KO ‘ISIKELI 34
34
Ko e Kau Tauhi Sipi ‘Isileli
1PEA hoko ‘a e folofola ‘a Sihova kiate au, ‘o pehē, 2Hako‘i-tangata, fai ha palofisai ki he kau tauhi ‘o ‘Isileli, palofisai mo ke lea kiate kinautolu, ‘io, ki he kau tauhi sipi, ‘o pehē, Ko e folofola ‘eni ‘a ‘Ātonai Sihova: ‘Oiauē ‘a e kau tauhi#34.2 pe tauhi sipi. ‘o ‘Isileli, ‘a ia ‘oku nau fafanga kinautolu pē! 3‘Ikai ko e taau ‘o e tauhi sipi ke nau fafanga ‘a e tākanga? Ko e ngako ‘oku mou kai, pea ko e fulufulu ‘oku mou kofu ‘aki, ko e manu sino ‘oku mou tāmate‘i; ka ko e fanga sipi ‘oku ‘ikai te mou fafanga. 4Tala‘ehai ‘oku mou ‘ai ke mālohi ‘a e vaivai, pea tala‘ehai ‘oku mou faito‘o ‘a ia ‘oku mahaki, pea tala‘ehai ‘oku mou ha‘iha‘i ha lavea, pea tala‘ehai ‘oku mou fakafoki ‘a ia ne sese‘e, pea tala‘ehai ‘oku mou kumi ha taha kuo mole; pea ko ho‘omou pule‘i kinautolu ‘oku fai mo e fefeka mo e laiki noa. 5Ko ia na‘a nau movete ai, koe‘uhi na‘e ‘ikai fai honau tauhi: ‘o nau hoko ai ko e me‘akai ki he fanga manu kehekehe ‘o e vao, ‘o nau movetevete pē.#Nōm 27.17; 1 Tu‘i 22.17; Māt 9.36; Ma‘ake 6.34 6‘Oku hē noa si‘eku fanga sipi ‘i he ngaahi mo‘unga kehekehe, pea ‘i he ngaahi funga potu mā‘olunga: ‘io, kuo veteki ‘eku fanga sipi ‘i he funga kotoa ‘o e fonua; pea ‘oku ‘ikai ha taha ‘oku fehu‘i pe ‘oku nau ‘i fē, pea ‘oku ‘ikai ha taha ‘oku kumi ki ai.
7Ko ia, mou fanongo ki he folofola ‘a Sihova, ‘a e kau tauhi na; 8Tangi ‘eku mo‘ui–ko ‘Ātonai Sihova ia mei he Ta‘ehāmai–ko e me‘a ‘i he hoko ‘eku tākanga ko e me‘a ke vetea, ‘io, kuo hoko ‘eku fanga sipi ko e me‘akai ‘a e manu kehekehe ‘o e vao, ko e ‘ikai ha taha ‘oku fai honau tauhi, pea ‘oku ‘ikai ‘eke ki he‘eku fanga sipi ‘e he kau tauhi ‘a‘aku, pea kuo fafanga kinautolu pē ‘e he kau tauhi, ka ‘oku ‘ikai te nau fafanga ‘eku tākanga– 9ko ia, fanongo ki he folofola ‘a Sihova, ‘a e kau tauhi na. 10Ko e folofola ‘eni ‘a ‘Ātonai Sihova; Ko au ‘eni te u fai mo e kau tauhi; pea te u ‘eke ‘eku fanga sipi mei honau nima, pea te u hifo kinautolu mei he tauhi ‘o e tākanga; ke ‘oua na‘a toe fafanga ‘e he kau tauhi ‘a kinautolu ‘e kinautolu; ‘io, te u fakahaofi ‘eku fanga sipi mei honau ngutu, ke ‘oua te nau toe me‘akai ‘aki.
Ko e Tauhi Sipi Lelei
11Tala atu, ko eni ‘a e folofola ‘a ‘Ātonai Sihova: Ko au ‘eni te u ‘eke ‘e au ‘eku fanga sipi, pea te u tokanga‘i kinautolu ‘e au. 12Hangē ko e tokanga ‘a e tauhi ki he‘ene tākanga ‘i he ‘aho ‘oku ne hoko ai ki he lotolotonga ‘o ‘ene fanga sipi kuo movete, ‘e pehē ‘eku tokanga‘i ‘eku fanga sipi; pea te u fakahaofi kinautolu mei he ngaahi potu kehekehe ne veteki kinautolu ki ai ‘i he ‘aho na‘e ‘ao‘aofia mo fakapo‘uli tu‘u. 13Pea te u fakahū kinautolu ki tu‘a mei he ngaahi kakai, pea te u tānaki kinautolu mei he ngaahi fonua, pea te u ‘omi kinautolu ki honau kelekele, pea te u fafanga kinautolu ‘i he ngaahi mo‘unga ‘o ‘Isileli, ‘i he ngaahi tele‘a, pea ‘i he potu fonua kotoa pē ‘oku nofo‘anga. 14Te u fafanga ‘a kinautolu ‘i ha potu me‘akai lelei, ‘io, ‘i he ngaahi mo‘unga mā‘olunga ‘o ‘Isileli ‘e tu‘u ai honau kaikai‘anga: ko e potu ko ia te nau tākoto ai ‘i ha kaikai‘anga lelei, ‘io, ko e potu mahu te nau kaikai ai ‘i he ngaahi mo‘unga ‘o ‘Isileli. 15Ko ia te u fafanga ‘eku tākanga ‘e au, pea ko au te u fakatākoto kinautolu–ko ‘Ātonai Sihova ia mei he Ta‘ehāmai.
16Ko ia kuo mole te u kumia, pea ko ia ne sese‘e te u fakafoki mai, pea ko ia kuo lavea te u ha‘iha‘i, pea ko ia kuo vaivai te u ‘ai ke mālohi: ka ko ia ‘oku sisino mo mālohi te u tāmate‘i; te u fai fakalao ‘eku tauhi ‘aku.
17Pea ko e me‘a kiate kimoutolu, si‘eku tākanga, ko e folofola ‘eni ‘a ‘Ātonai Sihova: Ko au ‘eni te u fakatonutonu ‘a e vaha‘a ‘o e sipi ko ē mo e sipi ko ena, ‘a e fanga sipi tangata mo e fanga kosi tangata. 18Koloto ā ke mou topono ‘i he kaikai ‘i he potu mahu; pea ‘oku mou malaki koā hono toe ‘o e kaikai‘anga? pea ‘oku mou inu koā ‘a e vai tasilo, pea toki kele‘i hono toe ‘aki homou va‘e? 19Pea ko si‘eku fanga sipi, kuo pau ke nau kai ‘a e me‘a kuo mou malaki, pea ke inu ‘a e me‘a kuo mou kele‘i ‘aki homou va‘e.
20Ko ia ko e folofola ‘eni ‘a ‘Ātonai Sihova kiate kinautolu: Ko au ‘eni te u fakatonutonu ‘e au ‘a e vaha‘a ‘o e sipi sino mo e sipi tutue. 21Ko e me‘a ‘i ho‘omou tua‘i ‘aki ‘a e vakavaka mo e uma, mo tui‘i ‘aki homou nifo ‘a e vaivai fua pē, kae‘oua ke ‘osi honau kapusi ki tu‘a; 22ko ia te u tokoni ki he‘eku fanga sipi, pea ‘e ‘ikai te nau toe hoko ko e me‘a ke vetea; pea te u fakatonutonu ‘a e vaha‘a ‘o e sipi mo e sipi. 23Pea te u fokotu‘u ke pule kiate kinautolu ha taha‘i tauhi, ‘a ia te ne fafanga kinautolu; ‘io, ‘a ‘eku sevāniti ko Tēvita; ko e toko taha ko ia te ne fafanga kinautolu, ‘io, ‘e nofo ia ko honau tauhi.#Fkhā 7.17 24Pea ko au Sihova te u nofo atu ko honau ‘Otua, pea ko ‘eku sevāniti ko Tēvita te ne ‘eiki ‘i honau lotolotonga: ko au Sihova kuo u tala ia.#‘Isi 37.24 25Pea te u fai ha kovinānite melino mo kinautolu, pea te u ‘ai ke ngata mei he fonua ‘a e manu kovi: pea te nau nofo nonga ‘i he toafa, pea te nau mohe ‘i he ngaahi vao.
26Pea te u ngaohi kinautolu, pea mo e ngaahi potu takatakai ki hoku mo‘unga,#34.26 hoku mo‘ungá; Vakai ange ki he 20.40. ko e tāpuaki‘anga: pea te u tuku ke tō ha ‘uha ‘i hono taimi totonu: ‘e lolo ha ngaahi ‘uha tāpuaki. 27Pea ‘e tuku hake hono fua ‘e he ‘akau ‘o e vao, pea ‘e tuku atu ‘e he fonua hono mahu, pea te nau nofo nonga pē ‘i honau kelekele: pea te nau ‘ilo ko Sihova au, ‘oka u ka fesi‘i ‘a e ‘akau ‘o honau ‘ioke, mo fakahaofi kinautolu mei he nima ‘o e fa‘ahinga na‘e tamaio‘eiki ‘aki kinautolu. 28‘E ‘ikai te nau toe nofo ko e me‘a ke vete ‘e he ngaahi pule‘anga, pea ‘e ‘ikai keina kinautolu ‘e he manu ‘o e fonua; ka te nau nofo nonga pē, ‘o ‘ikai ha taha te nau ilifia ki ai. 29Pea te u fokotu‘u ma‘anautolu ha ngoue ongoongoa; ko ia ‘e ‘ikai te nau toe tafia ‘i he honge ‘oku ‘i he fonua, pea ‘e ‘ikai te nau toe fua ‘a e manuki ‘a e ngaahi pule‘anga. 30Pea te nau ‘ilo ko au Sihova ko honau ‘Otua ‘oku ou ‘iate kinautolu, pea ko hoku kakai kinautolu ‘a e fale ‘o ‘Isileli–ko ‘Ātonai Sihova ia mei he Ta‘ehāmai.
31Pea ko kimoutolu ko ‘eku fanga sipi, ko e sipi ‘oku ou fafanga, ko e kakai kimoutolu: ko homou ‘Otua au–ko ‘Ātonai Sihova ia mei he Ta‘ehāmai.
Currently Selected:
KO ‘ISIKELI 34: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
