KO ‘ISIKELI 3
3
4Pea ne folofola kiate au, Hako‘i-tangata, ha‘u ange, ‘alu ki he fale ‘o ‘Isileli, ‘o tala kiate kinautolu ‘eku ngaahi lea.#Fkhā 10.9-10 5He tala‘ehai ‘oku fekau koe ki ha kakai lea mei he monga, mo ‘elelo mamafa, ka ki he fale ‘o ‘Isileli, 6‘oku ‘ikai ko e ngaahi kakai lahi lea mei he monga mo ‘elelo mamafa, ‘a ia ‘oku ‘ikai te ke ‘ilo‘i ‘enau lea: ka ki he fa‘ahinga ko ē; ‘e ‘uhinga kiate kinautolu ho‘o lea.#3.6 ‘Oku hiki ‘e he ni‘ihi: Tala atu, ka ne u fekau koe kiate kinautolu, te nau tokanga kiate koe. 7Ka ‘e ‘ikai loto ‘a e fale ‘o ‘Isileli ke ongo‘i koe, he ‘oku ‘ikai te nau fie ongo‘i au: he ko e fale kotoa ‘o ‘Isileli ko e fa‘ahinga la‘e maka ia, mo loto fefeka. 8Vakai, kuo u ngaohi ho mata ke fefeka, ke hoa mo ho‘onautolu mata, pea ke maka ho la‘e ke hoa mo ho‘onautolu la‘e. 9Kuo u ngaohi ho la‘e ke hangē ko e taiāmoni, ‘a ia ‘oku fefeka ange ‘i he maka: ‘oua te ke manavahē kiate kinautolu, pea ‘oua te ke teki ‘i honau ‘ao; he ko e fāmili pau‘u kinautolu.
10Pea ne folofola kiate au, Hako‘i-tangata, ko ‘eku ngaahi lea kotoa ‘oku ou fai atu te ke ‘ai ki ho loto, pea ongo‘i ‘aki ho telinga. 11Pea ha‘u ange, ke ke ‘alu ki he fakahē, ki he hako ‘o ho kakai, pea te ke lea kiate kinautolu, ‘io, ke ke pehē ange, Ko e folofola eni ‘a ‘Ātonai Sihova–ko ia ai pē pe te nau fie fanongo, pe te nau kalofi.
12Pea na‘e hiki au ‘e he laumālie,#3.12 pe ‘e ha matangi. pea u ongo‘i mei hoku tu‘a ha lea ‘oku fu‘u ha‘aki mai, “Ke mālō‘ia ‘a e Sikaina ‘o Sihova”–mei hono potu ia. 13Pea ongo mai mo e longoa‘a ‘o e ngaahi kapakau ‘o e ngaahi Me‘a Mo‘ui, ‘enau felave ‘a e taha mo e taha, mo e longoa‘a ‘o e ngaahi fakasāliote ‘oku ō mo kinautolu, mo e longoa‘a ‘o ha fu‘u ngahaha. 14‘Io, na‘e hiki au ‘e he laumālie, ‘o ne ‘ave au; pea u ‘alu mamahi kuo ‘ita hoku laumālie; ka na‘e mamafa kiate au ‘a e nima ‘o Sihova. 15Pea u a‘u ki Telapipi, ki he kau fakahē na‘e nofo ki he vaitafe ko Kipa: pea ko e potu na‘e nofo ai ‘a e fa‘ahinga ko ē na‘a ku nofo ai ‘i honau lotolotonga, kuo u mate ngūngū ‘o ‘aho fitu.
Ko Hono Fakanofo ‘e Sihova ‘a ‘Isikeli ko e Taulama
16Pea ‘i he hili ‘a e ‘aho ‘e fitu, na‘e hoko ‘a e folofola ‘a Sihova kiate au, ‘o pehē, 17Hako‘i-tangata, kuo u tuku koe ko e taulama ki he fale ‘o ‘Isileli: pea te ke ma‘u mei hoku ngutu ‘a e lea, pea te ke valoki kinautolu meiate au. 18Kapau te u lea ‘i ha angahala, Te ke mātu‘aki mate; pea ‘oku ‘ikai te ke valoki ia, ‘o ‘ikai te ke lea ke sese‘e ‘a e angahala mei hono ‘alunga kovi ke ne mo‘ui; te ne mate ‘a e angahala ko ia ‘i he kovi kuo ne fai; ka ko hono toto te u ‘eke ki ho‘ou nima. 19Ka ‘o kapau ‘oku ke valoki ‘e koe ‘a e angahala, ka ‘oku ‘ikai te ne tafoki ia mei he‘ene angahala, pea mei hono ‘alunga kovi, ‘e mate ‘a e toko taha ko ia ‘i he kovi kuo ne fai; ka kuo ke hamusi ‘e koe ho laumālie ‘o‘ou.
20Pea ka afe ha taha mā‘oni‘oni mei he‘ene mā‘oni‘oni, ‘o faikovi, ‘o u ‘ai ha tūkia‘anga ‘i hono ‘ao, ‘e mate ‘a e toko taha ko ia: kapau na‘e ‘ikai te ke valoki‘i ia, te ne pekia ‘i he‘ene angahala, pea ‘e ‘ikai manatua ‘a e mā‘oni‘oni kuo ne fai; ka ko hono toto te u ‘eke ki ho‘ou nima. 21Ka ko e me‘a kiate koe, kapau ‘oku ke valoki‘i ia, ‘a e mā‘oni‘oni ko ē ke ‘oua na‘a fai angahala ha taha mā‘oni‘oni, pea ‘oku ‘ikai ke fai angahala ‘a e toko taha ko ia, ‘e mo‘ui ia, koe‘uhi na‘e valoki‘i, pea ko koe kuo ke hamusi ho laumālie ‘o‘ou.
‘E ‘Ikai Lava ‘a ‘Isikeli ‘o Lea
22Pea na‘e hoko kiate au ‘i he potu ko ia ‘a e nima ‘o Sihova; pea ne folofola mai, Tu‘u, ‘alu atu ki he tele‘a, pea te u lea kiate koe ‘i he potu ko ia.
23Pea u tu‘u, ‘o ‘alu atu ki he tele‘a: Pea tā ko e kolōlia ‘o Sihova ena ‘oku tu‘u hangē ko e kolōlia na‘a ku sio ki ai ‘i he ve‘e vaitafe ko Kipa: pea u tō fo‘ohifo. 24Pea hū kiate au ‘a e laumālie, ‘o ne fokotu‘u au ‘aki hoku va‘e; pea ne lea kiate au, ‘o folofola mai, ‘Alu, ‘o tāpuni koe ‘i ho fale. 25Siini, Hako‘i-tangata, vakai, te nau ‘ai kiate koe ‘ani kafa, ‘o ha‘i ‘aki koe, ko ia ‘e ‘ikai te ke lava ke ke ‘alu atu ki honau lotolotonga. 26Pea ko ho ‘elelo na te u fakapiki ki ho ‘ao‘ingutu, koe‘uhi ke ke noa, ‘o ‘ikai te ke ‘iate kinautolu ko honau tangata akonaki: he ko e fāmili pau‘u kinautolu. 27Ka ‘oka u ka lea kiate koe, te u to‘o ho ngutu, pea te ke toki pehē kiate kinautolu, Ko e folofola eni ‘a ‘Ātonai Sihova; Ko ia ‘oku fie fanongo, ke ne fanongo; pea ko ia ‘oku fie kalofi ke ne kalofi–he ko e fāmili pau‘u kinautolu.
Currently Selected:
KO ‘ISIKELI 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
