KO ‘ISIKELI 48
48
Ko e Vahevahe ‘o e Fonuá ki he ngaahi Matakalí
1PEA ko e ngaahi hingoa ‘eni ‘o e ngaahi matakali: ko e kamata mei he taupotu ‘i he tokelau, ‘i he tafa‘aki hala ki Keteloni, ‘i ho‘o ‘alu ki Hēmati mo Hasalieinani ‘i he kau ā ‘o Tāmasikusi; ‘i he tokelau ‘oku lave ki Hēmati: ‘e ma‘u ‘e Tani ha vahe ‘e taha, pea ‘e kau kiate ia ‘a e tafa‘aki to‘omata‘u mo e tafa‘aki to‘ohema. 2Pea ‘e ma‘u ‘e ‘Āseli ha vahe ‘e taha; ‘o kau‘ā taha mo Tani, mei he tafa‘aki ki hahake ‘o a‘u ki he tafa‘aki ki lulunga.#48.2-7 mei he… lulunga: Ko hono faka-Hepeluú ia, ka ‘oku pehē ‘i he hiki fuoloa ‘e taha: mei he kau‘āfonua fakahahaké ‘o a‘u ki he Tahi Meteleniané ‘i he hihifó. 3Pea ‘e ma‘u ‘e Nafitalai ‘a e vahe ‘e taha; ‘o kau‘ā taha mo ‘Āseli, mei he tafa‘aki ki hahake ‘o a‘u ki he tafa‘aki ki lulunga. 4Pea ‘e ma‘u ‘e Manase ha vahe ‘e taha; ‘o kau‘ā taha mo Nafitalai mei he tafa‘aki ki hahake ‘o a‘u ki he tafa‘aki ki lulunga. 5Pea ‘e ma‘u ‘e ‘Ifalemi ha vahe ‘e taha; ‘o kau‘ā taha mo Manase, mei he tafa‘aki ki hahake ‘o a‘u ki he tafa‘aki ki lulunga. 6Pea ‘e ma‘u ‘e Lūpeni ha vahe ‘e taha; ‘o kau‘ā taha mo ‘Ifalemi, mei he tafa‘aki ki hahake ‘o a‘u ki he tafa‘aki ki lulunga. 7Pea ‘e ma‘u ‘e Siuta ‘a e vahe ‘e taha; ‘o kau‘ā taha mo Lūpeni, ‘i he tafa‘aki ki hahake ‘o a‘u ki he tafa‘aki ki lulunga.
Ko e Vahefonua Makehe ‘i Loto Mālie ‘i he fonuá
8Pea ‘e kau‘ā taha mo Siuta, mei he tafa‘aki ki hahake ‘o a‘u ki he tafa‘aki ki lulunga, ‘a e ‘inasi hapai, ‘a ia te mou hapai, ko e ua mano mā nima afe hono māukupu, pea ko hono lōloa mei he tafa‘aki ki hahake ‘o a‘u ki he tafa‘aki ki lulunga ‘e tatau mo e ngaahi vahe ko ia takitaha: pea ‘e tu‘u lotoloto ‘a e potu tapu. 9Ko e ‘inasi te mou hapai kia Sihova ‘e ua mano mā nima afe hono lōloa, pea taha mano#48.9 taha mano: Ko hono faka-Hepeluú ia, ka ‘oku ngali tonu hono hiki ‘o: ua mano. hono māukupu. 10Pea ko eni ‘a e fa‘ahinga ‘e kau ki ai ‘a e ‘inasi tapu kuo hapai ko e kau taula‘eiki; ko e feitu‘u noate ko e ua mano mā nima afe, pea ko e feitu‘u ki lulunga ko hono māukupu ko e taha mano, pea ko e feitu‘u ki hahake ko hono māukupu ko e taha mano, pea ko e feitu‘u ki he tonga ko hono lōloa ko e ua mano mā nima afe: pea ‘e tu‘u lotoloto ‘a e potu tapu ‘o Sihova. 11‘E kau ia ki he kau taula‘eiki, ‘a ia fua pē ‘i he hako ‘o Sātoki kuo fakatāpui, ‘a ia ‘oku nau tauhi ‘a e ngāue na‘a ku fokotu‘u: ‘a kinautolu na‘e ‘ikai ke afe ‘i he afe ‘a ha‘a ‘Isileli, hangē ko e afe ‘a e kau Līvai na. 12‘Io, ‘e tō kiate kinautolu ‘a e ‘inasi hapai mei he kelekele na‘e hapai, ko e me‘a toputapu ia, pea ‘e kau‘ā taha mo ha‘a Līvai. 13Pea ko e ‘inasi ‘o e kau Līvai ‘e palāleli mo e kau‘ā ‘o e kau taula‘eiki, ko e ua mano mā nima afe hono lōloa pea, ko hono māukupu ko e taha mano: ko e lōloa kotoa ko e ua mano mā nima afe, pea ko e māukupu ko e taha mano. 14Pea ‘e ‘ikai te nau fakatau pe fetongi hano konga, pea ‘e ‘ikai mole ki ha kakai kehe hano polopolo ‘o e fonua; he ‘oku tapu ia kia Sihova.
15Pea ko e nima afe ‘oku toe ‘i he māukupu, ‘i he tapa ‘o e ua mano mā nima afe ko ē, ko e kelekele ngofua ia ma‘a e kolo, ke nofo‘anga mo tu‘a kolo: pea ‘e tu‘u lotoloto ‘a e kolo. 16Pea ko hono ngaahi fua ‘eni; ko e tafa‘aki tokelau ko e fā afe mā nimangeau, pea ko e tafa‘aki tonga ko e fā afe mā nimangeau, pea mei he tafa‘aki hahake ko e fā afe mā nimangeau, pea ko e tafa‘aki ki lulunga ko e fā afe mā nimangeau. 17Pea ‘e ai ha tu‘a kolo; ki he tokelau ko e uangeau mā nimangofulu, pea ki he tonga ko e uangeau mā nimangofulu, pea ki hahake ko e uangeau mā nimangofulu, pea ki lulunga ko e uangeau mā nimangofulu. 18Pea ko hono toe ‘o e lōloa, palāleli mo e ‘inasi tapu kuo hapai, ko e taha mano ki hahake pea ko e taha mano ki lulunga, ‘e tu‘u palāleli ia mo e ‘inasi tapu kuo hapai; pea ko hono fua ‘e ma‘a e me‘akai ‘a e kau ngāue ‘o e kolo. 19Pea ko e kau ngāue ko ia ‘o e kolo, ko e ni‘ihi mei he matakali kotoa pē ‘o ‘Isileli ‘e ngāue ai.
20Ko e lahi kotoa ‘o e me‘a kuo hapai ko e ua mano mā nima afe ki hē mo e mano mā nima afe ki hē: te mou hapai hono vahefā ‘o e ‘inasi tapu ke ma‘u ‘e he kolo.
21Pea ko hono toe, ‘e ‘o e ‘eiki ‘o e kakai, ‘a e potu ‘i he tafa‘aki ko ē mo ē ‘o e ‘inasi tapu, mo e kelekele ‘o e kolo, ‘o lave ki he tafa‘aki hahake ‘o e ua mano mā nima afe na‘e hapai; pea ‘i lulunga ‘e lave ki he tafa‘aki lulunga ‘o e ua mano mā nima afe ko ē, ‘o tau atu ki he ngaahi vahe ko ē, ‘io, ‘e ‘o e ‘eiki ia; pea ko e ‘inasi tapu, mo e potu tapu ‘oku tu‘u ai ‘a e fale, ‘e ‘i loto ia. 22Ko ia ‘e tu‘u ia mei he kelekele ‘oku kau ki ha‘a Līvai, pea mei he kelekele ‘o e kolo, ‘a ia ‘oku na lotolotoi ‘i he me‘a ‘oku kau ki he ‘eiki ‘o e kakai: ‘oku ‘o e ‘eiki ‘a e vaha‘a ‘o e kau‘ā ‘o Siuta mo e kau‘ā ‘o Penisimani.
Ko e Kelekele ‘o e ngaahi Matakali kehé
23Pea ko e me‘a ki hono toe ‘o e ngaahi matakali: ‘e ma‘u ‘e Penisimani ha vahe ‘e taha, mei he tafa‘aki ki hahake ‘o a‘u ki he tafa‘aki ki lulunga. 24Pea ‘e ma‘u ‘e Simione ha vahe ‘e taha; ‘o kau‘ā mo Penisimani, mei he tafa‘aki ki hahake ‘o a‘u ki he tafa‘aki ki lulunga. 25Pea ‘e ma‘u ‘e ‘Īsaka ha vahe ‘e taha; ‘o kau‘ā taha mo Simione, mei he tafa‘aki ki hahake ‘o a‘u ki he tafa‘aki ki lulunga. 26Pea ‘e ma‘u ‘e Sepulone ha vahe ‘e taha; ‘o kau‘ā taha mo ‘Īsaka, mei he tafa‘aki ki hahake ‘o a‘u ki he tafa‘aki ki lulunga. 27Pea ‘e ma‘u ‘e Kata ha vahe ‘e taha; ‘o kau‘ā taha mo Sepulone, mei he tafa‘aki ki hahake ‘o a‘u ki he tafa‘aki ki lulunga.
28Pea ko e kau‘ā ‘o Kata, ‘a hono tafa‘aki tonga ki he potu ko Tonga, ‘e ‘alu ‘a e kau‘ā mei Tamali ki Vai Mēlipa ‘i Kētesi, ‘o fou ‘i he vaitafe ki he tahi lahi.
29Ko eni ‘a e fonua te mou tufa talotalo ki he ngaahi matakali ‘o ‘Isileli ke nau tofi‘a ‘aki, pea ko eni ‘a honau ngaahi vahevahe–ko ‘Ātonai Sihova ia mei he Ta‘ehāmai.
Ko e ngaahi Matapā ‘o Selusalema
30Pea ko eni ‘a e ngaahi tapa ‘o e kolo: ko e tafa‘aki tokelau ko e fā afe mā nimangeau ko hono fua ia. 31Pea ‘e hingoa ‘a e ngaahi matanikolo ki he ngaahi matakali ‘Isileli; ‘e tolu ‘a e matanikolo ‘i he potu tokelau; ko e taha ko e Matanikolo ‘o Lūpeni, ko e taha ko e Matanikolo ‘o Siuta, ko e taha ko e Matanikolo ‘o Līvai. 32Pea ‘i he tafa‘aki ki hahake ko e fā afe mā nimangeau: pea tolu ‘a e matanikolo; ‘io, ko e taha ko e Matanikolo ‘o Siosifa, ko e taha ko e Matanikolo ‘o Penisimani, ko e taha ko e Matanikolo ‘o Tani. 33Pea ko e tafa‘aki ki he tonga na‘e fā afe mā nimangeau hono fua: pea matapā tolu; ko e taha ko e Matanikolo ‘o Simione, ko e taha ko e Matanikolo ‘o ‘Īsaka, ko e taha ko e Matanikolo ‘o Sepulone. 34Ko e tafa‘aki ki lulunga na‘e fā afe mā nimangeau: na‘e tolu honau matanikolo; ko e taha ko e Matanikolo ‘o ‘o Kata, ko e taha ko e ko e Matanikolo ‘o ‘Āseli, ko e taha ko e Matanikolo ‘o Nafitalai.#Fkhā 21.12-13 35Ko hono fua takai ko e taha mano mā valu afe. Pea talu ai ko e hingoa ‘o e kolo ko Sihova Sama, (‘Oku ‘i ai ‘a Sihova).
Currently Selected:
KO ‘ISIKELI 48: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
