KO ‘ĒSELA 6
6
Ko Hono Toe ‘Ilo ‘o e Tu‘utu‘uni ‘a Kōlesí
1TOKI tu‘utu‘uni ‘e Kingi Talaiasi, pea na‘e kumi ‘i he fale tohi, ‘a ia na‘e tuku tauhi ai ‘a e ngaahi me‘a mahu‘inga ‘i Pāpilone. 2Pea na‘e ‘ilo ‘i ‘Akameta, ‘i he talitau‘anga, ‘i he vahefonua ‘o Mītia, ha takainga tohi, ‘a ia na‘e tohi hiki ai, ‘o pehē,
3“‘I he ‘uluaki ta‘u ‘o Kingi Kōlesi na‘e fai ‘e Kingi Kōlesi ha tu‘utu‘uni:
“‘Ko e me‘a ki he fale ‘o e ‘Otua ‘i Selusalema, ke fai hono langa ‘o e fale ko ia, ‘a e potu ‘oku fai feilaulau ai, pea ke ‘ai ke kaukaua ‘a e fakatoka ‘o hono tu‘unga; ke kiupite ‘e onongofulu hono mā‘olunga, pea ke kiupite ‘e onongofulu hono māukupu; 4ke ‘otu ‘e tolu maka lalahi, pea ‘akau ‘a e ‘otu ‘e taha,#6.4 ‘Oku fihi ‘a e potu ni. ‘e ‘atu ‘a e totongi mei he fale ‘o e tu‘i.
5Kae‘uma‘ā ko e nāunau koula mo siliva ‘o e fale ‘o e ‘Otua, ‘a ia na‘e to‘o ‘e Nepukanesa mei he temipale ‘i Selusalema, ‘o ‘omi ki Pāpilone, ‘e fakafoki ia ‘o toe ‘ave ki he temipale ‘i Selusalema takitaha ki hono feitu‘u: ‘io, te ke fakahū ki he fale ‘o e ‘Otua.
Ko e Tu‘utu‘uni ‘a Talaiasi ke Hoko Atu ‘a e Ngāué
6“Pea ko eni, ‘e Tatenai, kōvana ‘o Tu‘a-vaitafe, mo Sētali-Posenai, mo ho‘omo fa‘ahi ko e kau ‘Afa‘asaka ‘oku nofo ‘i Tu‘a-vaitafe, mou tu‘u ke ‘atā.
7‘Oua ‘e ala ki he ngāue ‘o e fale ‘o e ‘Otua ko ē; tuku pē ‘a e kōvana ‘o e kau Siu mo e mātu‘a Siu ke fai ‘a e langa ‘o e fale ‘o e ‘Otua ko ē ‘i hono tu‘unga. 8“Kae‘uma‘ā ‘oku ou fai tu‘utu‘uni ‘e au ki he me‘a te mou fai ke tokoni ki he mātu‘a Siu ko ena ‘i he langa ‘o e fale ‘o e ‘Otua ko ē. ‘Io, ‘e mātu‘aki ‘atu mei he koloa ‘a e tu‘i, ‘io mei he tukuhau ‘o Tu‘a-vaitafe na, ha pa‘anga tokoni ki he tu‘unga tangata na, ke ‘oua na‘a ta‘ofi ‘enau ngāue. 9Pea ‘ilonga ha me‘a ‘oku nau masiva ai–‘a e fanga pulu mui, mo e sipi tangata, mo e fanga lami, ke feia ‘aki ‘a e feilaulau-mōifua ki he ‘Otua ‘o Langi, ‘a e uite, ‘a e māsima, ‘a e uaine mo e lolo, ha me‘a pē ‘e tala ‘e he kau taula‘eiki ‘i Selusalema–ke ‘ange pē ia kiate kinautolu ‘i he ‘aho kotoa pē ke ‘oua na‘a hala. 10Koe‘uhi ke nau ‘atu feilaulau namu kakala ma‘u pē ki he ‘Otua ‘o langi, mo hūfia ‘a e mo‘ui ‘a e tu‘i mo ‘ene fānau.
11“Kae‘uma‘ā kuo u fai tu‘utu‘uni ‘e au, Ka ai ha tangata te ne liliu ‘a e fekau ni, ke to‘o lango mei hono fale, pea hiki ia ‘o fakatūfana‘i;#6.11 fakatūfana‘i; pe kalusefai. ai pea ‘e ngaohi hono fale ko e tu‘unga ‘oto‘ota ko e tautea ‘o e me‘a ko ia.
12“Pea ko e ‘Otua, ‘a ia ‘oku ne tuku ke ‘afio hono huafa ‘i he potu ko ia, ‘ofa ke ne tulaki ‘a e tu‘i fuli pē mo e kakai te nau ala‘aki ke liliu, ke maumau ‘a e fale ko ‘ena ‘o e ‘Otua ‘oku ‘i Selusalema.
“Ko au Talaiasi kuo u tu‘utu‘uni: ke nima mo e va‘e ‘a e fai ki ai.”
Ko Hono Fakatāpui ‘o e Temipalé
13Pea ko Tatenai, ‘a e kōvana ‘o Tu‘a-vaitafe, mo Sētali-posenai, mo honau fa‘ahi, ‘i he ‘omi ‘a e fekau pehē ‘a Talaiasi, na‘a nau tōtōivi ‘i he fai ki ai.
14Ko ia ko e mātu‘a Siu na‘a nau fai ‘a e langa, ‘o nau tu‘umālie, ko e me‘a ‘i he lea fakapalofisai ‘a e palōfita ko Hākeai, mo Sākalaia ko e foha ‘o ‘Ito. Pea nau langa ia mo faka‘osi, ‘o taau mo e tu‘utu‘uni ‘a e ‘Otua ‘o ‘Isileli, mo e tu‘utu‘uni ‘a Kōlesi, mo Talaiasi, mo ‘Atasease Tu‘i Pēsia.#Hāk 1.1; Sāk 1.1
15Pea na‘e faka‘osi ‘a e fale ko ia ‘i hono ‘aho tolu ‘o e māhina ko ‘Ātali, ‘i hono ono ‘o e ta‘u ‘o e pule ‘a Kingi Talaiasi. 16Pea ko ha‘a ‘Isileli, mo e kau taula‘eiki, mo e kau Līvai, mo e ha‘a fakapōpula kātoa, na‘a nau fai fiefia ‘a e huufi ‘o e fale ko ia ‘o e ‘Otua.
17Pea na‘a nau ‘atu ‘i he huufi ‘o e fale ko ia ‘o e ‘Otua ha pulu ‘e teau, mo e sipi tangata ‘e uangeau, mo e lami ‘e fāngeau; pea ko e kosi tangata ‘e hongofulu mā ua ke lau tatau mo e ngaahi matakali ‘Isileli: ko e feilaulau-angahala ia ma‘a ‘Isileli kātoa. 18Pea nau fokotu‘u ‘a e kau taula‘eiki ‘i honau ngaahi lakanga, mo e kau Līvai ‘i honau ngaahi kalasi, ke fai ‘a e tauhi ‘o e ‘Otua ‘oku ‘i Selusalema; ‘o hangē ko ia ‘oku tu‘u ‘i he Tohi ‘a Mōsese.”
Ko e Pāsová
19Pea fai ‘e he kau fakapōpula ‘a e Pāsova ‘i he ‘aho hongofulu mā fā ‘o e ‘uluaki māhina.#‘Eki 12.1-20 20He ko e kau taula‘eiki mo e kau Līvai kuo nau fakama‘a kinautolu kotoa pē; kuo nau ma‘a kotoa pē: pea nau tāmate‘i ‘a e Pāsova ma‘a e kau fakapōpula kātoa, pea ma‘a honau kāinga taula‘eiki, pea ma‘anautolu. 21Pea ko e kau ‘Isileli kuo foki mei he pōpula, mo kinautolu kuo fakamavahe mei he fakalielia ‘o e kakai ‘o e fonua, pea kuo hiki kiate kinautolu ke feinga kia Sihova ko e ‘Otua ‘o ‘Isileli, na‘a nau hanga ‘o kai. 22Pea nau fai fiefia ‘a e Kātoanga Tapu Lēvani, ‘o ‘aho fitu; he kuo fakafiefia‘i kinautolu ‘e Sihova; he kuo ne fakafinangalo lelei kiate kinautolu ‘a e Tu‘i ‘Āsilia,#6.22 Tu‘i ‘Āsilia; Ko e lau nai eni ki he Tu‘i Pēsia ‘a ia na‘á ne pule‘i mo e he vahefonua na‘e ma‘u kimu‘a atu ‘e ‘Āsilia, ‘a e fili ‘o ‘Isileli mei fuoloa. ke poupou ki honau nima ‘i he ngāue ki he fale ‘o ‘Elohimi ko e ‘Otua ‘o ‘Isileli,
Currently Selected:
KO ‘ĒSELA 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
