KO ‘ISIKELI 43
43
Ko e Liuaki Mai ‘a Sihova ki he Temipalé
1PEA ne taki au ki he matanikolo, ‘a e matanikolo ‘oku hanga ki hahake: 2pea tā ko e Sikaina ‘o e ‘Otua ‘o ‘Isileli na‘e nga‘eke mai mei hahake: ‘o ongoonga‘a mai hangē ko e ongoonga‘a ‘ani vai lahi; pea na‘e māmangia ‘a e fonua ‘i hono kolōlia.#‘Isi 10.3-4,18-19; 11.22-23; Fkhā 1.15 3Pea ko ‘ene hā kiate au na‘e tatau mo e me‘a na‘a ku sio ki ai ‘i he‘eku ha‘u ke faka‘auha ‘a e kolo: pea na‘e ai ha ngaahi me‘a na‘e ha hangē ko ia na‘a ku sio ki ai ofi ki he vaitafe ko Kipa: pea na‘a ku tō fo‘ohifo. 4Pea na‘e hū ‘a e Sikaina ‘o Sihova ki he fale ‘i he matanikolo na‘e hanga ki hahake.
5Pea na‘e hiki au ‘e he laumālie,#43.5 pe matangi. ‘o ‘ave au ki he Loto‘ā Loto: Pea tā ‘oku fonu ‘a e fale ‘i he kolōlia ‘o Sihova. 6Pea na‘a ku ongo‘i ha lea mai mei fale; pea ‘iloange ‘oku ai ha taha ‘oku tu‘u ‘i hoku tafa‘aki. 7Pea ne pehē kiate au, Hako‘i-tangata, ko e potu ē ‘o hoku taloni, pea ko e potu ē ‘o hoku ‘aofiva‘e, he‘eku nofo ai ‘i he lotolotonga ‘o ha‘a ‘Isileli, ‘o ta‘engata. Pea ‘e ‘ikai toe ‘uli‘i ‘e he fale ‘o ‘Isileli ‘a hoku hingoa tāpuhā, ‘e kinautolu, pe ko honau ngaahi tu‘i, ‘aki ‘enau tango, pe ‘aki ‘a e ngaahi ‘anga‘anga ‘o#43.7 ‘aki… ‘anga‘anga ‘o; pe ‘aki ‘a e fokotu‘u maka fakamanatu ‘o. honau ngaahi tu‘i, ‘a honau ngaahi ‘esi: 8he‘enau ‘ai honau tu‘unga matapā ki he tu‘unga matapā ‘o‘oku, mo honau ngaahi pou ofi ki he ngaahi pou ‘o‘oku, ko ia ko e fo‘i ‘ā pē na‘e ‘i he vaha‘a ‘o‘oku mo kinautolu; pea nau ‘uli‘i hoku hingoa tāpuhā ‘aki ‘a e ngaahi fakalielia na‘a nau fai: ko ia na‘a ku keina kinautolu ‘i he‘eku ‘ita. 9Ka ko eni ke nau tuku atu ‘enau tango, mo e ngaahi ‘anga‘anga ‘o#43.9 ‘aki… ‘anga‘anga ‘o; pe ‘aki ‘a e fokotu‘u maka fakamanatu ‘o. honau ngaahi tu‘i, ke mama‘o mo au, pea te u nofo ‘i honau lotolotonga ‘o ta‘engata.
10Siini, Hako‘i-tangata, fakamatala ‘a e fale ni ki he fale ‘o ‘Isileli, ke nau laea ‘i he ngaahi kovi kuo nau fai: pea ke nau fakafuofua ‘ene tu‘u. 11Pea ka nau ka laea ‘i he ngaahi fu‘u me‘a kuo nau fai, pea faka‘ilo kiate kinautolu ‘a e anga ‘o e fale, mo ‘ene tu‘u, mo hono ngaahi hū‘anga ki tu‘a, mo hono ngaahi hū‘anga ki loto, mo hono ngaahi anga kotoa, mo hono ngaahi tu‘utu‘uni kotoa; ‘io, ‘a hono ngaahi anga kotoa, mo hono ngaahi lao kotoa; pea ke tohi ia ‘i honau ‘ao: ke nau tauhi ia, ‘a hono anga kotoa, mo hono ngaahi tu‘utu‘uni kotoa, ‘o fai ki ai. 12Ko eni ‘a e lao ‘o e fale: ko e funga mo‘unga ni, ko hono feitu‘u kotoa takatakai ‘oku toputapu. ‘Io, ko e lao ia ‘o e fale.
Ko e ‘Ōlita
13Pea ko e fua ‘eni ‘o e ‘ōlita lau kiupite: (ko e kiupite ko ia ko e kiupite mo e fo‘i hanga) ‘oku ‘i ai ha paepae ‘i lalo, ko e kiupite ‘e taha, pea kiupite ‘ene tomo atu; pea ai ha fakakaho ‘i hono kaokao takatakai, fe‘unga mo e hanga ‘e taha: pea ko e tu‘unga ia ‘o e ‘ōlita.#‘Eki 27.1-2; 2 Kal 4.1 14Pea ko e fua mei he paepae#43.14 pe kelekele. ‘i lalo, ‘o a‘u ki he puha lalo, ko e kiupite ‘e ua; pea ko ‘ene tomo atu ko e kiupite ‘e taha, pea mei he puha si‘i ko ia ki he puha lahi, ko e kiupite ‘e fā; pea ko ‘ene tomo atu ko e kiupite ‘e taha. 15Hoko ai ‘a e Mo‘unga ‘o e ‘Otua, ko e kiupite ‘e fā; pea hopo hake mei he Matanavu ‘a e ‘Otua ‘a e faa‘i Nifo. 16Pea ko e Matanavu ‘a e ‘Otua ko e kiupite ‘e hongofulu mā ua hono lōloa, mo e kiupite ‘e hongofulu mā ua hono māukupu; ko e sikuea ‘oku tapafā tatau. 17Pea ko e puha ko e kiupite ‘e hongofulu mā fā hono lōloa, pea kiupite ‘e hongofulu mā fā hono māukupu; na‘e tapafā tatau; pea ko e fakakaho takatakai ki ai ko e haafe kiupite; pea ko hono paepae ‘i lalo ko e kiupite takatakai; pea ko hono hakenga na‘e hanga ki hahake.
Ko Hono Fakatāpui ‘o e Temipalé
18Pea ne pehē mai kiate au, Hako‘i-tangata, ko e folofola ‘eni ‘a ‘Ātonai Sihova: Ko eni ‘a e ngaahi tu‘utu‘uni ma‘a e ‘ōlita ‘i he ‘aho ‘o hono ngaohi, ke feia ‘a e ngaahi feilaulau-mōifua, pea ke afuhi ‘aki ‘a e toto. 19Pea te ke ‘atu ki he kau Līvai taula‘eiki, ‘a kinautolu mei he hako ‘o Sātoki, ‘a e fa‘ahinga ‘oku taka ofi kiate au ke fai hoku tauhi–ko ‘Ātonai Sihova ia mei he Ta‘ehāmai–‘io te ke ‘atu kiate kinautolu ha pulu mui mo‘o feilaulau-angahala. 20Pea te ke to‘o hano toto, ‘o ‘ai ki hona faa‘i Nifo, pea ki he faa‘i tuliki ‘o e puha, pea ki he fakakaho takatakai; ‘o fai ai hono tatafi hia mo hono fakahōifua‘ia. 21Pea te ke to‘o ‘a e pulu feilaulau-angahala, pea te ne tutu ‘i he potu kuo tu‘utu‘uni ki he me‘a pehē ‘o e fale ‘i he tu‘a potu tapu. 22Pea ‘i hono ua ‘o e ‘aho te ke ‘atu ha kosi tangata ta‘ehano mele mo‘o feilaulau-angahala; ke nau fai ai ha tatafi hia ma‘a e ‘ōlita, ‘o hangē ko e tatafi na‘a nau fai‘aki ‘a e pulu. 23‘I he ‘osi leva ho‘o fai ‘a e tatafi hia, te ke ‘atu ha pulu mui ta‘ehano mele, pea mo ha sipi tangata mei he tākanga, ta‘ehano mele. 24Pea te ke ‘unuaki mai kinaua ki he ‘ao ‘o Sihova, pea ‘e lī ha māsima kiate kinaua ‘e he kau taula‘eiki, pea te nau feia kinaua ko e feilaulau-mōifua kia Sihova. 25Ko e ‘aho ‘e fitu te ke feia ha kosi feilaulau-angahala ‘i he ‘aho takitaha: pea te nau feia ha pulu mui mo e sipi tangata mei he tākanga, ‘oku fakatou ta‘emele. 26Ko e ‘aho ‘e fitu te nau fai ‘a e fakahōifua‘ia ‘o e ‘ōlita, pea te nau fakama‘a ia, mo fakatāpui. 27Pea kuo nau faka‘osi ‘a e ngaahi ‘aho ko ia, pea ‘i hono valu ‘o e ‘aho, ‘o fai atu, ‘e feia ‘i he ‘ōlita ‘e he kau taula‘eiki ‘a e ngaahi feilaulau-mōifua ‘amoutolu, mo e ngaahi feilaulau-‘ofa; pea te u tali kimoutolu–ko ‘Ātonai Sihova ia mei he Ta‘ehāmai.#‘Eki 29.35-37
Currently Selected:
KO ‘ISIKELI 43: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
