KO SĒNESI 25
25
Ko e Hako Kehe ‘o ‘Epalahame
(1 Kal 1.32-33)
1PEA na‘e ma‘u ‘e ‘Epalahame mo ha uaifi, pea ko hono hingoa ko Kētula. 2Pea ne fā‘ele‘i kiate ia ‘a Similani, mo Siokasane, mo Mētani, mo Mitiani, mo ‘Isipaka, mo Sua‘a, 3pea ko Siokasane ko e tupu‘anga ‘o Sipa, mo Tētani. Pea ko e hako ‘o Tētani ‘a e kau ‘Āsuli mo e Lētusi mo e Leumi. 4Pea ko e hako ‘o Mitiani; ko ‘Efa, mo ‘Ēfeli, mo ‘Īnoke, mo ‘Apita‘a, mo ‘Elita‘a. Ko kinautolu ni kotoa pē ko e hako ‘o Kētula.
5Pea ko ‘Aisake na‘e tuku ki ai ‘e ‘Epalahame ‘ene koloa kotoa; 6ka ki he fānau ‘o ‘ene kau sinifu na‘e ‘atu ‘e ‘Epalahame ha ngaahi me‘a‘ofa; pea ne tuku atu kinautolu ‘i he‘ene kei mo‘ui ke ‘alu ki hahake, ke nau nofo mama‘o mo hono foha ko ‘Aisake ‘i he feitu‘u hahake.
Ko e Mālōlō mo e Tanu ‘o ‘Epalahame
7Pea ko e fuoloa eni ‘o e mo‘ui ‘a ‘Epalahame ko e ta‘u ‘e teau mo e ta‘u ‘e fitungofulu mā nima. 8Pea toki hokotaki ‘a ‘Epalahame ‘o ne pekia, kuo toulekeleka ‘aupito, ko e ‘eiki kuo fuoloa, pea a‘ua‘u; pea na‘e ului ia ki hono kakai. 9Pea na‘e telio ia ‘e hono ongo foha ko ‘Aisake mo ‘Isime‘eli ‘i he ‘ana ko Makipila, ‘i he ‘api ‘o ‘Efiloni ko e foha ‘o Soha‘a, ko e matāpule Heti; ‘a ia na‘e tu‘u ki he potu ‘o Mamilī ki hahake: 10‘io, ko e ‘api na‘e fakatau e ‘Epalahame mei he ha‘a Heti: ko e potu ia na‘e fai ai ‘a ‘Epalahame mo hono uaifi ko Sela.#Sēn 23.3-16 11Pea hili ‘a e pekia ‘a ‘Epalahame na‘e fakamonū‘ia ‘e he ‘Otua ‘a hono foha ko ‘Aisake: pea na‘e nofo ‘a ‘Aisake ‘i Pea-lehai-lo‘ai.
Ko e Hako ‘o ‘Isime‘eli
(1 Kal 1.28-31)
12Ko e tohi eni ‘o e hako ‘o ‘Isime‘eli, ko e foha ‘o ‘Epalahame, ‘a ia na‘e fanau‘i kia ‘Epalahame ‘e Heka‘ā, ko e fefine ‘Isipite ko e kaunanga ‘a Sela. 13Pea ko eni ‘a e ngaahi hingoa ‘o e hako ‘o ‘Isime‘eli, ‘a honau hingoa mo ‘enau tupu. Ko e ‘uluaki foha ‘o ‘Isime‘eli ko Nepaiote, pea hoko mo Keta, mo ‘Atape‘eli, mo Mipisami; 14kae‘uma‘ā ‘a Mīsima, mo Tuma, mo Masa; 15ko Hētati, mo Teimu, mo ‘Ietuli, mo Nāfisi, pea mo Kētema. 16Ko kinautolu ni ‘a e hako ‘o ‘Isime‘eli, pea ko honau ngaahi hingoa eni ‘onautolu na‘e ma‘u kolo mo e nofo‘anga; ko e toko hongofulu mā ua, ko e ngaahi ‘ulumotu‘a ‘o e ngaahi fa‘ahinga. 17Pea ko e ngaahi ta‘u eni ‘o e mo‘ui ‘a ‘Isime‘eli; ko e ta‘u ‘e teau mo e ta‘u ‘e tolungofulu mā fitu: pea ne hokotaki ‘o pekia; pea na‘e ului ki hono kakai. 18Pea ko honau nofo‘anga na‘e fai mei Havila ki Sua, ‘a ia ‘oku tu‘u ki he hahake ‘o ‘Isipite, ‘i he hala ki ‘Āsilia: na‘a ne ta‘utu ki hahake ‘i hono kāinga kotoa pē.#25.18 ki… kotoa pē; pe ‘i he ‘ao ‘o hono kāingá kotoa pē.
Ko e Fā‘ele‘i ‘o ‘Īsoa mo Sēkopé
19Ko e tohi eni ‘o e hako ‘o ‘Aisake ko e foha ‘o ‘Epalahame. Na‘e ma‘u ‘e ‘Epalahame ha foha ko ‘Aisake: 20pea ‘i he fe‘unga ‘a ‘Aisake mo e ta‘u ‘e fāngofulu na‘a ne ma‘u mōno uaifi ‘a Lepeka, ko e ‘ōfefine ‘o Petueli ko e motu‘a Sīlia mei Mesopotēmia, ko e tuofefine ‘o Lēpani ko e Sīlia. 21Pea na‘e hūfia ‘e ‘Aisake hono uaifi kia Sihova, he na‘e pa‘a ia: pea na‘e ongo ‘ene hū kia Sihova, pea feitama hono uaifi ko Lepeka. 22Pea feteketeke‘i ‘a e fānau ‘i hono manava; pea pehē ‘e he fefine, Kapau ko ia, ko e hā ‘oku ou pehē ai? pea ne ‘alu ‘o fehu‘i kia Sihova.
23Pea folofola ‘a Sihova kiate ia, Ha kakai ‘e ua ‘oku ‘i ho manava, ‘E mavahe mei ho fatu ha ongo fa‘ahinga, ‘o kaukaua ‘a e taha ‘i he taha; Ko ta‘okete te ne tauhi ‘a tehina.
24Pea faifai pea kakato hono ngaahi māhina ke fā‘ele, pea tā na‘e māhanga. 25Pea tō mai ‘a e ‘uluaki kuo kulokula, ‘o hangē ko e kofu fulufulu‘i manu hono kotoa; pea nau fakahingoa ia ko ‘Īsoa [ko Fulufulua].#25.25 ‘Īsoa; ‘Oku faka‘uhinga‘i e hingoá ni ki Seia, ko e fonua na‘e toki nofo‘i ‘e he hako ‘o ‘Īsoá; ‘Oku vāofi ‘a hono pu‘aki ‘o e Seiá mo e faka-Hepelū ‘o e fulufuluá. 26Pea hili ia na‘e tō mai hono tokoua ‘oku ne puke ‘a e muiva‘e ‘o ‘Īsoa; pea nau fakahingoa ia ko Sēkope [ko Hākiva‘e];#25.26 Sēkope; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e muiva‘e. pea na‘e fe‘unga ‘a ‘Aisake mo e ta‘u ‘e onongofulu ‘i he‘ene fā‘ele‘i kinaua.
Ko e Fakatatau atu ‘e ‘Īsoa ‘a e ngaahi Monū ‘o ‘ene Foha Lahí
27Pea hoko ‘o lalahi ‘a e ongo tamaiki: pea ko e faiva ‘o ‘Īsoa ko e tulimanu, ko e tama taka vao ia; ka ko Sēkope na‘e anga māopo, ko e tama taka fale. 28Pea pele ‘aki ‘e ‘Aisake ‘a ‘Īsoa, koe‘uhi ko ‘ene kai kiki mei he‘ene tulimanu: ka ko Sēkope ‘a e pele ‘a Lepeka.
29Tokua na‘e fai ‘e Sēkope ‘ene haka sepo, mo e a‘u mai ‘a ‘Īsoa mei he vao kuo ne ‘aungalua: 30pea pehē ‘e ‘Īsoa kia Sēkope, ‘Ē, ‘omi ha‘aku me‘i me‘a kula ke u folo, ‘a e kula na; he kuo u ‘aungalua: ko hono ‘uhinga ia na‘e hingoa ai ko ‘Ītomi [ko Kula]#25.30 ‘Ītomi; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e kulokulá.
31Pea pehē ‘e Sēkope, Pe‘i fakatau ni kiate au ‘a e hoko.
32Pea pehē ‘e ‘Īsoa, ‘Ā, ko ‘eku faka‘a‘au eni ki he mate; pea ko e hā hono ‘aonga ‘o e me‘a ko ia kiate au, ‘a e tu‘unga hoko?
33Pea pehē ‘e Sēkope, Pe‘i fuakava mai leva. Pea ne fuakava kiate ia: ‘o ne fakatau kia Sēkope hono tu‘unga hoko.#Hep 12.16
34Pea toki ‘ange ‘e Sēkope kia ‘Īsoa ha mā mo ha sepo piini, pea ne kai mo inu; pea toki tu‘u ia ‘o ‘alu. Ko e va‘inga‘aki ē ‘e ‘Īsoa ‘a e tu‘unga hoko.
Currently Selected:
KO SĒNESI 25: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.