21Pea nau keli ha vai ‘e taha; pea nau ke foki ‘i he vai ko ia: ko ia na‘a ne fakahingoa ia ko Sītina [ka Fakafili]. 22Pea ne hiki mei he potu ko ia, ‘o ne keli ha vai ‘e taha; pea na‘e ‘ikai te nau kē ai, Ko ia na‘a ne fakahingoa ko Leopote [ko Fu‘u-‘atā], he‘ene pehē, Kuo faka‘ata‘atā ‘eni mo‘otautolu ‘e Sihova, pea te tau tupu ‘i he fonua.
23Pea ne ‘alu hake mei ai ki Peasipa. 24Pea na‘e hā kiate ia ‘a Sihova ‘i he pō ko ia, ‘o ne folofola mai, Ko au ko e ‘Otua ‘o ho‘o tamai ko ‘Epalahame: ‘oua te ke manavahē, he ‘oku ou ‘iate koe, pea te u tāpuaki‘i koe, pea te u fakatokolahi ho hako koe‘uhi ā ko ‘Epalahame na‘e tamaio‘eiki kiate au. 25Pea ne fokotu‘u ‘i he potu ko ia ha ‘ōlita, pea ne fai ai ‘ene lotu ‘i he huafa ‘o Sihova; pea ne folahi hono tēniti ‘i he potu ko ia, pea hanga ‘e he kau tamaio‘eiki ‘a ‘Aisake, ‘o keli ai ha vai.
Ko e Aleapau ‘a ‘Aisake mo ‘Apimeleki
26Toki ha‘u kiate ia ‘a ‘Apimeleki mei Kela, pea omi mo ia hono takanga ko ‘Ahusati, mo Fīkoli ko e ‘eiki ‘o ‘ene tau.#Sēn 21.22 27Pea lea ‘a ‘Aisake kiate kinautolu, Ko e hā kuo mou omi ai kiate au; ‘osi, ‘oku mou fehi‘a kiate au, pea kuo mou toutou teke‘i au?
28Pea nau tali, Ko ‘ene mātu‘aki e‘a kiate kimautolu ‘oku kau ‘a Sihova mo koe; ko ia na‘a mau pehē, Ke ai mu‘a ha‘atau fuakava ‘a kimautolu mo koe: ko ia tau fuakava mo koe, ‘o pehē, 29Ke ‘ilo ‘e koe ‘o kapau te ke fai ha kovi kiate kimautolu; ka ke fai pē ‘o hangē ko ‘emau fai atu, ‘a ē na‘e ‘ikai te mau ala kiate koe, kae fakapalataha ki he lelei, pea mau tuku melino atu pē koe: he ko koe pē ‘a e Pele ‘a Sihova ‘i he taimi ni. 30Pea fai ‘e ia ha‘anau kātoanga, pea nau kai mo inu. 31Pea nau ‘ā hengihengi ‘o fefuakava‘aki; pea toki tukuange kinautolu ‘e ‘Aisake, pea nau māvae lelei mo ia.
32Pea ‘iloange ‘i he ‘aho pē ko ia, na‘e omi ‘a e kau tamaio‘eiki ‘a ‘Aisake, ‘o nau fakaongo mai ‘enau keli vai; pea nau pehē mai, Kuo mau a‘u ki he vai. 33Ko ia na‘a ne fakahingoa ia ko Sipa [ko Fuakava]: ‘ā ē ā kuo hingoa ai ‘a e kolo ‘o a‘u mai ki onopooni ko Peasipa [ko Vai-fuakava].#26.33 Vakai ai pē ki he 21.31.
Ko e ngaahi Mali Muli ‘o ‘Īsoa
34Pea ‘i he faifai pea a‘u ‘a ‘Īsoa ki hono fāngofulu ta‘u, pea ne hanga ‘o mali mo Siutiti, ko e ‘ōfefine ‘o Pē‘eli ko e tangata Heti, pea mo Pasimati, ko e ‘ōfefine ‘o ‘Eiloni ko e tangata Heti; 35pea ko e ongo me‘a ko ia ne hūkia ai ‘a e loto ‘o ‘Aisake mo Lepeka.
Currently Selected:
KO SĒNESI 26: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.