Kalētiá 5
5
Ko e Tau‘atāina ‘ia Kalaisí
1KO E tau‘atāina koā na‘e fakatau‘atāina kitaua ki ai ‘e Kalaisi? Pe‘i mou tu‘u ma‘u ai, pea ‘oua te mou toe mo‘ua ‘i he ‘ioke fakapōpula.
2Vakai mai: ko Paula au ‘oku ou tala atu, kapau te mou fai‘aki ‘a e kamu, ‘e ‘ikai momo‘i ‘aonga ‘a Kalaisi kiate kimoutolu. 3‘Io, ‘oku ou toe fakapapau atu ki he tangata takitaha ‘oku tuku ‘eni ke nau fai hono kamu, ‘oku ne mo‘ua leva ke fai hono kotoa ‘o e Lao. 4Kuo motuhi leva kimoutolu meia Kalaisi, ‘a e fa‘ahinga na ‘oku nofo ke tonuhia mei he Lao: ‘io, kuo fakahee‘i kimoutolu meia Kelesi. 5He ko kimautolu, ko e me‘a ‘i he Laumālie, pea koe‘uhi ko ‘emau tui, ‘oku mau talitali ‘aki ‘a e ‘amanaki ki he fakatonuhia. 6He ‘i he tu‘u ‘ia Kalaisi Sīsū, ‘oku ‘ikai mamafa ha‘ate kamu pe ta‘ekamu, ka ko ha tui pē ‘oku ngāue fou ‘i he ofa.
7‘Ā, ne mālō ho‘omou lele. Ko hai tū ne ta‘ofi kimoutolu mei he talangofua ki he totonu? 8Ko homou fakaloto‘i ko ia, ‘oku ‘ikai fou meiate ia ‘oku fai homou fakaului. 9Ka lave ha me‘i lēvani ki ha takaonga mā, tā kuo lēvani hono kotoa.#1 Kol 5.6 10‘Oku ‘i ai ‘eku falala ‘a‘aku kiate kimoutolu ‘i he ‘Eiki, ‘e ‘ikai momo‘i fou kehe homou loto: ka ko ia ‘oku ne fakatupu maveuveu ‘iate kimoutolu te ne fua hono tautea, neongo pe ko hai ia.
11Ka ko e me‘a kiate au, kāinga; ka ne mo‘oni ‘oku ou kei malanga‘aki ‘a e kamu, pea ko e hā ai hoku fakatanga‘i ‘oku fai? he ka ne u fai pehē, pehē kuo ‘osi ‘a e fehi‘anekina ‘o e Kolosi. 12Ko hoku loto ki he kakai ‘oku fakaangatu‘u kimoutolu, Taumaiā ke nau fai atu ‘o tu‘usi ‘aupito!
13Seuke, na‘e ui kimoutolu, kāinga, ke mou tau‘atāina; kae‘oua pē ‘e iku ho‘omou tau‘atāina ko ha ava ki he kakano; ka ko e me‘a ‘i ho‘omou ‘ofa ke mou nofo fetamaio‘eiki‘aki. 14He ‘oku ‘osiki ‘a e Lao kotoa ‘i ha fo‘i lea; ‘a ‘eni, Te ke ‘ofa ki ho kaungā‘api ‘o hangē ko ho‘o ‘ofa kiate koe.#Lev 19.18 15Ka ‘o kapau te mou fe‘u‘usi mo fekainaki, vakai na‘a ‘iloange te mou fetāmate‘aki kimoutolu.
Ko e Laumālié mo e Loto ‘o e Tangata
16Pea ko ‘eku lea ‘eni, Mou fou ‘i he Laumālie, pea ‘e ‘ikai ai te mou momo‘i fakaai ‘a e holi ‘a Kakano. 17He ‘oku holitu‘u ‘a Kakano ‘o fakafepaki ki he Laumālie; pea pehē mo e Laumālie kia Kakano: he ‘oku na feta‘ofi‘aki ‘a e ongo me‘a ko ia, koe‘uhi ka ai ha me‘a ‘oku mou loto ke fai, pea ‘oua te mou fai ia.#Lom 7.15-23 18Ka ‘o kapau ‘oku tākiekina kimoutolu ‘e he Laumālie, tā ‘oku ‘ikai te mou mo‘ulaloa ki he Lao.
19Pea ko eni, ‘oku mātu‘aki e‘a ‘a e ngaahi ngāue ‘a Kakano, ‘o pehē, Ko e fe‘auaki, ko e anga‘uli, ko e pau‘u, 20ko e tauhi ‘aitoli, ko e fai tuki, ko e fetāufehi‘a‘aki, ko e fetu‘usi, ko e meheka, ko e fe‘ite‘itani, ko e fakafelaulauhi, ko e fakavahavaha‘a, ko e fakafa‘afa‘ahi, 21ko e femeheka‘aki, ko e fefakapōngaki, ko e fa‘a konā, ko e fa‘a kai, mo e ngaahi alā me‘a pehē: ‘a ia ‘oku ou sinaki tala atu, ‘o hangē ko ‘eku lea mu‘a, ko e kakai fai me‘a pehē, ‘e ‘ikai hanau tofi‘a ‘i he pule‘anga ‘o e ‘Otua.
22Ka ko e fua ‘o e Laumālie, ko e ‘ofa, ko e fiefia, ko e melino, ko e anga mokomoko, ko e anga‘ofa, ko e anga tonu, 23ko e anga falala, ko e anga kātaki, ko e anga fakama‘uma‘u: ‘oku ‘ikai ha lao ke ta‘ofi ‘a e ngaahi me‘a pehē 24Pea ko kinautolu ‘oku ‘o Kalaisi Sīsū, na‘a nau tutuki ki he Kolosi ‘a e kakano mo hono ngaahi o‘i mo e holi. 25Kapau ko e Laumālie ‘oku tau mo‘ui ai, tau laka foki ‘i he Laumālie. 26‘Oua na‘a tau hiki ki he fie ongoongo, ‘o fepolepolei mo femeheka‘aki.
Currently Selected:
Kalētiá 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
