KO ‘ISIKELI 47
47
Ko ha Vaitafe Na‘e tafe Mai Mei he Temipalé
1PEA ne fakafoki au ki he matapā ‘o e fale; pea tā ‘oku ai ha vai ‘oku hū ki tu‘a mei he lalo tu‘unga matapā ‘o e fale, ‘o tafe ki hahake, he ko e matafale na‘e hanga ki hahake: ‘io, ko e vai ‘ena ‘oku tafe hifo mei he lalo ve‘e matapā to‘omata‘u ‘o e fale, ‘i he potu saute ‘o e ‘ōlita.#Sāk 14.8; Sioné 7.38; Fkhā 22.1 2Pea ne taki au ki tua‘ā, ‘i he matanikolo tokelau, ‘o ne ‘ave au ‘o takai ‘i tu‘a ki he matanikolo tu‘a, ‘a ia ‘oku hanga ki hahake; tā ko e vai ena ‘oku ngalili mai mei he ve‘e matanikolo to‘omata‘u. 3‘I he hū ki tu‘a ‘a e tangata ki hahake, na‘a ne to‘o ha kafa fua, pea ne fua atu ha kiupite ‘e afe, pea ne toki fakalaka atu au ‘i he vai; tā na‘e a‘u ‘a e vai ki he tunga‘i va‘e. 4Pea ne fua atu ha afe, ‘o ne fakalaka atu au ‘i he vai; tā na‘e a‘u ‘a e vai ki he tui: pea ne fua atu mo ha afe, ‘o ne fakalaka ai au; tā na‘e a‘u ‘a e vai ki he kongaloto. 5Pea ne fua atu ha afe; tā ko e vaitafe ‘oku ‘ikai te u lava ke a‘a ai: he kuo loloto ‘a e vai, ko e vai ke fai ai ha kakau, ko e vaitafe ‘oku ‘ikai ke lava ai ha a‘a. 6Pea ne pehē mai kiate au, Hako‘i-tangata, kuo ke tokanga ki ai? Pea ne taki au, ‘o fakafoki ‘i he ve‘e vaitafe.
7‘I he‘eku foki mai, tā ‘oku lahi ‘aupito ‘a e ‘akau ‘i he ve‘e vaitafe ‘i he kauvai ko ē mo ē. 8Pea ne pehē mai kiate au, Ko e vai ko eni ‘oku ‘alu atu ki he Seakale ko ē ‘i hahake, pea ‘oku hifo ki he ‘Alapā: pea ‘oku a‘u ki he tahi: ‘io, ‘oku a‘u ki he tahi ‘a e vai na‘e fakahū ki tu‘a; kae mo‘ui ‘a e tahi. 9Pea ‘e faifai pea ‘ilonga ha me‘a mo‘ui ‘oku fetu‘ani ‘i he tahi ‘e mo‘ui, ‘i he potu kotoa pē ‘e a‘u ki ai ‘a e vaitafe; pea ‘e ‘i ai ha fu‘ufu‘unga ika lahi ‘aupito; he kuo a‘u ki ai ‘a e vai ko ē, pea kuo mo‘ui, ‘io, ‘e mo‘ui ‘a e me‘a kotoa ‘i he potu ‘oku a‘u ki ai ‘a e vaitafe. 10Pea ‘e faifai pea tu‘u ‘i hono matātahi ‘a e kau toutai: ko e feitu‘u mei ‘Eniketi ‘o a‘u ki ‘Eniekelaimi ko e potu ia ke lafo kupenga ai; ‘e fa‘ahinga kehekehe ‘a e ika, ‘o hangē ko e ika ‘o e tahi lahi, ko e me‘a lahi ‘aupito. 11Ko hono ngaahi potu pela, mo hono ngaahi potu ano, ‘e ‘ikai mo‘ui ia; ‘e tuku pē ke ma‘u ‘e he māsima. 12Pea ‘i he ve‘e vaitafe ‘e tupu ‘i hono kauvai ko ē mo ē ‘a e ‘akau kai kehekehe; ‘e ‘ikai mae hono lau, pea ‘e ‘ikai hala hono fua: ‘e polopolo ‘i he māhina kotoa; he ko hono vai ko ē ‘oku hū ia mei he Potu Tapu; pea ko hono fua ‘oku ma‘a e me‘akai, pea ko hono lau ‘oku ma‘a e faito‘o.#Fkhā 22.2
Ko e ngaahi Kau‘ā Fonua ‘o e Fonuá
13Ko e folofola ‘eni ‘a ‘Ātonai Sihova: Ko e kau‘ā ‘eni te mou vahevahe-tofi‘a ‘aki ‘a e fonua ki he matakali ‘e hongofulu mā ua ‘o ‘Isileli: ‘e ma‘u ‘e Siosifa ha vahe ‘e ua.#47.13 vahe ‘e ua: Na‘e vahe ‘a e taki konga fonua ‘e taha ‘o e matakali Manasé mo e matakali ‘Ifalemí, ‘a ia ongo foha ‘o Siosifá. 14Pea ko ho‘omou tofi‘a ‘aki ia ‘e tatau ‘a ē mo ē; he na‘a ku hiki hoku nima ke ‘atu ia ki ho‘omou ngaahi kui: ko ia, ‘e tō ‘a e fonua ni mo‘omou tofi‘a.
15Pea ko eni ‘a e kau‘ā ‘o e fonua: ‘i he potu tokelau ‘e kamata mei he tahi lahi, ‘o fou atu ki Keteloni, ‘o a‘u ki Sētata; ‘i Hēmati,#47.15 ‘o fou… Sētata: ‘Oku ngali tonu ‘a hono hiki ‘o e faka-Hepeluú ‘o: ‘o fou atu ki he kolo ko Hēmati, ka ‘oku pehē ‘i he hiki fuoloa ‘e taha: ki he kolo ko Hēmati, ‘o fou atu ‘i Hēmati, ki he kolo ko Sētata. ‘i Pēlota, ‘i Sipelaimi; 16(‘a ia ‘oku ‘i he vaha‘a ‘o e kau‘ā ‘o Tāmasikusi mo e kau‘ā ‘o Hēmati) ‘i Hāsili-lotoloto, ‘a ia ‘oku ‘i he kau‘ā ‘o Haulani. 17Na‘e a‘u ‘a e kau‘ā mei he tahi ki Hāsali-‘einoni ‘i he kau‘ā ‘o Tāmasikusi, pea ko e feitu‘u ‘o Hēmati ‘oku tu‘u ‘i he potu noate, ‘o fai ki he noate.
18Ko e tafa‘aki tokelau ia. Pea ko e tafa‘aki hahake ‘i he vaha‘a ‘o Haulani mo Tāmasikusi mo Kiliati, pea mo e fonua ‘o ‘Isileli, ko Soatani ia; te mou fua mei he kau‘ā ko ē ki he tahi hahake.#47.18 hahake: ‘Oku ‘ikai ke mahino ‘a hono faka-Hepeluú ka ‘oku pehē ‘i he ngaahi hiki fuoloa ‘e ni‘ihi: hahake ‘o a‘u ki Tema. Ko e tafa‘aki hahake ia.
19Pea ko e tafa‘aki mei he tonga ‘i he feitu‘u tonga ‘e ‘alu mei Tamali ‘o a‘u ki Vai Mēlipa ‘i Kētesi, ‘o fou ‘i he vaitafe ki he tahi lahi. Ko e tafa‘aki tonga ia ‘i he feitu‘u ko Tonga.
20Pea ko e tafa‘aki lulunga ko e tahi lahi, mei he kau‘ā ko ē, ‘o a‘u ki he fe‘unga mo e Hū‘anga ki Hēmati.
21Ko e tafa‘aki lulunga ia. Pea te mou vahevahe ‘a e fonua ni kiate kimoutolu, ‘o fai ki he ngaahi matakali ‘o ‘Isileli. 22‘Io, ‘e faifai pea te mou tufa talotalo ia, ko e ngaahi tofi‘a ‘omoutolu mo e ha‘a kehe ‘oku ‘āunofo mo kimoutolu ‘a ia kuo nau fakatupu fānau ‘i homou lotolotonga; te nau tatau kiate kimoutolu mo ha‘a ‘Isileli kuo tupu ‘i he fonua; te nau kau mo kimoutolu ‘i he fai talotalo ke ma‘u tofi‘a ‘i he ngaahi matakali ‘o ‘Isileli. 23‘Io, ‘e hoko ‘o pehē; pe ko e hā ‘a e matakali ‘oku ‘āunofo ai ha kehe, ‘e ‘ange hano tofi‘a ‘i he potu ko ia–ko ‘Ātonai Sihova ia mei he Ta‘ehāmai.
Currently Selected:
KO ‘ISIKELI 47: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
